OLUO LO SAMUEL 2 - KITABI HABARI MOPIOHE

Tei Dauda piludui̒o lowali olongia to Yehuda

¹ Lapatao̒ uito tei Dauda lohintu ode Eeya, “Ambunguolo wolo Eeya mokahandaki watotia mota motolo kawasa tala tuwau lokota to Yehuda?” “Ooo̒,” tametai lo Eeya. “Kota u toonu?” yilintu lei Dauda. “Hebron,” tametai lo Eeya.

² Yi malonao̒lo tei Dauda wolo dilelio duulota: ti Ahinoam taabua lo Yijreel, wau ti Abigail janda lei Nabal yito taabua lo Karmel.

³ Odito olo tahidudua̒ olio wolo ngaalaa̒ limongolio ngota-ngota lodudua̒ wolei Dauda, lapatao̒ timongolio boito lotitatapu to Hebron wau to palitio.

⁴ Lapatao̒ tau-tauwalo Yehuda lonao̒ mai ode Hebron, wau lomudua̒ao̒ olei Dauda lowali olongia to Yehuda. Tou̒ ilodungohe lei Dauda deu̒ tau-tauwalo Yabesh to Gilead malo lobungao̒ milate lei Saul,

⁵ tio lolao utolia odito mola u lopo unggulao̒ tahuli, “Pohileaala dua̒ Eeya mobalakati mai olimongoli, sababu timongoli malo pobiloheo̒ otatapu wau olotolo hilao limongoli odeli olongia limongoli wolo lolobungao̒ milatelio.

⁶ Masababu uito, pohieaala dua̒ Eeya mopobilohei ponu wau otatapu wau olotolo hilaa-Lio olemu. Wau̒ olo mamohutu mao̒ lou̒ mopiohe sababu huhutuumu boito.

⁷ Poo̒lotola mola hilaamu wau pohutulo odelo pahalaawani ti olongiyamu memangi mailate, bo tau-tauwalo Yehuda malo udua̒a olau̒ lowali olongia limongolio.”

Tei Isyboset pilopowali olongia to Isirai̒lu

⁸ Eyaanggu suludadu lei Saul, deu̒yito-yito tei Abner walae̒e Ner, malolahi pee̒-pee̒enta wolei Isyboset walae̒e Saul, ode Mahanaim to ngotuali lo Dutulaa Yordan.

⁹ Mola teto tei Abner maa lomudua̒ao̒ olei Isyboset lowali olongia to mamaa-dalawaalo Yijreel, Epraim wau Benyamin, tumbao̒ to ngoilanggubu lo Isirai̒lu.

¹⁰ Tei Isyboset o umulu wopato pulu lotaunu tou̒ pilopowali olongia to Isirai̒lu, wau tio helo malenta dulo taunu mola hiheolio. Bo suku Yehuda debo molotolo hilao olei Dauda,

¹¹ wau tei Dauda helo malenta to Hebron to Yehuda pitu lotaunu wau ngoputu hiheolio.

Popaatea towolota lo Isirai̒lu wau Yehuda

¹² Todulahee tuwau tei Abner lomonggata lonto Mahanaim ode kota lo Gibeon, tilunuhe lo tahidudua̒ olei Isyboset.

¹³ Wau olo (tiilolio tanggulio Jeruya), wolo tahidudua̒ olei Dauda helo tidulunga mola ode kota boito. Oluo polemboa̒ bubuulemenga boito tinggai lotaalua to kulamu lo Gibeon; tei Abner wau talo tiwambao̒ olio lotihuloo̒ to wimbihia, tei Yoab wau talo tiwambao̒ olio to ngotuali wimbihiomola.

¹⁴ Lapatao̒ malo oi̒ya tei Abner odelei Yoab, “Ntali, ito mopoa̒hu mao̒ tahidudua̒ olanto mobaalia!” “Ooo̒,” tametao̒ lei Yoab.

¹⁵ Lapatao̒ malo majulo mopulaa duulota lonto suku Benyamin to tanggulo lei Isyboset, wau mopulaa duulota lo tahidudua̒ olei Dauda.

¹⁶ Timongolio ngota-ngota tinggai helo papaau̒w tohuwoo̒ wau tinggai helo ngangaamoa to ombongo baliilio, tilinggula yilateelo mola timongolio pee̒-pee̒enta. Sababu uito tambati to Gibeon boito iluntelio “Halabolu lo Wamilo”.

¹⁷ Lapatao̒ uito malo toduolo mola popaatea ulaba-labaalo, wau tei Abner wolo suludadu lo Isirai̒lu ilolaahe lo tahidudua̒ olei Dauda.

¹⁸ Tatou lota walae̒e Jeruya woluo mota teto, deu̒yito-yito tei Yoab, Abisai wolei Asael. Tei Asael tetei̒o molinggahe daa̒ debo odelo kijangi,

¹⁹ yi heilapitalio tei Abner diila ohuheliilio.

²⁰ Tei Abner loili ode wulea wau lohintu mao̒, “Yio̒olo tei Asael boito?” “Ooo̒,” tametio mao̒.

²¹ “Diila mao̒ yilapiti wau̒!” ualei Abner. “Ntali wau̒upalo talangota lomongo pajule boito wau hamaawa mao̒ tingololio!” Bo tei Asael debo tulusi hemo hilapita olio.

²² Pee̒entapo tei Abner loloi̒ya mao̒ olio, “Diila mao̒ yilapiti wau̒! De mabolo pakusa wau̒ momate olemu mate-mateelo mao̒. Oditolio, woloolo mola wau̒ moo̒ bilohe baya lei Yoab tamo huhulamu boito?”

²³ Tou̒ tei Asael debo diila mohuto mohuheli, tei Abner lolobua̒ao̒ ode wulea, wau tiluhata to ombongo lei Asael tunggula totobua̒ boito lolaapata ode wulealio. Tei Asael loombahu lomola wau yilate to tambatilo boito. Ngoa̒amila taa u lonao̒ mai ode tambati ilowombahelio boito, helo huheli teto.

²⁴ Bo tei Yoab wolei Abisai lopo tolongao̒ helo hilapita olei Abner. Tou̒ dulahee tilumolopa mota, leidungga lomola timongolio to Huludu Ama, u woluo to ambahu tiimuru lo Giah, ode mantahu huta datahu u luasi daa̒ wau delita lo Gibeon.

²⁵ Mola teto tau-tauwala lonto suku Benyamin luli lopanggala wolei Abner, lapatao̒ longaatulu baliisani limongolio to bolitutuo̒ huludu tuwau.

²⁶ Mola lonteeto malo ngiibodu tei Abner olei Yoab, “Wolo ito patutilio mopaatea ohiheo-hiheolo mao̒? Wolo yio̒ diila mongalati deu̒ popaatea botie bo moo̒ toduo mai marapo? Ami botie wutatumu ngobangusa. Ngoolo mola hiheolio poli yio̒ ohilaa mohima tou̒ diipo mopoa̒hu tahidudua̒ olemu alihu mohuheli mohilapita olami?”

²⁷ Tei Yoab lolametao̒, “Domi Allahu Taa̒ala tatumu-tumulo, humayaalio yio̒ diila lolumula lobisala, tantu tahidudua̒ olau̒ debo tulusi mohilapita olimongoli demola loombu dumodupo.”

²⁸ Lapatao̒ tei Yoab malohiipa mola torompeti odelo tuoto to tahidudua̒ olio alihu mohuheli mohilapita taulo Isirai̒lu, yi malo huhelilo mola popaatea boito.

²⁹ Tei Abner wau tahidudua̒ olio ilo-iloonua hibaalisia loli Lumbaya Yordan, tulusi lobalangao̒ Dutulaa Yordan, wau lapatao̒ lonao̒ tulusi ilo-ilolaanga wumbutio mola, malei dungga mola timongolio to Mahanaim.

³⁰ Lapatao̒ tei Yoab lohuheli helo hilapita olei Abner, tio malongambu mai ngoa̒amila tahidudua̒ olio. Ngopohia tei Asael malo patatao̒ tailooli lonto olimongolio mopulaa tio lota.

³¹ Tahidudua̒ olei Dauda maloo̒pate yila-yilateelo mao̒ tolo hetuto wolomo pulu lota pasuukani lei Abner lonto suku Benyamin.

³² Lapatao̒ uito tei Yoab wolo tahidudua̒ olio lomintaa̒a milate lei Asael wau lopo lobunga olio todelomo kuubulu lo ngaalaa̒lio to Betlehemu. Lapatao̒ timongolio lonao̒ ilo-iloonua wau leidungga mola to Hebron tou̒ molaliyonu daa̒.