NAHUM 2 - KITABI HABARI MOPIOHE

Dudehulio lo Niniwe

¹ Wuu Niniwe, dungohilo! Tamo tohilaa mongantulu olemu malei dungga! Dahailo biintengi polaa-hangiyalo u hepo tiduo̒olamu! Imatowalo dalalo! Poti dapatolo u mopaatea. (

² Otutu, Eeya mamo ponguli odudaa̒ lo Isirai̒lu, alihu mowali debo odelo muloololio mai, tou̒ diipo yilambato lo mumuu-suulio.)

³ Porisai lomusu otumbao̒ meela, wau ngaawaa̒alio debo odelo laku loduhu. Musu malei dapato u moluhu tumahuo̒lo mola. Debo odelo tulu, wate kaletaalio molilingga. Ngoa̒amila wadalalio lantia̒ao̒-lantia̒ao̒.

⁴ To dalalo, kakaa-letawaalo momaju wolo moolato. To tanalapa, timongolio boito wawaanela. Oontonga mao̒ debo odelo morongo u hinta-hintalabu daa̒, totoolode moo̒ohuu̒ debo odelo ilato.

⁵ Mongo polowila tiliyangio lomaju; timongolio hemeemei teduo̒ tou̒ moluhu. Tame-tameo̒ timongolio motidulunga ode dingingo meeseli lokota, pakaakasi pongantulu pilopo tihulio wolo molamemeto.

⁶ Huhebu lotaluhu ngoa̒amila dutulaa maleihuo̒, yi remeelo mola daa̒ ngoilanggubu bele biluloa̒ saaha li olongia!

⁷ Ti Olongia taabua ilohaasili yilau̒upo, mongo dulahu tahi pomayaalio lopoi̒laalo suusa wau hilumoyongo wolo lapali suukali hilao, timongolio lopoi̒laalo suusa debo odelo bulungi poombo, wau helo laa̒laa̒apa duheelo sababu limilimi.

⁸ Ulipu lo Niniwe tilumetea̒ lopupuulepe, debo odelo taluhee yilumualai lonto buubulo taluhu u loloa̒ato. Woluo wuwaatia̒, “Pohuheli, pohuheli!” bo diaaluo tamohuto muli mohualingo.

⁹ Lambataalo ngoa̒amila hulawa wau talaa̒lio! Halata tokota botie otutu dadaata daa̒!

¹⁰ Niniwe malo aantulu, moliilo wau delita. Hilao diilalo o sumangati sababu moohe. Huu̒ lowali lolulupuhu wau hulu-huluhelio. Baya lotaa ngoa̒amila lowali lotambuti daa̒.

¹¹ Tou̒toonu kota boito botia? Kota udebo odelo gowa tambati potibeelea lo singa? Tambati lo mongo walao̒ singa pongohiyalo u aalo, tambati potidulunga lo singa ulai̒ wau singa bilango, tambati u aamani duo̒lo mongo walai̒o?

¹² Muloololio mai mola teto singa lodangapo mangusaalio, wau helo ngantangao̒ duo̒lo singa bilango wau walai̒o. Tio lopoo̒polu beelealio wolo pipii-tangowalo tapu ilalupio.

¹³ “Wau̒ botie musuumu,” tahuda lo Eeya Taa Laba-labaalo kawasa. “Kakaa-letaamu mapobuwo-U̒ tunggula maahu. Pajulemu maamate todelomo popaatea, wau Wau̒ mamohama totoonulalo u hitua-tuawua u mahilama-U̒ mai lonto taa wewo. Ngoa̒amila hihiile wolo moo̒ohuu̒ lomongo utoliyamu diilalo odungohe.”