NEHEMIA 12 - KITABI HABARI MOPIOHE

Daputali lomongo iimamu wau tau-tauwalo Lewi

¹ Uti-utieelo mongo iimamu wau tau-tauwalo Lewi tahe lohualingai lonto pilolayahu pee̒-pee̒enta wolei Jerubabel walae̒e Sealtiel wau woli Iimamu Daa̒ Yesua:

^2-7 Mongo iimamu: Seraya, Yeremia, Esra, Amarya, Malukh, Hatus, Sekhanya, Rehum, Meremot, Ido, Ginetoi, Abia, Miyamin, Maaja, Bilga, Semaya, Yoyarib, Yedaya, Salu, Amok, Hilkia, wau Yedaya. Timongolio yito mongo iimami tau̒wa to jamani lei Yesua.

⁸ Tau-tauwalo Lewi: Tau̒wa lolahu syukuru: tei Yesua, Binui, Kadmiel, Serebya, Yehuda wolei Matanya.

⁹ Anggota paduani losuala u mopolahu mola lahu potuwahe: tei Bakbukya, tei Uni wau mongo sahaabatilio ngokaumu.

Wali mai li Iimamu Daa̒ Yesua

¹⁰ Uti-utieelo pilito lo walimai li Iimamu Daa̒ Yesua: tei Yesua, Yoyakhim, Elyasib, Yoyada,

¹¹ Yonatan, Yadua.

Mongo iimamu tau̒wa

^12-21 Uti-utieelo dapautari lo mongo iimamu tau̒wa wolo kaumu limongolio tou̒ tei Yoyakhim otuugasi odelo Iimamu Daa̒: Iimamu Kaumu Meraya Seraya Hananya Yeremia Mesulam Esra Yohanan Amarya Yonatan Melikhu Yusu Sebanya Adna Harim Helkai Merayot Jakaria Ido Mesulam Gineton Jikhri Abia … Minyamin Piltai Moaja Samua Bilga Yonatan Semaya Matnai Yoyarib Uji Yedaya Kalai Salai Heber Amok Hasabya Hilkia Netaneel Yedaya

Iimamu Kaumu Daputali tomimbihu ngangaa-laa̒waalo iimamu wau tau-tauwalo Lewi

²² Daputali tomimibihu mongo tau̒wa lou̒ ngaalaa̒ taulo Lewi wau ngaalaa̒ li iimamu matiluladu to jamani lomongo Iimamu Daa̒ u wumbutio mola botie: Elyasib, Yoyada, Yohanan wolei Yadua. Daputali boito yilapato tou̒ tei Dariusi helo malenta odelo olongia lo Persia.

²³ Bo tomimbihu mongo tau̒wa lou̒ ngaalaa̒ kaumu lo Lewi bo ilodaputalia demola jamani lei Yonatan wombu lei Elyasib.

Totayadu tuugasi to Bele lo Eeya

²⁴ To tau̒wa lei Hasabya, Serebya, Yesua, Binui wolei Kadmiel, tau-tauwalo Lewi hetilayadio todelomo ngopo-ngopolemboa̒. Moti motii̒du woluo dulo polemboa̒ tao̒ tuugasi momuji mola to Eeya wau mosyukuru to Eeya lou̒ tutuuwahe, tutuuu̒de wolo wuu̒du li Olongia Dauda, wato lo Allahu Taa̒ala boito.

²⁵ Tahi podahawa huhebu hulubangi Bele lo Eeya tahe tiluugasia modaha huhuu-waliyaalo potomeu̒ totili lo hulubangi Bele lo Eeya yito: tei Matanya, Bakbukya, Obaja, Mesulam, Talmon wolei Akuba.

²⁶ Timongolio boito tumutumulo to jamani lei Yoyakhim walae̒e Yesua wau wombu lei Yojadak wau to jamani li Gubolonulu Nehemia woli Iimamu Esra, ahali lo Butoo̒ boito.

Tei Nehemia helopo pidudutao̒ dingingo meeseli lo kota

²⁷ Tou̒ dingingo meeseli lo kota Yerusalemu popidudutio mao̒, tau-tauwalo Lewi hetiliangio mai lonto ngoa̒amila tambati biluloa̒ limongolio, alihu modudua̒ mopolame daa̒ polou̒tia boito wolo lalaa-huwaalo syukuru, wau wolo muusiki gaambusi wau kocapi.

²⁸ Yi malo tia̒mbu mai tahi poolahua lonto ngangaa-laa̒waalo Lewi boito, mopio lonto lipu tambati biluloa̒ limongolio totili lo Yerusalemu, meaalo lonto kokoo-tawaalo totili lo Netopa,

²⁹ lonto Bet-Gigal, Geba wau Asmawet.

³⁰ Mongo iimamu wau tau-tauwalo Lewi boito helohutu mao̒ upacara poberesiyalo batanga limongolio lapatao̒ ode ulipu, ode huhuu-hebuwaalo hulubangi wau dingingo meeseli lokota.

³¹ Hetiloduwou̒ mao̒ mongo tau̒wa lo Yehuda lobotula mola ode yitaato dingingo meeseli mola longaatulu dulo polemboa̒ daa̒ tamaa motibaarisi mohelili kota sambela mopolahu mola poloi̒laalo momuji syukuru ode Allahu Taa̒ala. Polemboa̒ ubohulio lotibaarisi toitaato dingingo meeseli, lotidulunga ode olowala, ode Hulubangi Puputo.

³² Tei Hosaya lonao̒ towulea lotahi poolahua mola, tilunuhe lo ngotayadu mongo tau̒wa taulo Yehuda.

^33-35 Mongo iimamu wumbutio mola botie helonao̒ towulea limongolio sambela hipohiipa mola toroompeti: tei Ajarya, Esra, Mesulam, Yehuda, Benyamin, Semaya wolei Yeremia. Timongolio tilunuhe lei Jakaria walae̒e Yonatan wau wombu lei Semaya. Dengolo lota lonto linenemoyalio yito: tei Matanya, Mikha, Jakur lonto kaumu Asap.

³⁶ To wulealio helonao̒ mongo pongawaa̒ lokaumulio, deu̒yito-yito: tei Semaya, Ajareel, Milalai, Gilalai, Maai, Nataneel, Yehuda wolei Hanani. Timongolio ngoa̒amila helodelo pakaa-kasiyaalo muusiki, ngorupa lou̒ hepoitohu li Olongia Dauda, wato lo Allahu Taa̒ala boito. Ti Iimamu Esra, ahali lo Butoo̒ Allahu Taa̒ala boito helonao̒ to tau̒wa lo baliisani boito.

³⁷ Tou̒ leidungga mota to Huhebu Hulubangi Taluhu Mopentelo timongolio helobale wau lobotula mola tua̒du lokota lei Dauda, loli bele biluloa̒ li olongia Dauda, tulusi lohualingo ode dingingo meeseli to Huhebu Hulubangi Taluhu to ambahu tiimuru lokota.

³⁸ Polemboa̒ lo tamoolahua u tuwau poli helo tibaarisi toitaato dingingo meeseli lotidulunga ode oloihi, wau wau̒ lodudua̒a pee̒-pee̒enta wolo ngotayadu lo ulipu. Ami lotibaarisi lolibaaya Monara Ptihengo demota Dingingo Meeseli Motanggalo.

³⁹ Lapatao̒ ami lolibaaya mao̒ Huhebu Hulubangi Epraim, Huhebu Hulubangi Dedeelo, Huhebu Hulubangi Tola, Monara Hananeeli wau Monara Mea demota Huhebu Hulubangi Himba. Baliisani lami lohuheli totili lo Huhebu Hulubangi Podahaalo totili Bele lo Eeya.

⁴⁰ Yi maleidungga mota dulo polemboa̒ tamoolahua boito totili Bele lo Eeya. Wewolio mao̒ lomongo tau̒wa todelomo polemboa̒au̒,

⁴¹ helo dudua̒ olo mongo iimamu tahe mohiipa toroompeti. Timongolio yito: Elyakhim, Maaseya, Minyamin, Mikha, Elyoe̒nai, Jakaria wolei Hananya;

⁴² towulea limongolio hinao̒wa tei Maaseya, Semaya, Eleajar, Uji, Yohanan, Malkia, Elam wolei Ejer. Tahi polahua helo polahu mola to tau̒wa lei Yijrahya.

⁴³ To dulahe boito dadaata bake u hepilodewo ode Eeya. Ulipu hiweengahe sababu Allahu Taa̒ala malohutu mai olimongolio silanangi tutu. Mongobua wau tau̒ kekeei̒ olo lodudua̒ helo potihunggu, wau suala limongolio u hiweengahe wau hisanangia ilodungohe de mola molamingo.

Dembulo u tatapu ode poi̒baadatialo to Bele lo Eeya

⁴⁴ Tou̒ boito dengolo lota tiluugasialio mao̒ helo ngimato huhuu-waliyaalo potomeu̒ tambati polahuwalo dedee-mbulowalo ode Bele lo Eeya, leituoto dewo ngotayade mopulu wau tilapulo huta u bohulio timii̒du taunu. Tahi pongimatoa boito wajibu mohimoa̒a dedee-mbulowalo boito monto hahaa-laboluwaalo topalito kokoo-tawaalo. Dedee-mbulowalo boito wuduwola ode mongo iimamu wau tau-tauwalo Lewi, lotuuu̒de wolo wuu̒du lo Butoo̒. Tau-tauwalo Yehuda helo masisi mao̒ to mongo iimamu wau tau-tauwalo Lewi boito,

⁴⁵ sababu timongoliolo tahe lohutu upacara pomantaliyalo wau uu̒u-pacarawalo wewo u mapiloa̒hu lo Allahu Taa̒ala. Tahi poolahua muusiki wau tamodahawa hulubangi Bele lo Eeya olo helohutu mao̒ tutuu-gasiyaalo limongolio, lotuuu̒de wolo wuu̒du li Olongia Dauda wolei Salomo, walai̒o lai̒.

⁴⁶ Tumulalo mai jamani li Olongia Dauda wolei Asap ahali lo muusiki, tahi poolahua maa helopolahu mola lalaa-huwaalo poloi̒laalo momuji syukuru ode Allahu Taa̒ala.

⁴⁷ To jamani lei Jerubabel wau olo tomaasa lei Nehemia, ngoilanggubu ulipu lo Isirai̒lu hemongohi dewo u helo potuuu̒deo̒ u palaluwola timii̒du dulahu lotahi poolahua wau tamodahawa hulubangi Bele lo Eeya. Ulipu helongohi mao̒ dewo tolomodu ode tau-tauwalo Lewi wau tau-tauwalo Lewi olo helongohi mao̒ ode mongo iimamu tayadu u matilantulio.