NEHEMIA 3 - KITABI HABARI MOPIOHE

Hepiloo̒ piohio dingingo meeseli lo Yerusalemu

¹ Uti-utieelo dudulohu tomimbihu woloolo mola dingingo meeseli lo kota Yerusalemu hepiloo̒ piohio mao̒. Ti Iimamu Daa̒ Elyasib wau mongo sahaabatilio luli lomongu mola Huhebu Hulubangi Himba, helo pohuli mao̒ duduu-ngaalo huhebulio wau lopohetu mao̒ ode Eeya. Timongolio helo poo̒pioheo̒ wau lopohetu mao̒ dingingo meeseli demola Monara Ngohetuto wau demola Monara Hananeel.

^2-16 Wewolio mao̒ lo mongo iimamu boito, tau-tauwala botie helo poo̒pioheo̒ dingingo meseeli lokota wolo huhuu-hebuwaalo hulubangi wau momoo-naraalio todelomo toyunuto debo odelo odia mola: Tau-tauwalo Yerikho, Tei Jakur walae̒e Imri Kaumu Senaa: Huhebu Hulubangi Tola wolo babaa-lakiyaalo, duduu-ngaalo huhebu, sisii-kurupuwalo wau papaa-langiyalo. Tei Meremot walae̒e Uria wau wombu lei Hakos. Tei Mesulam walae̒e Berekhya wau wombu lei Mesejabeel. Tei Jadok walae̒e Baana Ulipu lokota Tekoa (taduduulaa̒ lokota boito diila lohuto helokalaja bangganga). Tei Yoyada walae̒e Paseah wolei Mesulam walae̒e Besoja: Huhebu Hulubangi lo Yesyana wolo babaa-lakiyalo wau duduu-ngaalo huhebu, sisii-kurupuwalo wau papaa-langilio. Tei Melaca lonto Gibeon wolei Yadon lonto Meronot. Tau-tauwalo Gibeon wau tau-tauwalo Mispa: dingingo meseli demola bele biluloa̒ saaha li olongia li goboronuru Eprat Otolopa. Tei Ujiel, ngotaalio lopani lohulawa walae̒e Harhaya. Tei Hananya, ngotaalio lo tamohutua winulo moonu; demola Dingingo Meeseli Motanggalo. Tei Repaya walae̒e Hur, takawa-kawasa ngotayadu distriki lo Yerusalemu. Tei Yedaya walae̒e Harumap: dingingo meeseli u wiwiimbide wolo belelio lohihilao. Tei Hatus walae̒e Hasabneya Tei Malkia walae̒e Harim wolei Hasub walae̒e Pahat-Moab: dingingo meseeli wumbutio mola wau Monara Tihengo. Tei Salum walae̒e Halohes, takawa-kawasa ngotayadu distriki lo Yerusalemu, bilantua mao̒ lomongo walai̒o bua. Tei Hanun wau ulipu lo Janoah: Huhebu Hulubangi Lumbaya wolo duduu-ngaalo huhebu, sisii-kurupuwalo wau papaa-langilio. Wau olo dingingo meeseli ngohayao̒ wopato hetuto wopato puulo meeteri demota Huhebu Hulubangi Puputo. Tei Malkia walae̒e Rekhab, takawa-kawasa distriki lo Bet-Kerem: Huhebu Hulubangi Puputo wolo duduu-ngaalo huhebu, sisii-kurupuwalo wau papaa-langilio. Tei Salum walae̒e Kolhoje, takawa-kawasa distriki lo Mispa: Huhebu Hulubangi Mato lo Taluhu wolo watopo, duduu-ngaalo huhebu, sisii-kurupuwalo wau papaa-langilio. Wau olo dingingo meeseli lo Kulamu Selah totili lopaango bele biluloa̒ li olongia demota lilii-ntongowalo u motuhuta mola monto Kota lei Dauda. Tei Nehemia walae̒e Asbuk, takawa-kawasa ngotayadu distriki lo Bet-Jur: dingingo meeseli demola pilolobunga ngaalaa̒ lei Dauda, kulamu pilohutu wau tangsi.

Tau-tauwalo Lewi talodudua̒ helo poo̒pioheo̒ dingingo meeseli

^17-21 Dengolo tayadu dingingo meeseli wumbutio mola hebilongu lotau-tauwalo Lewi todelomo toyunuto odie: Tei Rehum walae̒e Bani Tei Hasabya, takawa-kawasa ngotayadu distriki lo Kehila. Tayadu dingingo meeseli ode distrikilio lohihilao. Tei Binui walae̒e Henadad, takawa-kawasa ngotayadu Distriki lo Kehila. Tei Ejer walae̒e Yesua, takawa-kawasa to Mispa: dingingo meeseli totutu lo dalaalo totalu lohudungu lo tingolo. Tei Barukh walae̒e Jabai: dingingo meeseli lonto tutulo dalaalo demota huhebu hulubangi bele li Iimamu Daa̒ Elyasib. Tei Meremot walae̒e Uria wau wombu lei Hakos: wimbihu dingingo meeseli lonto huhebu bele lei Elyasib demota huudu bele boito.

Mongo iimamu talo dudua̒ helo poo̒pioheo̒ dingingo meeseli

^22-26 Dengolo tayadu dingingo meeseli wumbutio mola hepiloo̒ pioheo̒ lomongo iimamu todelomo toyunuto odie mola: Mongo iimamu tahi biluloa̒wa diila molaminga monto Yerusalemu. Tei Benyamin wolei Hasub: dingingo meeseli totalu lobele limongolio. Tei Ajarya walae̒e Maaseya walae̒e Ananya: dingingo meeseli totili lobelelio. Tei Binui walae̒e Henadad: dingingo meeseli lonto bele lei Ajariah demota tutulo dingingo meeseli. Tei Palali walae̒e Ujai: dingingo meeseli lonto tutulo dingingo meeseli wau monara lobele biluloa̒ li olongia wimbihu yitaato, totili lo palepelo hepodahaalo. Tei Pedaya walae̒e Parosi: dingingo meeseli de mota totalu Huhebu Hulubangi Talahu to ambahu tiimuru wau monara hepodahaalo Bele lo Eeya. (Diila molamingo lonteeto woluo madala utanggu-tanggula Opel, tambati biluloa̒ lo tahi pokalajawa Bele lo Eeya.)

Tahi pokalajawa wewo

^27-32 Dengolo tayadu dingingo meeseli wumbutio mola hepiloo̒ pioheo̒ lotau-tauwalo botie todelomo toyunuto debo odelo odie mola: Ulipu lokota Tekoa: dingingo meeseli lonto talu lomonara hepodahaalo. Bele lo Eeya demola dingingo meeseli madala Opel. Mongo iimamu tahi biluloa̒wa totili lo Huhebu Hulubangi Wadala: dingingo meeseli u tataalua wolo bele longota-ngota lonto hulubangi boito tulusi ode ambahu tilayo. Tei Jadok walae̒e Imer: dingingo meeseli u tataalua wolo belelio. Tei Semaya walae̒e Sekhanya, tamodahawa huhebu Hulubangi Tiimuru: dingingo meeseli u tataalua wolo belelio. Tei Hananya walae̒e Selemya wolei Haruna walae̒e Jalap tao̒lomio. Tei Mesulam walae̒e Berkhya: dingingo meeseli u tataalua wolo belelio. Tei Malkia, ngotaalio pani lohulawa: dingingo meeseli demota asarama lo tahi pokalajawa Bele lo Eeya wau bebee-leyaalo mongo daahangi totalu Huhebu Hulubangi Mipkadi wau demota tili lohuali yitaato totutulo dingingo meeseli ambahu tiimuru lau. Mongo pani lohulawa wau daahangi: wimbihu dingingo meeseli u pulitio, tumulalo mao̒ monto huali yitaato totutulo dingingo meeseli demota Huhebu Hulubangi Himba.