OLUO LO SAMUEL 14 - KITABI HABARI MOPIOHE

Tei Yoab helo topani o wuwalingio lei Absalom

¹ Otaawa lei Yoab deu̒ ti Olongia Dauda mooloola daa̒ olei Absalom,

² sababu uito tio helei̒ lutulai ngotaalio taabua gaaga tabilu-biluloa̒ to Tekoa. Tou̒ taabua boito leidungga mai, tei Yoab loloi̒ya mao̒ olio, “Ti Ibu musi motia̒akali debo odelo tamotilimi; pomakea mao̒ pakeyangi, wau diila mao̒ pomake winulo moonu. Pohutua mao̒ debo odelo taabua tamalo hiheo hilumoyongo ilopatea lotaa u ilootohiloa.

³ Lapatao̒ ponao̒lo mota odeli olongia, poo̒taa mao̒ odito olio.” Tulusi tei Yoab helo poo̒taa olio wolo u musi polelelio.

⁴ Lapatao̒ taabua boito mota lotaalua woli olongia, wau losujudu helolubo wau loloi̒ya mao̒, “Tuani lowatotia Taa Molamahu, tulungia mai watotia!”

⁵ “O wolo?” yilintu mao̒ li olongia olio. Taabua boito lolametao̒, “Watotia botie ngotaalio lo janda tamosikini. Dile lo watotia mailate.

⁶ Watotia owalao̒ mongo lolai̒ duulota, wau tou̒ dulahee tuwau timongolio helo hahaamawa to huta datahu wau luasi. Wau sababu diaaluo taa u lomua̒a mao̒, yi ngotaalio to wolotalio ilopatealio yila-yilateelo mao̒.

⁷ Wau botia, ngoilanggubu kaumu ngaalaa̒ lo watotia malo muusua wolo watotia wau helo hinggile alihu watotia mohudu mao̒ walao̒ watotia tamalomate-yila-yilateelo mao̒ boito odeli mongolio, alihu timongolio mohukuumani olio wolo hukuumani mate, sababu tio malomate wutatio yila-yilateelo mao̒. Wonu watotia mohudu mao̒ walao̒ boito, yi mabolo watotiyalo temeitolaa tutuuwau. Timongolio mamopo aantulu halapani lo watotia bo tuwa-tuwaulo wau diila mololaa mao̒ ngotaalio lowalao̒ talolai̒ ode dile lo watotia u mohumbuta mola waliilio.”

⁸ “Pohualingolo,” tametao̒ li olongia, “de mau̒lusiyou̒ mao̒ palakala boito.”

⁹ “Tuani lowatotia Taa Molmahu,” ualo taabua boito, “penu boli wolo u mapohutuo mao̒ li Tuani lowatotia, yi watotia wau ngaalaa̒ lo watotiyalo tamaa momanta akiibatilio; ti Tuani lowatotia wau ngaalaa̒ li Tuani lowatotia diila ototala.”

¹⁰ Ti Olongia lolametao̒, “Wonu woluo taa u monganjamu olemu, delowa mai tio ode olau̒, yi wumbutio mola tantu tio diila tamomalosa olemu poli.”

¹¹ Ualo taabua boito, “Ambunguolo podua̒alo mola tuani lowatotia ode Eeya Allahu Taa̒ala li Tuani lowatotia, alihu taa u ohilaa motuli opopate lowalao̒ watotia boito diila bolo mohutu u moleeto ulebe udaa̒ mao̒ lou̒ momate yila-yilateelo mao̒ walao̒ watotia tangotaalio poli.” Tametao̒ lei Dauda, “Domi Eeya tatumu-tumulo, walau̒mu boito diila tapongolaalio penu boli ngoi̒di mao̒.”

¹² Lapatao̒ malo loi̒ya taabua boito, “Tuani lowatotia Taa Molamahu, ambunguolo polulia mai watotia muli mobisala mai ngoi̒di.” “Ooo̒,” tametao̒ li olongia.

¹³ Ualo taabua boito, “Wolo loi̒ya li Tuani lowatotia boito, ti Tuani lowatotia malongaku deu̒ ti Tuani lowatotia lohihilao ototala sababu diila mopoluasi walao̒ talolai̒ li Tuani lowatotia mohualingai monto polayahu. Yilongola ti Tuani lowatotia helohutu totala debo odelo uito to umati lo Allahu Taa̒ala?

¹⁴ Ito ngoa̒amila maamate; ito botie debo odelo taluhu u lohuwata mola ode huta wau diilalo owimoa̒. Allahu Taa̒ala olo diila tamopo tumulai poli taa u mailate; sababu uito patutilio potala ti Tuani lowatotia motolopani mao̒ alihu taa pola-polayahu muli moo̒ walingai.

¹⁵ Watotia mai lotaalua woli Tuani lowatotia sababu watotia ilaanjamu lotau. Lapatao̒ watotia helo mikiilangi mola opiohelio watotia mobisala mao̒ woli Tuani lowatotia wolo halapani hihiile lowatotia botie madungohe li Tuani lowatotia.

¹⁶ To pikiilangi mola lowatotia ti Tuani lowatotia mamo dungoheo̒ wau mopoa̒ahu watotia monto taa u hipo tolopania mamomate olo watotia wau walao̒ watotia mate-mateelo mao̒. Timongolio opatuju mopohinggi mao̒ olo mongowatotia monto huta uilohi mai lo Allahu Taa̒ala to umati-Lio.

¹⁷ Watotia yakini deu̒ danti li Tuani lowatotia boito mapo ngakuwalo u mopoa̒ahu olo watotia sababu ti Tuani lowatotia yito debo odelo malii̒ikati lo Allahu Taa̒ala, tamowali mopohiihede wolo u mopiohe wau wolo u moleeto. Pohileaala dua̒ Eeya Allahu Taa̒ala li Tuani lowatotia pee̒-pee̒enta woli Tuani lowatotia!”

¹⁸ Ti olongia lolametao̒, “Wau̒ ohilaa mohintu mai u hitua-tuawua to olemu, wau tametaalo mai lou̒ juujulu.” “Toduwolo Tuani lowatotia mobisala,” tametao̒ lotaabua boito.

¹⁹ Uali olongia mao̒, “Tei Yoab tamalo poa̒hu mai olemu?” Tametao̒ lotaabua boito, “Domi nyawa li Tuani lowatotia, watotia diila pongalo aakali mohei monto yiyintu li Tuani lowatotia. Memangi otutu Tuani lowatotia, tei Yoab malo poo̒taa mai olo watotia wolo u musi pohutuo lo watotia wau loi̒ya mao̒ lo watotia.

²⁰ Bo tio helohutu odito u mopoo̒ lapato palakala boito lou̒ mopiohu. Ti Tuani lowatotia yito molinepo debo odelo malai̒kati lo Allahu Taa̒ala tilinggula motota totoonulalo hitua-tuawua u motoduo.”

²¹ Lapatao̒ uito ti olongia lotiangai olei Yoab wau loloi̒ya mao̒ olio, “U otohilaamu boito madungoheu̒. Ponao̒lo mota molutulai olei Absalom wau delowalo mai tio odia mai.”

²² Tei Yoab malo sujudu totalu lei Dauda wau loloi̒ya mao̒, “Potala Allahu Taa̒ala mobalakati mai oli Baginda! Botia ilotaawa mao̒ lowatotia deu̒ watotia aahudu li Baginda sababu ti Baginda malo dungoheo̒ polohone lowatotia.”

²³ Lapatao̒ malo monggato tei Yoab ode Gesur mola lolutulai olei Absalom lohualingai ode Yerusalemu.

²⁴ Bo ti olongia diila longohi olei Absalom lotibiluloa̒ tobele biluloa̒ saaha li olongia. “Wau̒ diila mohuto momilohe olio,” uali olongia mao̒. Oditolio tei Absalom hua̒a lohualinga ode belelio lohihilao, wau diilalo mai lotaalua woli olongia.

Tei Absalom pilopo dameaalio wolei Dauda

²⁵ Tei Absalom hepilujilio odelo taa ulaba-labaalo gaga to ngoilanggubu lo Isirai̒lu. Diaaluo taa ulebe gaaga wolio. Monto paladu oa̒ato demola huudu huwoo̒ diila otailio.

²⁶ Huwoi̒o mohulode daa̒, wau tio hemo huntinga huwoi̒o ngotaunu pee̒enta sababu helasaalio mailaba buheetio. Huwoo̒ u hehuntingalio boito buheetio maito mao̒ lou̒ dulo kilo modudua̒ titimenga li olongia.

²⁷ Tei Absalom owalao̒ mongo lolai̒ toulota wau ngotaalio puusili tagaaga daa̒, tai̒lunte Tamar.

²⁸ Madulo taunu mola tei Absalom lotibiluloa̒ to Yerusalemu, bo tio debo diipo olo helo dunggaya woli olongia.

²⁹ Yi todulahee tuwau tio malo tiangai olei Yoab, u pilei̒ taalualio woli olongia, bo tei Yoab diila lohuto lonao̒ mai. Lapatao̒ tei Absalom luli lotiangai olio pee̒entapo, bo tei Yoab debo diila lohuto lonao̒ mai olo.

³⁰ Lapatao̒ malo loi̒ya tei Absalom ode mongo watolio, “Otaawa limongoli halabolu lei Yoab to ngotuali lo halaboluu̒ u pilomuloalio lohepu? Pobuwalo halabolu boito.” Timongolio lonao̒ olo mota lomobu mao̒.

³¹ Yi tei Yoab malonao̒ mai ode bele lei Absalom wau lohintu mao̒, “Yilongola mongo watomu helomobu halaboluu̒?”

³² Tametao̒ lei Absalom, “Sababu yio̒ diila mohuto monao̒ mai tou̒ pilei̒ tianguu̒. Wau̒ ohilaa molao olemu motaalua woli olongia wau mota mopo tunggulao̒ yiyintuu̒ botie, ‘Wolo hunalio wau̒ mololaa mao̒ Gesur wau muli mohualingai odia? Lebe mopioheo̒ wau̒ motibiluloa̒ mola teto wambao̒.’ ” Wau ualei Absalom poli, “Tolopania mao̒ alihu wau̒ moo̒ taalua woli olongia, wau wonu wau̒ donggo helantobulio ototala, yi wau̒ dapa-dapato hukuu-maniyola mate.”

³³ Lapatao̒ malonao̒ tei Yoab mota lotaalua woli Olongia Dauda wau lopo tunggulao̒ polohone lei Absalom. Lapatao̒ ti olongia lotiangao̒ olei Absalom, wau tei Absalom malonao̒ mai losujudu lomola totalu li olongia. Wau ti olongia lolutulao̒ olio tulusi lodiilao̒.