OLUO LO SAMUEL 23 - KITABI HABARI MOPIOHE

Lapali lei Dauda u pulitio

¹ Tei Dauda walae̒e Isai tilulao-Tio lowali olongia wau pilohutu lowali taa udaa̒ lo Allahu Taa̒ala lei Yako. Tio olo talo ngalaangani lalaa-huwaalo ode Isirai̒lu. Uti-utieelo lapali lei Dauda u pulitio:

² Rohullah malo tahuda lotimbuludei olau̒; tahuli wau amaanati-Lio woluo to tunggiluu̒.

³ Allahu Taa̒ala lei Yako malo tahuda mai; ode olau̒ tamoo-duo̒laawa Isirai̒lu lotahuda mai odie: “Olongia tamomalenta ulipu wolo aadili tamo titau̒wa wolo ototaaa̒ti ode Eeya,

⁴ Tio debo odelo tinelo dulahu heli lobutu mai to molaliyonu daa̒ tou̒ heengo lobaangai. Tio debo odelo tinelo dulahu mobaanga daa̒ lopalutao̒ didi moo̒hutu huo̒yooto moidu gaaga molilingga.”

⁵ Odito olo waliu̒ mola bilarakati mai lo Allahu Taa̒ala, danti-Lio to olau̒ diila lolomelo, danti-Lio boito ohiheo-hiheolo mao̒ wau ngoa̒amilalo wimu-wimumuto, leia̒atulu todelomo totoonulalo u hi tua-tuawua. Allahu Taa̒ala lopongaku mai ohohaamau̒ wau lodungohe totoonulalo otohilaa lo hilaau̒.

⁶ Bo taa u diila lodungohe to Eeya debo odelo duhi pilomahulo. Uluu̒ lotau diila moo̒ dihu olio;

⁷ Diaaluo penu boli ngotaa mao̒ mohuto modedeta olio wonu diila wolo pakaakasi monto ayu meaambo wate. Tau-tauwalo boito maahu pobuo lotulu.

Mongo pajule lei Dauda tamasa-masaahuru

⁸ Uti-utieelo tanggulo mongo polowila lei Dauda tamasa-masaahuru: Tabohulio yito tei Ishbaa̒l, taulo Hakhmoni, tau̒wa lo “Polemboa̒ Totolu” (Triwira). Pee̒enta todelomo popaatea tuwau tio helo luwali tawalu lohetuto lota wau loo̒pate yila-yilateelo mao̒ olimongolio ngoa̒amila wolo totobui̒o.

⁹ Tao̒luolio todelomo Polemboa̒ Totolu boito yito tei Eleajar walae̒e Dodo lonto kaumu Ahohi. Tio lodudua̒ olei Dauda tou̒ timongolio helotaalua wolo taulo Pilistin tamalo tia̒mbu mao̒ u mopaatea. Lapatao̒ tau̒ pasuukani lo Isirai̒lu tilumouli,

¹⁰ tei Eleajar tulusi lohipate helo pobinasa tau lo Pilistin tunggula tio yiloongolo daa̒. Ului̒o lali lobuwalodu tilinggula tio diila lowali lolopata wamilio. Todulahee boito Eeya longohi mai u loo̒haama daa̒ to taulo Isirai̒lu. Pasuukani lo Isirai̒lu talotouli engonti luli lohualinga mota ode tambati lei Eleajar hemopaatea, lapatao̒ helo hinggi boo̒ lo popaatea lonto mimii-lateyaala mota teto.

¹¹ Tao̒luolio todelomo Polemboa̒ Totolu boito yito tei Sama walae̒e Age lonto Harari. Pee̒enta tou̒ taulo Pilistin hia̒mbua to Lehi, tohalabolu tuwau u polupolu wolo kasa meela, pasuukani lo Isirai̒lu lolahi lonto taulo Pilistin.

¹² Bo tei Sama debo hemopaatea, helomate yila-yilateelo mao̒ wau lopoo̒laaheo̒ taulo Pilistin, tilinggula ilohaasili lomiintengi halabolu boito. Odi-odieelo mola Eeya helo poo̒haama daa̒.

^13-14 Todulahee uwewo tou̒ dungga-dungga mai sembo lo pongotola, toulota towolota lo polowila lei Dauda tolo pulu lota tahi o tilanggulo lotuhuta mola ode Gowa Adulam. Tou̒ boito tei Dauda woluo todelomo kubu togowa boito. Tau lo Pilistin lotikema to Lumbaya Repaim, wau ngopasuukani lonto olimongolio lotihuloa̒ao̒ to Betlehemu.

¹⁵ Tei Dauda mooloolo to kaambungu pilohutu loduhulio boito wau malo loi̒ya, “Aa, humayaalio wau̒ peelumolio lotaluhee monto ali totili lo huhebu hulubangi to Betlehemu!”

¹⁶ Loo̒dungohe uito tatoulota polowila boito tilumuwota mota ode pilo tikemawa taulo Pilistin, tulusi lolime taluhee lonto ali boito, lapatao̒ dilelolio mai odelei Dauda. Bo tei Dauda diila lohuto longilu, bo tumbao̒ pilopai̒o mola odelo dewo ode Eeya.

¹⁷ Tio loloi̒ya, “Yaa Eeyaau̒, watotia diila moo̒ wilu taluhee botie! Wonu yilumo lo watotia, yi watotia debo odelo longilu duhu lotau-tauwalo tamalo pobataru nyawa limongolio!” Oditolio tei Dauda sama-samaata diila lohuto longilu taluhee boito. Ui-uitolo huhuu-tuwaalo u mopiohu lo polowila toulota tamoo-hipatea wau tamolotolo lo boli buheli daa̒ boito.

^18-19 Otolo pulu lota polowila tahi masaahurua boito ilunteelio olo “Polemboa̒ tolopulu”. Timongolio hetilau̒a lei Abisai taa waliyali lei Yoab, walae̒e Jeruya. Pee̒nta tio loo̒pate yila-yilateelo mao̒ tolo hetuto lota wolo totobui̒o. Sababu uito tio malo masaahuru. Bo tio diila debo odelo oheebati lo “Polemboa̒ Totolu”.

²⁰ Ngotaalio lo polowila uwewo tamasa-masaahuru yito tei Banaya walae̒e Yoyada taulo Kabjeeli. Tio laba-labaalo buheli. Duulota pahalaawani leidaa̒ lonto Moab mapilatelio yila-yilateelo mao̒. Pee̒enta tou̒ dulahee tuwau osalju, tio tilumuwotao̒ ode huwango tuwau, tulusi lomate yila-yilateelo mao̒ singa tuwau mota teto.

²¹ Tio pee̒enta olo lomate yila-yilateelo mao̒ ngotaalio lo Masiri, tamolotolo wau delodelo totobuo̒. Tei Benaya lotaaluo wolio bo delodelo tunggudu. Totobuo̒ u to uluu̒ taulo Masiri boito hilamalio lapatao̒ pilomakelio lomate tau boito yila-yilateelo mao̒.

²² Ui-uitolo huhuu-tuwaalo u mopiohu lei Banaya, ngotaalio lo “Polemboa̒ tolopulu”.

²³ To delomo pelomboa̒ boito tei Benayaalo tao̒ tilanggulo, bo tio diila debo odelo oheebati lo “Polemboa̒ Totolu”. Tei Dauda lomudua̒ao̒ olio lowali tau̒wa lo tamoo-kawalia batangalio lohihilao.

^24-39 Popoo-ngowaa̒alo wewo lo “Polemboa̒ tolopulu” yito: Tei Asael tawali-yali lei Yoab Tei Elhanan walae̒e Dodo taulo Betlehemu Tei Sama wolei Elika taulo Harod Tei Helesi taulo Palti Tei Ira walae̒e Ikes taulo Tekoa Tei Abiejer taulo Anatot Tei Mebunai taulo Husa Tei Salmonu taulo Ahohi Tei Maharai taulo Netopa Tei Helebi walae̒e Baana taulo Netopa Tei Itai walae̒e Ribai taulo Gibea tomadala suku Benyamin Tei Benaya taulo Piratoni Tei Hidai taiu lo luluu-mbayawalo Gaasi Tei Abialbon taulo Araba Tei Asmawet taulo Bahurim Tei Elyahba taulo Saa̒lbon Mongo walae̒e Yasyen Tei Yonatan Tei Sama taulo Harari Tei Ahiam walae̒e Sarari taulo Harari Tei Elipelet walae̒e Ahasbai taulo Maakha Tei Eliama walae̒e Ahitopel taulo Gilo Tei Hejrai taulo Karmel Tei Paerai taulo Arbi Tei Yigali walae̒e Natan taulo Joba Tei Bani taulo Gadi Tei Jeleki taulo Amon Tei Naharai taulo Bee̒roti, tamoodeloa tingolo lei Yoab Tei Ira wolei Gareb taulo Yetri Tei Uria tau lo Het. Ngoa̒amilalo jumulaalio tolo pulaa pitu lota pajule tamasa-masaahuru.