JABURU 88 - KITABI HABARI MOPIOHE

Dua̒ mei̒ tuulungi

¹ Lahu. Jaburu lokaumu Korah. Duo̒lo diriheni lopolemboa̒ tamoolahua. Lodudua̒a lahu: Mahalat Leanot. Lahu pongaajali lei Hemani, taulo Ejrah.

² Yaa Eeyau̒, Allahu Taa̒ala talo poa̒ahu olo watotia, tou̒ dulahu watotia hemo ngiibode mola to Eeya, tou̒ hui watotia hemotitalu mola ode Eeya.

³ Bolo potala dua̒ lowatotia tunggula mola ode Eeya, dungohilo mai iibodu lowatotia.

⁴ Watotia ilodungga lou̒suusa dadaata; mautu maatokoosengi lohuhebu.

⁵ Watia debo odelo taa umamo tuhuta mola ode huango kuubulu, taa u i̒lopulita lo lotolo.

⁶ Watia tilolaalio towolota lotaa yilate, debo odelo tai̒lo patealio yila-yilateelo mao̒, balabalaata to delomo kuubulu, debo odelo taa u yilipato lo Eeya sama-samaata, taa u diilalo tilulungia mai lo Eeya.

⁷ Eeya lopomahula olaatia ode huango u modelomo, ode huango kuubulu u modelomo wau modio̒lomo.

⁸ Omuluka lo Eeya lodutonga olaatia wolo mobuheeto, watia loa̒antulu ilodeehe muluka lo Eeya.

⁹ Pilopo halahu lo Eeya totoonulalo tamoo̒taawa wolo watotia monto olo watotia, wau pilohutu lo Eeya watotia heiloonui̒ mongolio. Watotia leiu̒lungo diilalo loo̒olualo,

¹⁰ mato lowatotia malowali pilulau sababu lodutolo. Timii̒du dulahu watotia hemo ngiibode mola to Eeya, yaa Eeya, wau hemodua̒ wolo helohudu mola uluu̒.

¹¹ Wolo Eeya mohutu mai moo̒linggolabe ode taa mate? wolo timongolio mobongu mai wau momuji to Eeya?

¹² Wolo ponu lo Eeya pololadulo todelomo kuubulu, wau otatapu boli olootolo hilao lo Eeya to tambati lo obobinasa?

¹³ Tingga woluo tamotota u moo̒linggolabe lo Eeya todelomo u modio̒lomo, meaambo opopiohu lo Eeya tolipu tambati lotaa yilipato?

¹⁴ Bo watotia, mei̒ tuulungi mai to Eeya, yaa Eeya, timii̒du dimodupo watotia hemodua̒ mola to Eeya.

¹⁵ Yaa Eeya, yilongola Eeya diila mololimo olo watotia? Yilongola Eeya lopo malingao̒ baya lo Eeya lonto watotia?

¹⁶ Tumulalo donggo u kikiia̒i watotia helo dutolo wau hewahula lomautu, watotia bolo inti-intilo helomanta hukuumani lo Eeya.

¹⁷ Omuluka lo Eeya u moo̒tihela hapato helo ngantulu olo watotia; pololuhu lo Eeya upolu-polutuo̒ helo pobinasa olo watotia.

¹⁸ Ngotupa lodulahu muluka lo Eeya debo odelo taluhee daa̒ helo malita olo watotia, helomala olo watotia monto totoonulalo mantahu.

¹⁹ Mongo sahabati lowatotia pilopo halahu lo Eeya lonto watotia, wau bolo u modio̒lomo helo sahabatia wolo watotia.