JAKARIA 3 - KITABI HABARI MOPIOHE

Bibilohe pasali li Iimamu Daa̒

¹ Todelomo bibilohe uwewo poli, Eeya lopobilohei olaatia ti Iimamu Daa̒ Yosua donggo tihutihula totalu malai̒kati lo Eeya. To ambahu olei Yosua, tihutihula ibilisi umalei dapato u mopotulude olio.

² Malai̒kati lo Eeya loloi̒ya ode Ibilisi, ualio mao̒, “Pohileaala dua̒ Eeya mohukuumani mai olemu wuu Ibilisi! Pohileaala dua̒ Eeya tamomonu Yerusalemu mohukuumani mai olemu. Tau botie debo odelo punggulo ayu u bilantangai lonto lei̒to tulu.”

³ Tei Yosua tihutihula teto pakepake pakeyangi u mokootolo daa̒.

⁴ Yi malo loi̒ya malai̒kati boito ode tahi pomantua tosologa, “Tapilaalo pakeyangi kootolo u pilomake lotau botie.” Wau odelei Yosua tio loloi̒ya mao̒, “Dusaamu matilapiu̒, yio̒ mawohiya-U̒ pakeyangi u bohu.”

⁵ Tio olo lomalentao̒ tahi pomantua olio u mopopake mao̒ sulubani ubelesi to lunggongee Yosua. Timongolio lodudua̒ wau lapatao̒ uito timongolio lopopake mao̒ pakeyangi u bohu boito to olio wolo ilomatoa lo malai̒kati lo Eeya.

⁶ Lapatao̒ malai̒kati boito lopo tunggulao̒ tahuda lo Eeya odelei Yosua,

⁷ “Wonu yio̒ modungoheo̒ bubuu-too̒o-U̒ wau mohutu tutuu-gasiyaalo uilohi-U̒ mai olemu, yi u mololaalaaita yio̒ mowali mali tau̒wa todelomo Belee-U̒ wau monguulusi palepelio. Wau̒ mamo dungohe duduua̒amu, debo odelo modungohe dua̒ lomongo malai̒kati tawoluo totilii-U̒.

⁸ Dungohilo wuu Iimamu Daa̒ Yosua, olo timongoli mongo iimamu talowali mongo sahabatilio, timongoli ngoa̒amila yito bayahu monto dulahee momooli u mopiohe. To maasa boito Wau̒ mamolao mai wato-U̒ tai̒lunte ‘Sangi Tumbingo’.

⁹ Podutuwo-U̒ totalu lei Yosua botu tuwau tutulio pitu u mapaisakaa-U̒ wolo tutuu-ladeyalo. To delomo tou̒ ngohui mola matapilo-U̒ dusa monto lipu botie.

¹⁰ Wonubolo dulahee boito meidungga, timiidu tau mamoloduo tiheedio u monao̒ mai wau moo̒laasa dame wau beebasi monto totoonulalo usuukali wau baala tohuungo ii̒i-lengiyalo angguru wau bubuu-ngowaalo aramu.”