OLUO LO SAMUEL 10 - KITABI HABARI MOPIOHE

Tei Dauda helo poo̒laaheo̒ taulo Amon wau taulo Siria

¹ Dengolo wakutu mola lapatio mao̒ tei Nahas olongia lo Amon yilate, wau tei Hanun walai̒o talolai̒ lowali olongia.

² Lapatao̒ malo loi̒ya ti Olongia Dauda, “Tei Nahas yito sahabatiu̒ tau̒ tatapu wau molotolo hilao. Oditolio wau̒ musi mosahabatia olo wolei Hanun walai̒o.” Sababu uito tei Dauda malolao utolia ode lipu Amon mola loliyango olei Hanun to opopate liyamolio.

³ Tou̒ timongolio leidungga mola to Amon, mongo tau̒wa lolipu boito loloi̒ya odeli Olongia Hanun, “Diila mao̒ pikiilia li Baginda deu̒ tei Dauda helolao mai utolialio boito sababu tio ohilaa mohurumati oliyamo li Baginda! Tumbao̒ tio helaloa tau-tauwalo boito odia mai odelo tahe tilugasia u motulete lou̒ poo̒-poo̒oyo kota botie, alihu mowali hamaalio.”

⁴ Lapatao̒ tei Hanun malo heu̒upa mongo utolia lei Dauda boito, wau helo nguluheo̒ danggu limongolio ngotuali, helo huntinga boo̒ limongolio ngotuu̒du poyonggi, wau lei̒ walinga olimongolio.

⁵ Bo timongolio mailoolito lohualingo ode lipu limongolio. Tou̒ sua̒li boito piloo̒taalio olei Dauda, yi tio malolao mola tahuli alihu mongo utolia boito motibiluloo̒lo to Yerikho tunggula danggu limongolio muli mobutu mai.

⁶ Lapatao̒ taulo Amon malo ngalati deu̒ huhutu limongolio boito heloo̒ sababu olei Dauda lomuusua woli mongolio. Sababu uito timongolio malo seuwa dulo pulu lolihu lota pajule lo Siria tahi biluloa̒wa to Bet-Rehob wau Joba, wau olo mopulaa dulolihu lota pajule lonto Tob, boli olongia lipu lo Maakha wolo ngolihu lota tahidudua̒ olio.

⁷ Tou̒ tei Dauda loo̒dungohe sua̒li boito, tio malo poa̒hu olei Yoab wolo ngoilanggubu diti lo popaatealio lomaju helo luwali musu.

⁸ Taulo Amon yilumualai̒ wau helo ngaatulu baliisani limongolio totalu huhebu hulubangi lo Raba tiilo lokota limongolio, hiambola taulo Siria, taulo Tob wau Maakha helo ngaatulu baliisani limongolio tohuta datahu wau luasi.

⁹ Tei Yoab loo̒onto mao̒ deu̒ tio mahilupeto pasuukani lomusu totalu wau to dibalaka. Sababu uito tio malo lulaotao̒ suludadu lo Isirai̒lu tahipiohe daa̒ wau helo potambati mao̒ olimongolio tinggai tataalua wolo suludadu lo Siria.

¹⁰ Lebelio lo suludadu Isirai̒lu boito yiludulio mao̒ odelei Abisai tawali-yaliilio, tahelo ngaatulu mao̒ baliisani limongolio tinggai tataalua wolo suludadu lo Amon.

¹¹ Tei Yoab loloi̒ya mao̒ ode tawali yaliilio boito, “Wonu wau̒ diilalo mambo molaahangi moluwali suludadu lo Siria, hua̒a bantui mai wau̒; lombulilio mao̒, wonu yio̒ diilalo mambo molaahangi moluwali suludadu lo Amon, wau̒ mamonao̒ mai momantu olemu.

¹² Poo̒lotolalo mola hilaamu! Dulo ito mohipate wolo buheli ode bangusanto wau ode kokoo-tawaalo Allahu Taa̒alanto. Pohileaala dua̒ Eeya mohutu mai wolo u kahandakio-Lio.”

¹³ Tei Yoab wau pasuukanilio malomaju heloluhu, tilinggula suludadu lo Siria tilumeteo̒.

¹⁴ Tou̒ taulo Amon loo̒onto suludadu lo Siria tilumeteo̒, timongolio olo malolahi lonto olei Abisai wau tilumouli mota ode delomo kota. Lapatao̒ loluhu taulo Amon, tei Yoab malo hualinga ode Yerusalemu.

¹⁵ Taulo Siria longalati mao̒ deu̒ timongolio maa ilolaahe lotau Isirai̒lu, sababu uito timongolio helo tiangai ngoilanggubu pasuukanilio alihu muli motia̒mbu mao̒.

¹⁶ Lapatao̒ ti Olongia Hadadejer helei̒ tiangai taulo Siria tawoluo to ambahu tiimuru lo Dutulaa Eperat, yi timongolio malonao̒ mai ode Helam to tau̒wa lei Sobakh, eyaanggu lo suludadu li Olongia Hadadejer lonto Joba.

¹⁷ Loo̒dungohe sua̒li boito, tei Dauda hua̒a longambu mai ngoilanggubu pasuukani lo Isirai̒lu, lapatao̒ malo balango Dutulaa Yordan, tulusi lomaju ode Helam. Mota teto taulo Siria longaatulu mao̒ baliisani limongolio lapatao̒ lomaju heloluhu pasuukani lei Dauda.

¹⁸ Bo taulo Isirai̒lu heloluhu tilinggula suludadu lo Siria tilumouli. Tei Dauda wolo pasuukanilio loo̒pate yila-yilateelo mao̒ pitu lohetuto lota tahideloa kaleta lo popaatea, wau wopato pulu lolihu lota suludadu owadala; wewolio mao̒ leeto tei Sobakh eyaanggu suludadu lomusu pilalia daa̒ tilinggula yilate todelomo popaatea.

¹⁹ Tou̒ mongo olongia tato kawasa lei Hadadejer loo̒onto mao̒ deu̒ timongolio ilolaahe lo suludadu Isirai̒lu, yi timongolio malohile lodaamea lapatao̒ lotaa̒aluku to taulo Isirai̒lu. Tumulalo mao̒ uito taulo Siria diilalo buheli helomantu taulo Amon.