MONGO HAKIMU 2 - KITABI HABARI MOPIOHE

Malai̒kati lo Eeya to Bokhim

¹ Malai̒kati lo Eeya lonao̒ lonto Gilgal ode Bokhimi wau lotahuda mao̒ ode tau-tauwalo Isirai̒lu, “Wau̒ malo polualai olimongoli lonto Masiri, wau lodelo olimongoli ode lipu u mapilo danti-U̒ odeli nenemoya limongoli. Matilahuda-U̒ mai olo, ‘Buuhuta danti towolota-U̒ woli mongoli diila tabuntoo-U̒.

² Sababu uito timongoli diila mowali mohutu mao̒ buuhuta u hitua-tuawua wolo tuango lipu botie. Memees-bawaalo limongolio musi lolohubua mao̒ limongoli.’ Bo timongoli diila helohutu wolo u mapilo malentaa-U̒ mai boito. Tumbao̒ timongoli malohutu u boboolia̒!

³ Oditolio, botia dungohi mai! Wau̒ diila tamo polahi totau-tauwalo lipu botie wonu bolo timongoli motuuhua woli mongolio. Timongolio mamowali mumuu-suuwaalo limongoli, wau timongoli maa ohentobe, tilinggula timongoli modudua̒ molubo dedeewaalo limongolio.”

⁴ Lapatao̒ malai̒kati boito yilapato lopo tunggulao̒ habari boito, ngoilanggubu bangusa lo Isirai̒lu hilumoyongo moo̒ohuu̒.

⁵ Uito sababuulio tambati boito ilunte Bokhim. Lapatao̒ totambati boito tau-tauwalo Isirai̒lu helo podewo bake ode Eeya.

Opopate lei Yosua

⁶ Lapatao̒ tei Yosua lolopato tau-tauwalo Isirai̒lu lonao̒, timongolio olo lomonggato mota lotihuloa̒a tohuta ulowali tayadi mongolio ngota-ngota.

⁷ Ngotilonggadu tei Yosua tumutumulo, taulo Isirai̒lu hemotiwato to Eeya. Lapatao̒ tou̒ tei Yosua yilate mao̒ olo timongolio debo hemotiwato to Eeya ngotilonggadu timongolio hetilau̒wa lotau-tauwalo tamalo oonto lohihilao totoonulalo umoo̒ linggolabe upilohutu mai lo Eeya ode taulo Isirai̒lu.

⁸ Tei Yosua walae̒e Nun – wato lo Eeya boito – yilate to umulu ngohetuto mopulu lotaunu.

⁹ Tio yilobungio tohuta milikiilio lohihilao, deu̒yito-yito to Timnat-Serah tomadala hihui̒-hui̒dea lo Epraim to ambahu tilayo lo hui̒dee Gaas.

¹⁰ Lapatao̒ ngoilanggubu hilaide boito yilate olo. Wau generasi tawumbutio mola diila motota to Eeya, sababu timongolio diila heloo̒ laasa wolo u mapilohutu mai lo Eeya ode bangusa lo Isirai̒lu.

Isirai̒lu diilalo helolubo to Eeya

^11-14 Lapatao̒ taulo Isirai̒lu mai̒lodusa to Eeya. Timongolio diilalo helolubo to Eeya, Allahu Taa̒ala linenemoya limongolio, deu̒yito-yito Allahu Taa̒ala tamalodelo olimongolio yilumualao̒ lonto Masiri. Timongolio lolumula helolubo Baal wau Asytoret boli dedeewaalo u hetuboo lo babaa-ngusawalo topalito limongolio. Yi Eeya lomuluka olimongolio wau helo poluli mao̒ polemboa̒ loluhu wau lolambata olimongolio. Timongolio diilalo okawasa helo taalua wolo mumuu-suuwaalo topalito limongolio.

¹⁵ Timii̒du timongolio monao̒ motuuhua Eeya hemoluwali olimongolio, debo odelo u mapilo eelaa-Lio olimongolio. Yi timongolio hei̒lo dungga lou̒ suukali ulaba-labaalo.

¹⁶ Wuwuulia Eeya longohi mao̒ ode limongolio tau̒wa tahelo hipate u molopata olimongolio monto polemboa̒ tamoo-lambata.

¹⁷ Bo timongolio diila helo mandungi tomongo tau̒wa boito. Timongolio hipo lubowa ila-ila wewo, wau diila tatapu wau molotolo hilao to Eeya. Timongolio diila heloo̒ baaya toli nenemoya limongolio tamo dungohe papaa-lentawaalo Eeya.

¹⁸ Wonu bolo Eeya mongohi mai tau̒wa ngota ode bangusa lo Isirai̒lu, Eeya laito hemo tulungi mao̒ tau̒wa boito. Wau ngotilonggadu tau̒wa boito donggo tumutumulo, Eeya laito hemo lopata olimongolio monto mumuu-suuwaalo limongolio. Tio momonu olimongolio wonu bolo odungohe-Lio timongolio hiwuwaatia̒ longongoto sababu alinaya wau hedeehelio.

¹⁹ Bo wonu bolo tau̒wa boito mailate, bangusa boito owatade lebe moleetao̒ wolo hilaide tadipo-dipolulio mai. Timongolio hemotiwato to ila-ila wewo wau molubo ila-ila boito. Timongolio hemonguli to obobiasa limongolio u moleeto wau diila mohuto molomelo watade limongolio.

²⁰ Sababu uito Eeya luluka daa̒ to umati lo Isirai̒lu, wau lotahuda, “Wau̒ malo malentao̒ oli nenemoya lobangusa botie alihu modihu mao̒ daantia towolota-U̒ woli mongolio. Bo bangusa botie lomunto buuhuta danti boito; timongolio helo lambanga palentaa-U̒.

²¹ Botia Wau̒ diilalo mohuto mopolahi penu boli bangusa toonu tadonggo woluo tolipu botie tou̒ tei Yosua mate mao̒.

²² Wau̒ mamopohuna babaa-ngusawalo boito u motesi bangusa lo Isirai̒lu, alihu otaawa-U̒ wolo umati lo Isirai̒lu mohuto modudua̒ palentaa-U̒ debo odelo tinene moya limongolio, meealo diila.”

²³ Uitolo sababuulio Eeya diila helo poo̒haama olei Yosua to babaa-ngusawalo boito. Bolii̒o mao̒ Eeya helo poluli olimongolio lotibiluloa̒ tolipu boito, wau diila hua̒a lopolahi olimongolio.