JABURU 83 - KITABI HABARI MOPIOHE

Dua̒ mei tuulungi u moluwali musu

¹ Jaburu lei Asap: lahu tuwau.

² Yaa Allahu Taa̒ala, diila mao̒ potipoo̒yo, diila mao̒ potitopole lo uluu̒ wau bolo poo̒poo̒oyo.

³ Bilohilo mai, musu lo Eeya diila moduo̒to, tau-tauwalo tamolonuo̒ to Eeya helo malakala.

⁴ Timongolio helohutu ranjana wolo dadaata aakali u mobu̒lilo moluwali umati lo Eeya; wau loheeluma moluwali tau-tauwalo tahe diluo̒la lo Eeya.

⁵ Uali mongolio, “Dulo antuluonto bangusa lo Isirai̒lu, alihu tangguli mongolio diilalo oe̒ela.”

⁶ Babaa-ngusawalo malo panggala, wau loheeluma moluwali to Eeya:

⁷ bangusa lo Edom wau Ismai̒la, tau-tauwalo Moab wau Hagar;

⁸ bangusa lo Gebal, Amon wau Amalek, bangusa Pilitea boli ulipu lo Tirus.

⁹ Wau olo Asyuru malo panggala woli mongolio, taa ulowali aalati lotaa wewo u momantu wali mai lei Lot.

¹⁰ Pohutuwalo timongolio debo odelo taulo Midian, debo odelo olei Sisera wolei Yabin to Dutulaa Kisyon,

¹¹ tamaa pilopo binasa to Endor, wau lowali pomolo miyodu pilomulo piloduhengo ode huta.

¹² Pohutuwalo tau̒wa limongolio debo odelo tei Horeb wolei Jeeb, potaa̒alukua mao̒ takaawasa limongolio debo delo tei Jebah wolei Salmuna,

¹³ sababu timongolio maloloi̒ya, “Dulo huloa̒anto huta piloti biluloa̒ lo Allahu Taa̒ala.”

¹⁴ Yaa Allahu Taa̒ala, pomua̒yadelo timongolio debo odelo peaahuo̒, debo odelo laato u hiliipa lodupoto.

¹⁵ Debo odelo tulu helomobu oa̒ayua, lei̒to tulu u heloo̒pobu huhuu-i̒deyaalo.

¹⁶ Yilapitalo timongolio wolo dutalo Eeya, poo̒ohealo mai timongolio wolo dupoto huloyongo Eeya.

¹⁷ Yaa Eeya, huliilo mao̒ timongolio hinaalio, alihu timongolio momasisi okokawasa lo Eeya.

¹⁸ Huliilo mao̒ timongolio ohiheolo mao̒ poo̒olitolo wau duiduito, huliilo mao̒ timongolio mate todelomo hihiina.

¹⁹ Pohileaala dua̒ otaawa limongolio bo Eeyaalo Taa Laba-labaalo molanggato, Eeya, tamongawasa ngoilanggubu dunia.