MONGO HAKIMU 20 - KITABI HABARI MOPIOHE

Umati lo Isirai̒lu todelomo owowoluwoa lo popaatea

¹ Yi malonao̒ mai ngoilanggubu umati lo Isirai̒lu lonto Dan to tilayo demola Bersyeba to huliaalio, wau Gilead totiimuru, u lopoo̒polu mai titiango boito. Timongolio lotia̒mbu wau helo panggala to Mispa totalu lo Eeya.

² Ngoa̒amilalo woluo wopato hetuto lihu lota pajule lo pasuukani tolimbuta. Mongo tau̒wa lotimii̒du suku bangusa lo Isirai̒lu woluo olo mola teto.

^3-4 Tou̒ boito tau-tauwalo suku Benyamin maloo̒ dungohe deu̒ ngoa̒amila taulo Isirai̒lu uwewo malo tia̒mbu to Mispa. Yi malohintu tau-tauwalo Isirai̒lu boito ode taulo Lewi u pipiaalio mailo patealio yila-yilateelo mao̒ boito, “Nte wunggulia mai olami woloolo mola ololeeto boito yilowali!” Taulo Lewi boito lolametao̒, “Watia wolo pipia lowatia lohepitao̒ to Gibea tomadala Benyamin wau lotitihui mola teto.

⁵ Lapatao̒ tau-tauwalo Gibea lonao̒ mai tou̒ hui u mololohe olaatia. Timongolio lomala bele tambati pilo tihui̒ya laatia wolo makusudu mai momate olaatia mate-mateelo mao̒, bo lapatao̒ timongolio malo molokosa pipia lowatia tunggula yilate.

⁶ Yi watia lohama milatelio tulusi helo ngolo-ngolongao̒, lapatao̒ lolao ode mopulaa dulo suku todelomo bangusaanto tinggai ngoo̒olongo. Watia helohutu sua̒li boito sababu tau-tauwalo Gibea boito malohutu hitua-tuawua u moleeto wau moo̒olito towolota umati lo Isirai̒lu.

⁷ Timongolio ngoa̒amila tawoluo tewe yito taulo Isirai̒lu. Oditolio botia watia mei̒ tiimbangi mao̒ olmongoli!”

⁸ Lou̒ pee̒entalo mao̒ tau-tauwalo tahia̒mbua to tambati boito tilimihila mola wau loloi̒ya, “Ito ngoa̒amila diaaluo mao̒ tamo hualinga ode kema meaambo ode bele.

⁹ Uti-utieelo u mapo hutuonto mao̒: Ito mamo mahuta u molantu mao̒ tau-tauwalo tamoluhu Gibea.

¹⁰ Ngotayade mopulu monto ngoa̒amila mongo lolai̒ lo Isirai̒lu musi mopohetu mao̒ ua̒alo ode limongolio tamopaatea. Tawewo mola moluhu Gibea u mohukuumani olimongolio, sababu ololeeto u mapilohutu limongolio towolota umati lo Isirai̒lu.”

¹¹ Odi-odieelo mola umati lo Isirai̒lu helo heeluma mola loluhu Gibea.

¹² Lapatao̒ umati lo Isirai̒lu helolao totau-tauwala ode ngoilanggubu madala losuku Benyamin u lopo tunggulao̒ habari botie: “Ololeeto wolo ulotoduo mai olimongoli?

¹³ Wudua mai tau-tauwalo tahileeta lonto Gibea boito alihu popaatea lami timongolio mate-mateelo mao̒ wau lou̒ odito ami mopoo̒ pulitao̒ ololeeto boito tohuungo taulo Isirai̒lu.” Bo taulo Benyamin diila helo mandungi loi̒ya lotau-tauwalo Isirai̒lu uwewolio boito.

¹⁴ Tumbao̒ lonto ngoa̒amila kota tomadala Benyamin boito tau-tauwalo Benyamin lonao̒ mai ode Gibea wau heloluhu totau-tauwalo Isirai̒lu wewolio.

^15-16 Todulahee boito timongolio helongambu lonto kokoo-tawaalo limongolio ngodaata dulo pulaa wolomo lihu lota pajule. Wau wewolio mao̒ leeto poli ulipu lo Gibea lohihilao olo helongambu pitu lohetuto lota tai̒lo tulaota. Ngoa̒amilalo taa ahingo tahi ahaalia todelomo momai̒ lobotu wolo tali. Wonu timongolio momai̒ lobotu wolo tali, diila pee̒enta mao̒ tala penu boli ngoi̒di.

¹⁷ Towimbihu tau-tauwalo Isirai̒lu wewolio malei aambu ngujumula wopato hetuto lihu lota pajule tamoolato.

Popaatea helo luwali tau lei Benyamin

¹⁸ Suludadu umati lo Isirai̒lu boito lonao̒ mola ode tambati potabiyalo to Betel, wau helohintu ode Allahu Taa̒ala, “Yaa Eeya, ambunguolo suku toonu towolota lo mongowatotia tamusi bohu-bohulio mola moluhu tau lei Benyamin?” Eeya lotahuda mai, “Suku Yehuda.”

¹⁹ Loombu mola dimodupio malo monggato timongolio loluhu wau lotikema totili lokota Gibea.

²⁰ Timongolio helo potambati mao̒ baliisani lo popaatea limongolio tataalua wolo kota boito, lapatao̒ loluhu.

²¹ Yi ditilo popaatea lei Benyamin yilumualai loluhu poli wau helomate yila-yilateelo mao̒ dulo pulaa dulo lihu lota suludadu lo Isirai̒lu to dulahulo boito.

^22-23 Sababu ololaahe boito, malonao̒ umati lo Isirai̒lu ode tambati potabiyalo tulusi hilumoyonga to Eeya mola teto demola hui. Timongolio malohintu, “Yaa Eeya, ambunguolo wolo mongowatotia mamusi muli monao̒ moluhu mongo wutato lo mongowatotia tau-tauwalo Benyamin boito?” Eeya lotahuda mai, “Ooo̒, ponao̒lo.” Masababu uito ditilo popaatea lo Isirai̒lu luli lowali ilosumangati mai, tilinggula timongolio luli longaturu pasuukani debo odelo todulahee bohulio.

²⁴ U oluolio timongolio lonao̒ mota loluhu diti lo popaatea lei Benyamin boito.

²⁵ Wau u oluolio olo tau-tauwalo lei Benyamin boito yilumualai loluhu. Pee̒enta botie timongolio heloo̒pate yila-yilateelo mao̒ mopulaa walu lolihu lota mongo pajule tamoolato lonto ditilo popaatea lo Isirai̒lu.

²⁶ Yi luli lonao̒ mola poli umati lo Isirai̒lu ode Betel wau hilumoyongo to Eeya. Mola teto timongolio helopuasa ilo-ilolaanga wau lopodewo bake lo polodame wau bake yilalango ode Eeya.

^27-28 Tou̒ boito Bulua Daantia lo Allahu Taa̒ala woluo to Betel, wau tei Pinehas walae̒e Eleajar, wombu lei Haruna otuugasi odelo iimamu. Yi malohintu umati lo Isirai̒lu ode Eeya, “Yaa Eeya, ambunguolo wolo mongowatotia mamusi muli monao̒ mola moluhu mongo wutato lo mongowatotia tau-tauwalo lei Banyamin boito, meaambo wajibulio mongowatotia mopohuheli mao̒ popaatea botie?” Eeya lotahuda mai, “Tuhuwalo timongolio! Loombu Wau̒ mamongohi mai u moo̒haama toli mongoli.”

²⁹ Loo̒dungohe tahuda lo Eeya boito, tau-tauwalo Isirai̒lu lopo tambati suludadu limongolio to tataa-mbatiyalo u hetuua̒ topalito lo Gibea.

³⁰ Lapatao̒ todulahee u otolulio timongolio loluhu diti lo popaatea lei Benyamin wolo toyunuto pasuukani u talutalu ode Gibea debo odelo u mapilohutu limongolio todulahee u dipo-dipolulio mai.

³¹ Tau-tauwalo lei Benyamin heloluhu olo, wau ilopaala u lumualai lonto kota. Debo odelo uilalu mao̒, timongolio helomate yila-yilateelo mao̒ totau-tauwalo Isirai̒lu tolipu u huo̒huo̒ to bulemengo kota todalalo udulu-dulunga ode Betel wau todalalo udulu-dulunga ode Gibea. Tolo pulu lota taulo Isirai̒lu tai̒lo patealio yila-yilateelo mao̒.

³² Sababu utio tau-tauwalo lei Benyamin helo lantobu deu̒ timongolio ma lo poo̒laaheo̒ totau-tauwalo Isirai̒lu boito poli debo odelo ubohulio mai. Bo suludadu lo Isirai̒lu malo lanjana u tumouli alihu timongolio moo̒ paalao̒ suludadu lei Benyamin ode dadaa-lalaala daa̒, molamingao̒ monto kota.

³³ Tou̒ bungo lopasuukani lo Isirai̒lu tilumouli, wau luli longaturu baliisani to Baal-Tamar, yi tau-tauwalo limongolio tapilopo tambatilio topalito Gibea, hua̒a yilumualai lonto tataa-mbatiyalo upilo tituua̒ limongolio tomadala bulemengo kota.

³⁴ Timongolio boito tau-tauwalo tahe tilulaoto lonto ngoilanggubu Isirai̒lu; jumulaalio mopulu lolihu lota. Malo toduwolo mola polotuhua ulaba-labaalo tou̒ tamopulu lolihu lota boito heloluhu Gibea. Tau-tauwalo lei Benyamin sama-samaata diila molantobu deu̒ timongolio diilalo mohiheo mao̒laahelio.

³⁵ Eeya longohi ode taulo Isirai̒lu loo̒haama totau lei Benyamin, tilinggula todulahee boito taulo Isirai̒lu helomate yila-yilateelo mao̒ dulo pulaa limo lolihu ngohetuto lota suludadu lei Benyamin.

³⁶ Deu̒ito tau lei Benyamin helongalati mao̒ deu̒ timongolio maa ilolaahelio. Bungo pasuukani lo Isirai̒lu wolo sangaja malo polahi batanga lonto tau-tauwalo lei Benyamin sababu timongolio hemohudu opopalacaya to tahidudua olimongolio to tataa-mbatiyalo hepo tituua̒lo topalito lo Gibea.

Polo malakisa u mou̒lintapo heloo̒ sababu taulo Isirai̒lu loo̒haama

³⁷ Tau-tauwalo tahituua̒ boito lingga-linggahu tilumuwota heloluhu Gibea; timongolio lololadulo mola ode utoonulalo mao̒ todelomo kota wau helomate yila-yilateelo mao̒ ngoa̒amila taa teto.

³⁸ Bo timongolio malo heeluma leimulo deu̒ wonu woluo poloa̒a mohulodu mohubulaa mola ode yitaato monto hungo kota,

³⁹ yi bungo lo pasuukani tatumouli boito musi muli mobale wau moluhu musu. Tou̒ boito tau-tauwalo lei Benyamin malomate yila-yilateelo mao̒ tolopulu lota suludadu lo Isirai̒lu wau helo lantobe deu̒ timongolio maluli loo̒haama totau-tauwalo Isirai̒lu debo odelo ubohulio mai.

⁴⁰ Bo debolo poloo̒ malo hubula mola ode yitaato lonto hungo kota lo Gibea. Tau-tauwalo lei Benyamin iloohea tou̒ timongolio loili wau loo̒onto ngoilanggubu kota limongolio lopobu.

⁴¹ Wau tosaaa̒tilo boito bungo pasuukani lo Isirai̒lu luli loluhu, tilinggula suludadu lei Benyamin boito mailoohe sababu to pongolaasa limongolio deu̒ timongolio tantu maa olaahelio.

⁴² Oditolio, timongolio tilumetea̒ lonto tau-tauwalo Isirai̒lu lotidulungo ode madala lohuta datahu u luasi daa̒ wau delita, bo timongolio diila loo̒teteo̒. Timongolio ilobalaalio towolota bungo pasuukani lo Isirai̒lu wau pasuukani tatou̒ boito donggo hinao̒a mai lonto mantahu lo kota. Tau lei Benyamin helo dutolaa ilolaahelio lou̒ laba-labaalo.

⁴³ Tau-tauwalo Isirai̒lu lomala wau helo hilapita olimongolio diila ohuheliilio demola tambati tuwau to ambahu tiimuru lo Gibea. Sambela hemo hilapita, timongolio helomate yila-yilateelo mao̒

⁴⁴ mopulaa walu lolihu lota pajule tamoolato lonto diti lo popaatea lei Benyamin.

⁴⁵ Suludadu lei Benyamin wewolio luli lohualingo lapatao̒ tilumetea̒ yilumaodeo̒ tomadala lo huta datahu u luasi daa̒ wau delita lotidulunga ode huhuu-iduwaalo lobotu to Rimon. Limo lolihu lota towolota limongolio hepilate limongolio yila-yilateelo mao̒ tohuungo dalalo. Tawewolio yililapita tulusi demola Gideom. Lonto tau-tauwala boito woluo dulo lihu lota tahe pilatelio yila-yilateelo mao̒.

⁴⁶ Oditolio, suludadu lei Benyamin tahe pilatelio yila-yilateelo mao̒ todulahee boito woluo dulo pulaa limo lolihu lota – ngoa̒amilalo pajule tahi gaagawa boli buheli.

⁴⁷ Bo towolota limongolio taloo̒ teteo̒ lolibaya madala huta datahu u luasi daa̒ wau delita lotidulungo ode huhuu-iduwaalo lobotu to Rimon woluo wolomo hetuto lota taloo̒lahi. Timongolio lotibiluloa̒ to Rimon wopato hula mola hiheolio.

⁴⁸ Lapatao̒ taulo Isirai̒lu luli lohualingai poli loluhu wau helomate yila-yilateelo mao̒ ngoa̒amila labitio lotau-tauwala lei Benyamin – mongo lolai̒, mongobua, tau̒kekeei̒ wau bibiahe olo. Ngoa̒amila kota tomadala boito hetilumbila limongolio.