OLUO LO SAMUEL 1 - KITABI HABARI MOPIOHE

Tei Dauda lololimo habari deu̒ tei Saul mailate

¹ Tou̒ tei Saul yilate mao̒, tei Dauda luli lohualingai lonto popaatea helo poo̒laaheo̒ taulo Amalek, tulusi malo tibiluloa̒ to Jiklag ngotilonggadu duuhui mola.

² Loloombulio mola, malonao̒ mai tabohulotau ngota lonto pilo tikemawa lei Saul. Odelo tuoto limilimi tio malo ngaidingo pakeyangilio wau lopodutu huta toitaato lunggongio. Tio lonao̒ mai odelei Dauda wau losujudulo mola totalulio.

³ Tei Dauda lohintu mao̒ olio, “Lonto utoonu mai yio̒?” Tametio mao̒, “Watotia loo̒lahi mai lonto pilo tikemawa taulo Isirai̒lu.”

⁴ Ualei Dauda mao̒, “Nte wunggulia mai wolo u malotoduo!” Tametao̒ lo tabohulotau boito, “Suludadu lo mongowatotia loo̒lahi lonto popaatea, wau dadaata tailate, leituwoto tei Saul wolei Yonatan.”

⁵ “Woloolo mola otaawamu?” yilintu mao̒ lei Dauda olio.

⁶ Tametio mao̒, “Letaahua daa̒ watotia woluo to Hui̒dee Gilboa, lapatao̒ loo̒onto olei Saul dene-deneela to totobui̒o, hiambola kakaa-letawaalo wau suludadu lomusu to wadala, malo himbideo̒ ohilaa momala olio.

⁷ Tei Saul maloili ode wulea, wau loo̒onto mao̒ olo watotia, tulusi watotia tiliangio, wau watotia lolametao̒, ‘Saaya, Tuani lowatotia.’

⁸ Tio helohintu tatoonu watotia, wau watotia lopoo̒taa mao̒ olio deu̒ watotia botie taulo Amalek.

⁹ Lapatao̒ ualio mao̒ ode watotia, ‘Odiaalo mai, wau pateaalo wau̒ mate-mateelo mao̒! Paliu̒ matiluhua daa̒, wau ngopee̒ mate.’

¹⁰ Yi watotia lohimbideo̒ olio, wau pilate lo watotia tio yila-yilateelo mao̒, sababu otaawa lowatotia deu̒ wonu tio modehu sababu diilalo molotolo timihulo, tantu tio debo maa mate olo. Lapatao̒ watotia malohama mao̒ makuta lonto lunggongio wau linggito lonto polootodio, wau dilelo mai lowatotia odia mai odeli Tuani lo watotia.”

¹¹ Loo̒dungohe uito tai Dauda malo ngaidinga pakeyangilio sababu siluukali, wau ngoa̒amila tahidudua̒ olio helohutu odito olo.

¹² Timongolio helo hilimuta wau lotilimi boli helopuasa ilo-ilolaanga odelei Saul wolei Yonatan, wau ode ulipu lo Isirai̒lu, umati lo Eeya, sababu mailaba daatalio tailate todelomo popaatea boito.

¹³ Lapatao̒ tei Dauda lohintu mao̒ ode tabohulotau talodelo mai habari boito, “Lonto utoonu mai asalimu?” Tametio mao̒, “Watotia botie taulo Amalek, ngotaalio lo tamonao̒wa ode utoonulalo mao̒ tolipu li Tuani lowatotia.”

¹⁴ Tei Dauda loloi̒ya mao̒, “Buheli tutu yio̒ lomate olongia tatilulaoto Eeya!”

¹⁵ Lapatao̒ tio malo tiangai tala ngota lo tahidudua̒ olio wau lopoa̒hu mao̒, “Pateaalo tio mate-mateelo mao̒!” Yi tau boito logaanjo tabohulotau boito tunggula yilate.

¹⁶ Ualei Dauda ode tabohulotau lo Amalek boito, “Yio̒ lohihilao talo podehu hukuumani mate botie to batangamu wolo longaku deu̒ yio̒ malomate yila-yilateelo mao̒ olongia tatilulaoto Eeya!”

Hilimuta lei Dauda odelei Saul wolei Yonatan

¹⁷ Lapatao̒ uito tei Dauda lopolahu mola hilimuta botie odelei Saul wolei Yonatan,

¹⁸ wau lomalentao̒ alihu lahu botie poa̒ajaliyola ode suku Yehuda. (Lahu botie leituladee todelomo Buku Yasar).

¹⁹ “Isirai̒lu, to huhuu-ludumu, teto mola lopowatelo mola pahalaawani, mongo lolai̒ lolipu, bilinaasa lomola timongolio odelo bunga lo bangusa.

²⁰ Pohileaala dua̒ tau-tauwalo Gat diila moo̒dungohe habari boito. Pohileaala dua̒ huhuu-lupiwaalo Askelon diila moo̒tapu habari pasali leeto. Diila bolo taabua lo Pilistin mongua-nguatio̒ wolo meengahu diila bolo taabua kaapiru lame motingalao̒.

²¹ Wuu huhuu-luduwalo Gilboa, dungohilo mai iiboduu̒: Diila bolo wambulo wau didi mopobata olemu! Poluliaalo mao̒ mohengu wau delita halabolu wau huta udatahu wau luasi olemu. Sababu mola teetolo leelihu wau leipomahulo molamingu totudu lohuta porisai lotaa u mailaba buheli. Wau porisai lei Saul olo tilaato, diilalo yilinulaalio.

²² Pana lei Yonatan motoheeto, moo̒pate. Wamilo lei Saul diila o tolia̒ngo momate musu mate-mateelo mao̒, mopobinasa laawani.

²³ Tei Saul wolei Yonatan, odito mopiohe hale wau tilolia̒ngo; laito mopanggala todelomo hitumula wau mate; timongolio lebe molinggahu wolo bulungi angga-angga, lebe molotolao̒ wolo singa buboto.

²⁴ Wuu, taabua lo Isirai̒lu, hilimutalo mao̒ tei Saul, sangi olongia! Talo podadai olemu wolo boo̒ meela lotaabua u ngoa̒amilalo dadaata, wau lopopake olemu wolo hulawa poliyoto ugaaga daa̒.

²⁵ Malo poowate mongo pahalaawani, loduduulahu to tambati lo popaatea wau to huhuu-luduwaalo moliilo daa̒ tei Yonatan lonu-lonuuhu, lopaahenga.

²⁶ Yonatan, wuu wutatuu̒, hilaau̒ suukali, sababu yio̒ ohalaga daa̒ olau̒. Tolia̒ngumu olau̒ laba-labaalo molamahu, tumbao̒ lebe mongilaboto tolia̒ngo lotaabua.

²⁷ Malo poowate mongo pahalaawani lobangusa. Diilalo ilohunaao tingolo limongolio!”