OLUO LO SAMUEL 12 - KITABI HABARI MOPIOHE

Tahuli lei Natan wau ololee̒e lei Dauda

¹ Lapatao̒ uito Eeya lolao oli Nabi Natan lodunggaya wolei Dauda. Tei Natan lonao̒ mota ode olio wau loloi̒ya mao̒, “Woluo taduulota tabilu-biluloa̒ todelomo ngokota; tangotaalio kaya wau tangotaalio poli mosikini.

² Taakaya o bibiahe dadaata wau ohimba,

³ hiambola tamosikini bo owalao̒ himba tuwau, u tilaliilio mai. Walao̒ himba boito tilaalalio tunggula lowali iludaa̒ mola todelomo belelio pee̒-pee̒enta wolo mongo walai̒o. Walao̒ himba boito hewohiyalo ua̒alo lonto ua̒alo lotau boito, tumbao̒ hemongilu monto manggolio, wau motuluhe too̒-too̒opu olio; limbui̒o mao̒, hepilo hutulio debo odelo walai̒o taabua lohihilao.

⁴ Tou̒ dulahee tuwau taakaya botie ilonao̒wa mai lotamu. Taakaya botie diila mohuto mongolotao̒ himba meaambo sapilio lohihilao alihu tubuwola ode tamulio. Tio bo lohama mao̒ himba lo tamosikini boito, tulusi tilubulio ode tamulio.”

^5-6 Loo̒dungohe uito tei Dauda loingo daa̒ sababu huhutu lo taakaya boito wau malo loi̒ya, “Malo diilalo omanusia taakaya boito! Domi Eeya tatumu-tumulo, tau boito musi moluloa̒ao̒ walao̒ himba boito poo̒opato piu̒wa wau tio musi hukuu-maniyola mate!”

⁷ Ualei Natan odelei Dauda, “Maa ti Bagindalo tau boito! Wau uti-utieelo u pilotahuda mai lo Eeya, Allahu Taa̒ala lo Isirai̒lu, ‘Yio̒ mapiluduu̒u-U̒ lowali olongia lo Isirai̒lu wau piloa̒ahu-U̒ lonto olei Saul.

⁸ Yilaidia lei Saul wau mongo dilelio mailudu-U̒ mai olemu, tumbao̒ yio̒ mapiluduu̒u-U̒ lowali olongia lo Isirai̒lu wau Yehuda. Humayaalio uito diipo tutuuheta, tantu mamuli wohi-U̒ mai olemu ngodaata leeto.

⁹ Yilongola yio̒ diila helo mandungi totoonulalo palentaa-U̒? Wau yilongola hepilo hutumu u moleeto boito? Tei Uria pilei̒ patemu yila-yilateelo mao̒ todelomo popaatea; hiluliyamu mao̒ tio pilatelio yila-yialteelo mao̒ lotau Amon, wau dilelio hilamamu!

¹⁰ Sababu yio̒ diila lodungohe ola-U̒ wau malohama dile lei Uria, yi todelomo timii̒du walimu wawaalia mola woluo tamate pateelio mate-mateelo mao̒.

¹¹ Wau̒ motadia mai mamopo dungga baala to olemu u dudunggaalio mai monto ngaalaa̒mu lohihilao. Wau̒ mamohama mongo dilemu totalu lomatomu lohihilao wau wohi-U̒ ode taq wewo tamamo tuluhe woli mongolio tou̒ mohulonu daa̒.

¹² Yio̒ malohutu dusa wolo poo̒-poo̒oyo, bolii̒o mao̒ Wau̒ mamopo bukuti mai aanjamu-U̒ wolo diila tohuulia totalu lo ngoilanggubu Isirai̒lu.’ ”

¹³ Lapatao̒ ualei Dauda odelei Natan, “Wau̒ mailodusa to Eeya.” Tametao̒ lei Natan, “Eeya malo ngambungu mai oli Baginda; oditolio ti Baginda diila taamate.

¹⁴ Bo sababu ti Baginda malohina to Eeya wolo huhutu boito, yi walao̒ talolai̒ li Baginda taboheli pilotutulio mai boito maamate.”

¹⁵ Lapatao̒ uito malo hualingo tei Natan ode belelio. Walao̒ talolai̒ lei Dauda tapilotutu mai li Batsyeba janda lei Uria, ilodungga lo ngongoto to kahandaki lo Eeya.

Walao̒ talolai̒ lei Dauda yilate

¹⁶ Lapatao̒ tei Dauda malodua̒ ode Eeya alihu walao̒ boito moluli. Tio helo puasa wau timii̒du hui tio helo tibalata ilo-iloonua towumbato lo huwaliilio.

¹⁷ Lapatao̒ taduduulaa̒ lobele biluloa̒ saaha li olongia lonao̒ mota ode olio wau helo malonga olio alihu timihulao̒, bo tio diila lomandungi wau diila lohuto lomelo pee̒-pee̒enta woli mongolio.

¹⁸ Ngodiminggu mola lapatio mao̒ walao̒ boito yilate, wau mongo wato lei Dauda moohe mopoo̒taa mao̒ olio. Uali mongolio, “Tou̒ walao̒ boito donggo tumutumulo ti olongia diila mohuto modungohe wonu ito mobisala mao̒ to olio. Tidiyolo mao̒ botia tou̒ walai̒o talolai̒ mailate! Diila bolo tio maneekati mopo ngongoto batangalio lohihilao!”

¹⁹ Tou̒ tei Dauda loo̒onto mongo watolio boito hipo loloohuma, malo ngalati tio deu̒ walai̒o boito mailate. Lapatao̒ malohintu tio odeli mongolio, “Wolo walao̒ boito mailate?” “Saaya, Baginda,” tametao̒ limongolio.

²⁰ Yi tilimihulao̒ tio lonto wumbato lo huwaliilio, tulusi lolihu wau loheideo̒ huwoi̒o, loluloo̒ pakeyangilio. Lapatao̒ tio mota loi̒baadati to Bele lo Eeya. Lapatao̒ uito tio luli lohualingai ode bele biluloa̒ saaha li olongia, lei̒ hinta ua̒alo ode batangalio, tulusi tio lolamelo.

²¹ Loo̒onto mao̒ uito, mongo watolio malo loi̒ya olio, “Mongowatotia diila mongalati, Baginda. Tou̒ walao̒ boito donggo tumutumulo, ti Baginda helo puasa wau lohiyongao̒ olio, bo tou̒ tio yilate mao̒, ti Baginda malobongu wau lolamelo!”

²² “Ooo̒,” tametao̒ lei Dauda, “memangi wau̒ helo puasa wau hilumoyongo tou̒ walao̒ boito donggo tumutumulo sababu to pikiilangiu̒ mola: Tanu Eeya mamomonu mai olau̒ wau mokahandaki walao̒ boito tumumulai.

²³ Bo botia, tou̒ tio mailate, wolo hunalio wau̒ debo mopuasa? Tingga mowali wau̒ muli mopo tumulai olio? De wau̒ mamonao̒ olo ode tambati ilowoluwoalio, bo botia tio diila tamo hualingai ode olau̒.”

Tei Salomo pilotutulio mai

²⁴ Lapatao̒ tei Dauda lomalongao̒ hilaa li Batsyeba dilelio, tulusi malo tuluhee wolio. Ti Batsyeba lopotutu mai walao̒ talolai̒ ngota tai̒lunte Salomo lei Dauda. Eeya momonu towalao̒ boito

²⁵ wau lopoa̒hu oli Nabi Natan longunte to walao̒ boito Yedija, sababu Eeya momonu olio.

Tei Dauda lolambata Raba

²⁶ Tou̒ boito tei Yoab donggo papaatea hemoluwali Raba tiilo lokota lipu lo Amon, wau mangopee̒ owahualio.

²⁷ Lapatao̒ tio lolao utolia odelei Dauda wau lopoduloheo̒, “Watia maloluhu Raba, wau lolambato taluhio udapa-dapato.

²⁸ Botia, potala ti Baginda mongambu mao̒ labitio lo suludadunto, lapatao̒ motitau̒wa mao̒ moluhu u mopo taa̒aluku kota boito. Lou̒ odito de diila loi̒ya lotau deu̒ watiyalo tamalo lambatao̒ kota boito.”

²⁹ Lapatao̒ tei Dauda longambu mai ngoa̒amila suludadulio, wau maloluhu Raba, tiluhulio boli ilolaahelio.

³⁰ Tei Dauda lohama makuta lonto lunggongi olongia limongolio wau pilopo pakelio lohihilao to lunggongio. Makuta boito buheetio tanu tolo pulaa limo lokilo wau pakepake polioto u gaaga daa̒. Tei Dauda olo helodelo dadaata daa̒ balangi yilambata lonto kota boito.

³¹ Wewolio leeto ulipulio dilelolio, wau hepilei̒ deloalio halahadi, popati wate, wau bulingo wate wau timongolio olo hepilei̒ kalajaalio totambati pohutuwalo botu tela. Sua̒li boito hepilo hutulio mao̒ olo to ulipu lo kokoo-tawaalo Amon uwewo. Lapatao̒ uito tei Dauda wau ngoilanggubu suludadulio luli lohualinga ode Yerusalemu.