NEHEMIA 2 - KITABI HABARI MOPIOHE

Tei Nehemia lonao̒ mola ode Yerusalemu

¹ Tou̒ dulahe tuwau, wopato hula mola lapatio mao̒, deu̒yito-yito tohulalo Nisani, tou̒ ti Olongia Artahsasta donggo hemolamelo, wau̒ lopohinta mao̒ angguru olio wolo baya wunuwunulo. Diipo pee̒enta mao̒ wau̒ oontonga wunuwunulo totalulio debo odelo todulahe boito.

² Sababu uito tio malohintu odie, “Yilongoola yio̒ oontonga odito suukali lebe-lebe pomao̒ diila mongongoto? Tantu woluo hitua-tuwaua u heloo̒ suukali olemu.” Wau̒ iloohea,

³ tulusi lolametao̒, “Pomalitutuo̒olo mola Baginda u ohiheo-hiheolo mao̒! Woloolo mola watotia diila suukali, wonu kota tambati lobake linenemoya lo watotia botia bolo tuodio wambao̒ wau huhuu-hebuwaalo hulubangilio maloaantulu yilaahu lotulu.”

⁴ Ti olongia lohintu mao̒, “Oditolio, wolo u otohilaamu?” To delomo hilaau̒ malodua̒ mola to Allahu Taa̒ala takawa-kawasa tosologa,

⁵ lapatao̒ wau̒ loloi̒ya mao̒ odeli olongia, “Wonu ti Baginda motuhutawa wau ohilaa modungoheo̒ hihiile lo watotia, laolaalo mai watotia ode huta lo Yehuda u muli momongu kota tambati pilolobunga linenemoya lo watotia.”

⁶ Lapatao̒ ti olongia tadonggo huluhuloa̒a totili li Sri Olongia Taabua, lodungoheo̒ polohoneu̒. Tio malohintu olau̒ wonu dengolo mola hiheolio wau̒ mamotitola mola teto wau omolua muli mohualingai, yi piloo̒taau̒ mao̒ olio taanggali u matilantuu̒ mao̒.

⁷ Lapatao̒ wau̒ lohile mao̒ tuladee ode mongo gubolonulu to polopinsi Eprat Otolopa, alihu timongolio mopogambangi mao̒ nonao̒ou̒ demola Yehuda.

⁸ Wewolio mao̒ leeto, wau̒ olo helohile tuladee odelei Asap, tamoo-ngimatoa oa̒ayua lo bele biluloa̒ saaha li olongia, alihu tio mopodapato mao̒ ayu ode huhebu hulubangi lo biintengi totili Bele lo Eeya, wau ode dingingo meeseli lokota wau bele u mapoti biluloa̒au̒. Ti olongia lopoo̒polu mao̒ ngoa̒amila hihiileu̒ boito, sababu Allahu Taa̒ala helo tulungi mai olau̒.

⁹ Pee̒-pee̒enta wolo mongo polowila wau suludadu owadala, u topalenta li olongia helo dudua̒a olau̒, yi malo monggato wau̒ ode Eprat Otolopa. Mola teto tuladu li olongia boito pilopo tunggulio mao̒ ode mongo gubolonulu.

¹⁰ Bo tou̒ tei Sanbalat, taulo Bet-Horon, wolei Tobia tamoleeto ngota lonto Amon, loo̒dungohe deu̒ wau̒ lonao̒ mai duo̒lo polohuna daa̒ bangusa lo Isirai̒lu, yi timongolio malowalo lole̒e daa̒.

¹¹ Wau̒ leidungga mola ode Yerusalemu, tulusi lohuheli tolo hui mola.

¹² Ngotilonggadu uito wau̒ diila helo poo̒taa mao̒ penu boli olita deu̒ Allahu Taa̒ala longohi mai ilihamu olau̒ u muli momongu mola kota Yerusalemu. Loombulio mola tou̒ huihui wau̒ lobongu tulusi helo heinga dengolo tamani lonao̒ ode bulemengo kota. Ngopohia kolodai u tilae̒yaau̒, ami diila helodelo binatangi potitae̒yaalo uwewo.

¹³ Dulahe donggo hui, tou̒ ami lololaa mao̒ kota lolibaaya Huhebu Hulubangi Lumbaya to ambahu otolopa. Ami lotidulunga mola ode ambahu hulialio, ode Huhebu Hulubangi Puputo, lolibaaya Butu lo Taluhu Naha. To delomo nonao̒ boito wau̒ lomalakisao̒ totoonulalo helorusa to dingingo meeseli lokota wau iloontongau̒ olo huhuu-hebuwalo hulubangi u mailaahu lotulu.

¹⁴ Lapatao̒ lonto wimbihu tiimuru lokota ami tulusi ode tilayo, ode Hulubangi Taluhee Pentepentelo wau Kulamu Olongia. Bo mota teto diaaluo tambati ponao̒walo ode kolodai u tilae̒ya boito, sababu tuodio mailaba daatalio.

¹⁵ Oditolio, ami lotuhuta mola ode Lumbaya Kidron wau helo potulusi nonao̒ lami tou̒ hui boito, sambela helo malakisao̒ dingingo meeseli lokota. Lapatao̒ uito ami lobale luli lohualinga ode kota lolibaaya Huhebu Hulubangi lo Lumbaya.

¹⁶ Diaaluo penu boli ngotaa mao̒ lo tahimuloa lo ulipu motota ode utoonu ponao̒wau̒, wau wolo u donggo helanjanau̒. Sababu dilumutu wakutu boito wau̒ diipo heloloi̒ya wolo-wolo ode tau-tauwalo ngobangusau̒, mopio ode mongo iimamu boli ode tahimuloa lo ulipu, meaambo ode mongo pogawee, wau tatoonu wamabi̒o tamaa modudua̒ momongu kota Yerusalemu.

¹⁷ Bo lapatao̒ wau̒ loloi̒ya mao̒ ode limongolio, “Bilohilo mao̒ owowoluwoonto u sikisikisa botie! Yerusalemu bolo tuodio wau huhuu-hebuwaalo hulubangilio malopulito yilaahu lo tulu. Dulolo ito muli momongu didii-ngingaalo meeseli lokota Yerusalemu alihu ito diilalo hinaalio.”

¹⁸ Lapatao̒ yilungguliu̒ olimongolio woloolo mola Allahu Taa̒ala helo tulungi mai olau̒ wau wolo u mailoi̒ya li olongia olau̒. Timongolio lolametao̒, “Dulo ito momongu!” Lapatao̒ molumulao̒ timongolio u lolumulao̒ lokalaja.

¹⁹ Tou̒ ranjana lami boito ilotahua lei Sanbalat, Tobia wau lei Gesyem, ngotaalio lo Arabi, yi hepilo ii̒iya limongolio wau helo sosero olami. Uali mongolio mao̒, “Wolo u mapohutuo limongoli? Wolo timongoli ohilaa momintaa̒ tingolo toli olongia?”

²⁰ Wau̒ lolametao̒, “Allahu Taa̒ala takawa-kawasa tosologa mamohutu mai kalaja lami ohaasili. Ami yito mongo wato-Lio wau ami mamolumulao̒ momongu. Bo timongoli diila ohaku meaalo penu boli miliki wolo wambai̒o to Yerusalemu. Tumbao̒ wonu tau mobisala pasali lo Yerusalemu, tanggulumu diila tau̒nte-unteelio.”