OLUO LO SAMUEL 13 - KITABI HABARI MOPIOHE

Tei Amnon woli Tamar

¹ Tei Absalom walao̒ talolai̒ lei Dauda o ngotaalio taabua tawaliyali tagaaga, tanggulio ti Tamar. Tei Amnon walao̒ talolai̒ lei Dauda lonto dilelio uwewo, ilohilao toli Tamar

² wau ohilaa motuluhe wolio. Bo uito diila pongalo aakali to olio, sababu ti Tamar diipo lonika wau diila mowali moa̒awota wolo mongo lolai̒. Tei Amnon diilalo ohuheliilio hemo mikiilangi mola sua̒li boito tilinggula pulitio mao̒ tio malo ngongoto.

³ Tei Amnon o ngotaalio sahaabati talaba-labaalo motota, tanggulio Yonadab walae̒e Simea tamohuhula lei Dauda.

⁴ Tei Yonadab loloi̒ya mao̒ odelei Amnon, “Pangeerani, yilongola timii̒du dulahu ito oontonga mao̒ malo odito suukali? O wolo?” Tametao̒ lei Amnon, “Wau̒ ilohilao toli Tamar, tawaliyali lei Absalom wutatuu̒ boito.”

⁵ Lapatao̒ ualei Yonadab olio, “Uito gambangi wambai̒o! Potibalatolo mola to tambati potuluhelo, wau potihutu mao̒ debo odelo tamo ngongoto. Wonu ti paapamu monao̒ mai momilohe olemu, polelea mao̒ olio odie, ‘Paapa, polulia mao̒ ti Tamar monao̒ mai alihu watia wohiaalio ua̒alo. Wonu watia moo̒ bilohe olio hemotubu ua̒alo boito teea, yi watia moo̒ tamelao̒.’ ”

⁶ Lapatao̒ tei Amnon malo tibalata mola to tambati potuluhelo, debo odelo tamo ngongoto. Tou̒ ti Olongia Dauda lonao̒ mai lomilohe olio, tei Amnon loloi̒ya mao̒ olio, “Paapa, polulia mao̒ ti Tamar monao̒ mai u motubu kuukisi totalu lowatia teea; de watia mamohuto molamelao̒.”

⁷ Lapatao̒ tei Dauda malolao mola tahuli odeli Tamar tobele biluloa̒ saaha li olongia, ualio mao̒, “Ponao̒lo mola ode bele lo tamo huhulamu Amnon, wau pohutui mao̒ tio ua̒alo.”

⁸ Lapatao̒ ti Tamar malonao̒ mola wau loo̒dungga olei Amnon balabalata to potuluhelio. Ti Tamar lohama mao̒ labu ngoi̒di u malolesi, tulusi totalu lei Amnon tio lopodapato kuukusi u pilanggangi.

⁹ Lapatao̒ uito yiluwalio mai kuukisi boito lonto panji wau pilohintalio mao̒. Bo tei Amnon diila lohuto lolamelo. Tio bo loloi̒ya mao̒, “Ahuli mao̒ ngoa̒amila tau lumualao̒ monteea!”

¹⁰ Lapatao̒ ngoa̒amila tau yilumualao̒ lonto huwali boito, malo loi̒ya tei Amnon odeli Tamar, “Delowa mai kukuu-siyaalo boito ode potuluheu̒, wau peengiti mai wau̒!” Ti Tamar malo dudua̒ao̒.

¹¹ Bo tou̒ ti Tamar lohudu mao̒ kukuusi boito olio, tei Amnon malodihu ului̒o boito sambela loloi̒ya mao̒, “Didiu̒, dulo motuluhe wolau̒!”

¹² “Aa, keke, kaaka!” tametao̒ lo tadulahu boito. “Diila mao̒ pukusai li kaaka watia mohutu sua̒li u hina botie! Sua̒li debo odelo uito diipo pee̒enta mao̒ helo toduo mai to Isirai̒lu.

¹³ Wonu motoduo mai uito, yi ode utoonu tuuo̒ mao̒ lowatia baya laatia? Donggo poli yio̒ olo mahinaa lotau to Isirai̒lu botie. Opiohelio bisalaamu pomao̒ woli olongia, tantu ti olongia mao̒kolo wau̒ mowali dilemu.”

¹⁴ Tei Amnon diila lohuto lodungohe, wau sababu tio lebe molotolao̒, yi pilakusaalio tawali-yaliilio boito wolo para-parangi, tulusi pilolokosaalio.

¹⁵ Bo lapatao̒ uito tei Amnon malo lonua̒ tutu oli Tamar wau olonui̒o boito lebe udaa̒ mao̒ wolo tolia̒ngio bohu-bohulio mai. Lapatao̒ tio loloi̒ya mao̒ ode tawali-yaliilio boito, “Pohinggi mao̒!”

¹⁶ Ti Tamar lolametao̒, “Aa, yilongola odito kaaka? Wonu polontulo li kaaka watia, yi ololeeto boito lebe udaa̒ mao̒ wolo sua̒li u mapilohutu li kaaka engonti!” Bo tei Amnon diila lohuto lodungohu.

¹⁷ Tio bo malo tiangai tamoomayawa batangalio tulusi loloi̒ya mao̒, “Delowalo taabua botie ode bulemengio, wau untiyalo mai huhebu!”

¹⁸ Tamoomayawa boito lodungohe palentaalio boito. Pakeyangi li Tamar yito jumba hayahaya u opolotodu lo uluu̒ hayahaya. To jaamani boito mongo puusili tadiipo lonika biasaalio hipomakea pakeyangi debo odelo uito.

¹⁹ Lapatao̒ ti Tamar lopodutu mao̒ wahu to lunggongio, helo ngaidinga jumbalio, wau lonao̒ sambela helo langgu bayalio wolo uluu̒lio duuduluo wau hiyo-hiyonga siluukali hilaalio.

²⁰ Tou̒ tei Absalom loo̒onto olio, malohintu tio, “Wolo tei Amnon engontie malo poitohe olemu? Sambelolo didiu̒, diilalo mao̒ pikilangiyamu uito. Tio yito ti kaakamu, oditolio diila mao̒ polelea penu boli olita sua̒li boito.” Lapatao̒ ti Tamar malo titiihi tobele lei Amsalom, wau siluukali daa̒ hilaalio wau bolo tutuuwau.

²¹ Ti Olongia Dauda loo̒dungohe pasali uilowali mai boito, wau tio maloingo daa̒.

²² Tei Absalom malo niyati daa̒ olei Amnon wau diilalo mohuto mobisala wolio sababu tio malo polokosa ti Tamar tawali-yaliilio.

Tei Absalom helotuli niyatilio

²³ Dulo taunu mola lapatio mao̒ tei Absalom helohutu pohuntingalo lambuto himba to Baal-Hajor, membideo̒ lokota Epraim, wau tio helo loduo ngoa̒amila walao̒ talolai̒ li olongia.

²⁴ Tio lodudulao̒ odeli Olongia Dauda wau loloi̒ya, “Paapa, watia mohutu potihunggu pohuntingalo lambuto himba. Potala ti Paapa monao̒ mai ode potihunggu boito wolo taduduulaa̒ lobele biluloa̒ saaha li olongia.”

²⁵ Bo ti olongia lolametao̒, “Keke, Walau̒uu̒, sababu wonu ami ngoa̒amila monao̒ mai yi ami mamoo̒suusa olemu.” Tei Absalom tulusi hemo huntulo, bo tiyamolio debo diila mohuto monao̒ mai. Tio bo longohi mao̒ balakati olio.

²⁶ Lapatao̒ malo loi̒ya tei Absalom, “Wonu odito poluasia mao̒ wutato laatia tei Amnon modudua̒ wolamiaatia.” Uali olongia, “Sambelolo tio moduduo̒.”

²⁷ Bo sababu tei Absalom debo hemo huntulo tulusi, pulitio mao̒ tei Dauda lopoluasi olei Amnon wau ngoa̒amila walai̒o talolai̒ uwewo lodudua̒ wolei Absalom. [Lapatao̒ tei Absalom helo pohinta mao̒ ua̒alo ulaba-labaalo dadaata.]

²⁸ Tio helo poa̒hu tomongo watolio, “Poo̒tuota mao̒ tio̒otutua, wonu tei Amnon mahiluwoa̒ sababu longilu angguru, wau̒ mamongohi mai palenta, lapatao̒ pateaalo tio mate-mateelo mao̒. Diila mao̒ oohe. De wau̒ tatihu-tihulo to sua̒li boito. Pohutuwalo lou̒ buheli, wau diila polawalo!”

²⁹ Mongo wato boito lodungohe palenta lei Absalom, tulusi timongolio helomate olei Amnon yila-yilateelo mao̒. Loo̒onto mao̒ uito yi walao̒ mongo lolai̒ lei Dauda uwewo malotitae̒ to kolodailio ngota-ngota wau tilumeteo̒.

³⁰ Tou̒ timongolio donggo to nonao̒lio hewalinga, piloo̒taa mao̒ lotau odelei Dauda deu̒, “Tei Absalom malomate yila-yilateelo mao̒ ngoa̒amila walao̒ mongo lolai̒ li Baginda – diaaluo penu boli ngotaa mao̒ tatilumumulo!”

³¹ Ti olongia tilimihulo, tulusi helo ngaidinga pakeyangilio, sababu mooloolo, wau lopo wombahe mola batangalio ode wumbato. Ngoa̒amila pogaweelio lodudua̒ helo ngaidinga pakeyangi limongolio.

³² Bo tei Yonadab walae̒e Simea tamohuhula lei Dauda loloi̒ya mao̒, “Baginda, diila polawalo wau diila mao̒ pikiilia deu̒ ngoa̒amila walao̒ mongo lolai̒ li Baginda mailate. Bo tei Amnon wambao̒ tailate, sababu malo patatai deu̒ uitolo u kilahandaki lei Absalom anggadu ti Tamar tawali yaliilio pilolokosa lei Amnon.

³³ Oditolio diila mao̒ palacai deu̒ walao̒ talolai̒ li Baginda mailate ngoa̒amila, sababu tailate bo tei Amnon wambao̒.”

³⁴ Tou̒ boito tei Absalom matilumeteo̒. Tamoodahawa bele biluloa̒ saaha li olongia Dauda loo̒onto mota dadaata tahi tuhuta mai to hui̒dee lonto ambahu Horonaim. Yi malo nao̒olo tio odeli olongia wau helo poduloheo̒ sua̒li boito.

³⁵ Lapatao̒ tei Yonadab loloi̒ya mao̒ odelei Dauda, “Uitolo walao̒ mongo lolai̒ li Baginda! Otutu debo odelo u heloi̒ya lo watotia engonti.”

³⁶ Boheli yilapato tio lobisala mao̒, matilu-muwotai walao̒ mongo lolai̒ lei Dauda ode delomo huwali leidaa̒. Timongolio boito maa hilumoyongo, wau tei Dauda wolo mongo watolio olo hilumoyonga lou̒ hiwooloola.

^37-38 Tei Absalom malo limbata mota ode bele biluloa̒ saaha li olongia lipu lo Gesur, deu̒yito-yito tei Talmai walae̒e Amihur. Tio lotibiluloa̒ mota teto ngotilonggadu tolo taunu mola. Lohiheo lotilimi tei Dauda wunu-wunulo sababu tei Amnon,

³⁹ bo lapatao̒ tei Dauda diilalo siluukali lohilao, yi tio mooloola daa̒ olei Absalom.