OLUO LO SAMUEL 11 - KITABI HABARI MOPIOHE

Tei Dauda woli Batsyeba

¹ Mongo olongia biasaalio hemomaju mopaatea tosembo lapatio mao̒ sembo lohuhulo. Wau tosembo lapatio mao̒ sembo lohuhulo totaunu boito tei Dauda lopoa̒hu olei Yoab lomaju helo paatea pee̒-pee̒enta wolo mongo polowilalio wau ngoilanggubu suludadu lo Isirai̒lu; lapatao̒ timongolio lopoo̒laaheo̒ taulo Amon wau lomala kota lo Raba. Bo tei Dauda bilu-biluloa̒ to Yerusalemu.

² Tou̒ lolaangio tuwau, lapatao̒ tei Dauda lobongu mai lonto otuluhelio, tio lajelena towatopo lobele biluloa̒ saaha li olongia upaya-payade boito. Teto tio loo̒onto mota taabua ngota donggo hemolihu, wau taabua boito malo odito gaagalio.

³ Lapatao̒ tei Dauda mota lei̒ yintu mao̒ tatoonu taabua boito, wau piloo̒taalio olio deu̒ taabua boito tai̒lunte Betsyeba; tiyamolio tai̒lunte Eliama wau dilelio yito tei Uria taulo Het.

⁴ Tei Dauda lei̒ lutulai taabua boito, wau tou̒ tio leidungga mai ode bele biluloa̒ saaha li olongia, tei Dauda malo tuluhee wolio. (Ti Batsyeba boheli yilapatai lohutu upacala lopalutao̒ dilulahu). Lapatao̒ tio malo hualinga ode belelio.

⁵ Dengolo mola wakutu lapatio mao̒ ti Batsyeba maa ilombodaa̒ mai, tulusi tio lolao habari boito odelei Dauda tomimbihu sua̒li boito.

⁶ Lolamemeto tei Dauda lolao palenta odelei Yoab, ualio mao̒, “Ahuli mai tei Uria taulo Het boito monao̒ mai ode olau̒.” Yi tei Yoab malo poa̒hu olei Uria mai lodunggaya wolei Dauda.

⁷ Tou̒ tei Uria mai lotaalua woli Olongia Dauda, ti olongia helohintu mao̒ woloolo mola owowoluwoa lei Yoab wau pasuukani lo Isirai̒lu, wau olo woloolo mola dalalio lo popaatea.

⁸ Lapatao̒ tei Dauda loloi̒ya mao̒ odelei Uria, “Pohualingolo ode belemu wau pohuhelipo ngopee̒.” Lapatao̒ tei Uria lololaa mao̒ bele biluloa̒ saaha li olongia, tei Dauda malolao mota palaseni odelei Uria.

⁹ Bo tei Uria diila lohualinga ode belelio bo lotuluheo̒ totalu lohuhebu hulubangi lobele biluloa̒ saaha li olongia wolo tahi pokawalia oli olongia.

¹⁰ Sua̒li boito piloo̒taalio mao̒ odelei Dauda. Yi tio malohintu mao̒ olei Uria, “Yio̒ boheli lohualingai lonto nonao̒omu u molamingo, yilongola yio̒ diila lohualingolo ode belemu?”

¹¹ Tametao̒ lei Uria, “Suludadu lo Isirai̒lu wau Yehuda donggo hemohipate tio̒opatea wau Bulua Daantia lo Eeya pee̒-pee̒enta woli mongolio; tei Yoab eyaanggu lo mongowatotia wau mongo polowilalio hikemawa tohuta datahu wau luasi. Diila pongalo aakali watotia botie musi mohualinga ode bele wau molamela mongilu wau motuluhe wolo dile lowatotia? Domi nyawa li Baginda wau nyawa lo watotia, watotia diila tamohutu mao̒ uito!”

¹² Lapatao̒ ualei Dauda, “Sambelolo, pohuhelipo tewe todulahee botie wau de loombu dumodupo maluasiyau̒ mai yio̒ monao̒.” Oditolio tei Uria malo titolaa to Yerusalemu to dulahee boito. Todulahee wumbutio mola tio tiloduo lolamelo lei Dauda.

¹³ Yi tio malo lamelo wau tio yilohiyalio mao̒ minumani dadaata tilinggula tio hiluwoo̒. Bo tohui boito tei Uria debo diila lohualinga ode belelio, bo lotuluhe helo humbata wolo pohulotio todelomo duledehu lo tamoo-kawalia bele biluloa̒ saaha li olongia.

¹⁴ Loombu mola dulahio tei Dauda loluladeo̒ tuladu odelei Yoab, wau yilaolio mola loli olei Uria.

¹⁵ Tiluladio mola odie, “Potambatia mao̒ tei Uria topilito lo popaatea, tou̒toonu popaatea malo laba-labaalo, lapatao̒ potoulilo yio̒ wolo poo̒-poo̒oyo diila otaawalio alihu tio mate.”

¹⁶ Yi tou̒ tei Yoab donggo hemomala kota boito, tei Uria ilahulalio mota ode tambati u otaawalio mao̒ u hedahaalio tio̒opatea lomusu.

¹⁷ Tou̒ suludadu lomusu yilumualai lonto kota wau heloluhu pasuukani lei Yoab, dengolo lota polowila lei Dauda ilopatealio yila-yilateelo mao̒ leituwoto tei Uria.

¹⁸ Lapatao̒ tei Yoab malolao utolio odelei Dauda u lopoo̒taa dalalio lo popaatea boito.

¹⁹ Ahulao̒ lei Yoab ode utolia boito, “Lapatao̒ ti Baginda moo̒dungohe dudulohumu pasali lo popaatea botie,

²⁰ tanu tio mamoingo wau mohintu mai olemu, ‘Yilongola timongoli odito wimbidio wolo kota boito? Wolo diila otaawa limongoli deu̒ musu tantu mamomana monto yitaato didii-ngingaalo meeselilio?

²¹ Maa ilolipata limongoli deu̒ woloolo mola tei Abimelek walae̒e Gideon boito ilopatealio yila-yilateelo mao̒ to Tabes? Diila maatio tailate sababu taabua ngota helomai̒ lobotu hihilinga lolabu lonto yitaato dingingo meeseli to olio? Oditolio yilongola timongoli odito wembidio wolo dingingo meeseli boito?’ Wonu ti Baginda mohintu mai odito, polelea mao̒ olio, ‘tei Uria polowila li Baginda, yilate olo!’ ”

²² Lapatao̒ malonao̒ utolia boito mola lotaalua wolei Dauda wau lopoo̒taa mao̒ wolo upiloa̒hu lei Yoab olio.

²³ Utolia boito loloi̒ya mao̒, “Laawani lo mongowatotia lebe molotolao̒ wau timongolio yilumualai lonto kota heloluhu to mongowatotia tohuta datahu wau luasi. Bo wolo lotolo u diilalo o eenggadelio mongowatotia luli lohuntulao̒ olimongolio demota huhebu hulubangi lokota.

²⁴ Lapatao̒ lonto yitaato dingingo meeseli timongolio helomana to mongowatotia wau dengolo lota lonto polowila li Baginda leituwoto tei Uria mailate.”

²⁵ Yi tei Dauda malo loi̒ya ode utolia boito, “Poo̒lotola mao̒ hilaa lei Yoab wau polelea mao̒ olio alihu tio diila mao̒ okikiio̒ lohilao, sababu diila olaamalia tatoonu tamaa mate todelomo popaatea. Polelea mao̒ olio alihu tolongaalo tulusi moluhu ulebe laba-labaalo poli ode kota boito tunggula kota boito motaa̒aluku.”

²⁶ Tou̒ ti Batsyeba loo̒dungohe deu̒ dilelio mailate, yi tio malimilimi.

²⁷ Tou̒ lopalutao̒ maasa limilimi boito, tei Dauda lei̒ lutulai taabua boito ode bele biluloa̒ saaha li olongia wau tio malowali dilelio. Dengolo hula mola lapatio mao̒ tio malo potutu mai walao̒ talolai̒ ngota. Bo Eeya diila sanangi wolo huhutu lei Dauda boito.