JABURU 78 - KITABI HABARI MOPIOHE

Allahu Taa̒ala wau umati-Lio

¹ Lahu pongaajali lei Asap. Dungohilo mai pongaajali lowatia, wuu bangusa lowatia, poo̒tuotilo loi̒ya lowatia.

² Watia ohilaa molapalai aayua wau pohumaya, wau motombangai toka-toki jamani muloololio mai,

³ susuu-aliyaalo u ilodungohe lamiaatia wau tilolimo lamiaatia, u yilungguli mai linene moya lamiaatia.

⁴ Amiaatia diila mohuto modepuheo̒ tomongo walao̒ lamiaatia; ami motohilaa mopololadu to hilaide u momooli mola pasali kawasa lo Eeya wau huhuu-hutuuwalo Eeya u udaa̒, boli huhuu-hutuuwalo Eeya u moo̒linggolabu.

⁵ Ode bangusa lo Isirai̒lu Eeya longohi butoo̒o-Lio, wau ode wali mai lei Yako palentaa-Lio. Eeya lopoa̒hu oli nene moyaanto mopoa̒ajari mao̒ tomongo walai̒ mongolio,

⁶ alihu hilaide wumbutio mola motota lo Eeya, lapatao̒ mopo tolonga mola tomongo walai̒ mongolio.

⁷ Lou̒ odito timongolio olo bo mamo tiwunela mola wambao̒ to Allahu Taa̒ala, wau diila molipata huhutu lo Eeya, bo laito modungohe to palenta lo Eeya,

⁸ alihu timongolio diila debo odelo tinene moya limongolio tao̒hilaa momalakala wau momaahe parenta; hilaide taloe̒etu iimanilio, wau diila tatapu wau molotolo hilao to Allahu Taa̒ala.

⁹ Suku Epraim tao̒ tingolo pana wau buutio̒, tilumeteo̒ tou̒ lotuuhua.

¹⁰ Timongolio helo lambanga daantia lo Allahu Taa̒ala woli mongolio, diila lohuto lodungohe tobutoo̒ lo Eeya.

¹¹ Timongolio helo lipata huhuu-hutuuwalo Eeya, wau susuu-aliyaalo moo̒linggolabu u piloi̒laalo mai lo Eeya olimongolio.

¹² To talu loluuhuru limongolio, Allahu Taa̒ala helohutu moo̒linggolabu tolipu lo Masiri, todatahu lo Joan.

¹³ Eeya lomutao̒ deheto, tulusi lopo balanga olimongolio; taluhee pilotihulo Eeya debo odelo damu.

¹⁴ Eeya lodelo olimongolio wolo heengo tou̒ dulahu wau wolo baango tulu oo̒onua.

¹⁵ Eeya lomutao̒ hui̒dee botu tohuta datahu wau luasi udelita, wau longohi olimongolio yilumolo dadaata daa̒.

¹⁶ Huludu botu ilahula lo Eeya lopolualai taluhu, tulusi tilumolohei taluhu debo odelo dutula.

¹⁷ Bo timongolio tulusi odusa to Allahu Taa̒ala, tohuta datahu wau luasi udelita timongolio helo malakala to Taa Laba-labaalo molanggato.

¹⁸ Timongolio sangaja lohimontala to Allahu Taa̒ala, wolo helohile wolo moo̒ohuu̒ ua̒alo u otohilaa limongolio.

¹⁹ Timongolio loluwali to Allahu Taa̒ala wolo loloi̒ya, “Tingga mambo Allahu Taa̒ala mongohi mai ua̒alo olanto tohuta datahu wau luasi udelita?

²⁰ Memangi Eeya lolotaa̒a hui̒dee botu u motoheto, tilinggula taluhu tilumolohu wolo loo̒ohuu̒. Bo tingga mowali olo Eeya mopodapato roti wau mongohi tapu to umati lo Eeya?”

²¹ Loo̒dungohe uito, Allahu Taa̒ala lomuluka wau loluhu umati-Lio wolo tulu; omulukaa-Lio ode limongolio lebe hei̒lo duhenga mola,

²² sababu timongolio diila yakini to Allahu Taa̒ala, tokawasa lo Eeya u mowali mopoa̒ahu olimongolio.

²³ Eleponu odito Eeya lomalenta hulungo u lomuo̒ huhuu-hebulio.

²⁴ Eeya lopolaahei pale lonto sologa, manna duo̒lo ua̒alo limongolio.

²⁵ Eeya longohi olimongolio ua̒alo dadaata daa̒; timongolio lolameela roti lo malai̒kati.

²⁶ Eeya olo lopoa̒hu dupoto tiimuru lohiipo; wolo kawasa lo Eeya dupoto huliaalio lohiipo.

²⁷ Eeya lopolaahei bubuu-lungiyalo ode umati lo Eeya, jumulaalio debo odelo hungayo diilalo oyia̒apa.

²⁸ Pilopodehu mai lo Eeya bubuu-lungiyalo boito to pilokemawa topalito tambati piloti-poo̒yonga limongolio.

²⁹ Lapatao̒ malo lamelo timongolio tunggula lobutuhu, sababu Allahu Taa̒ala malongohi mai wolo u ilotohilaa limongolio.

³⁰ Bo napusu limongolio debo diipo ilolulia; oditolio tou̒ timongolio donggo hemo lamelo,

³¹ Allahu Taa̒ala malo muluka wau loluwali olimongolio; hepilate lo Eeya tau-tauwalo Isirai̒lu yila-yilateelo mao̒ tahumula wau tamolotolo boli buheli daa̒.

³² Eleponu odito umati lo Eeya debo ilodusa, totoonulalo moo̒linggolabu lo Eeya diila loo̒hutu olimongolio yakini.

³³ Yi Allahu Taa̒ala lopoo̒ pulitai tutumuli mongolio debo odelo napasi, tataa-wunuwaalo limongolio lopulito todelomo owowohe.

³⁴ Timii̒du Allahu Taa̒ala momate mateelo mao̒ dengolo lota towolota limongolio, tawewo helolee̒e wau luli lohualinga ode Eeya.

³⁵ Ileela mola limongolio deu̒ Allahu Taa̒ala talo duo̒la olimongolio, wau deu̒ Taa Laba-labaalo molanggato helo poa̒ahu olimongolio.

³⁶ Bo timongolio helo himbulo to Eeya, tataa-heyaalo limongolio wimbulo ngoa̒amilalo.

³⁷ Timongolio diila tatapu wau molotolo hilao to Eeya diila helo tidihu to daantia lo Eeya.

³⁸ Bo Allahu Taa̒ala lomonu wau helo ngambungu umati-Lio, wau diila helo pobinasa olimongolio. Pipiiu̒wa Eeya helo ngotonga omuluka lo Eeya, wau diila helo pomukaa̒i omuluka lo Eeya.

³⁹ Eeya helo eela mola deu̒ timongolio bo mahaluku upanaa, debo odelo dupoto mopaluto wau diialo monguli mai.

⁴⁰ Malo laito timongolio helo malakala to Eeya, wau helo poo̒ngongoto hilaa lo Eeya tou̒ tohuta datahu wau luasi udelita.

⁴¹ Pipiiu̒wa timongolio helo himontala to Allahu Taa̒ala, loposuusa Taa Mantali Allahu Taa̒ala lo Isirai̒lu.

⁴² Timongolio diila loe̒ela mola okokawasa lo Eeya, dulahee tou̒ Eeya helopo lopata olimongolio lonto laawani,

⁴³ tou̒ Eeya helohutu totoonulalo moo̒linggolabu to Masiri, wau totoonulalo muu̒jijati tohuta datahu wau luasi udelita lo Joan.

⁴⁴ Duduu-tulaalo limongolio bilolio̒ Eeya lowali duhu, tilinggula timongolio diila loo̒ yilu taluhio.

⁴⁵ Eeya helo posikisa olimongolio wolo lango u dadaata, wau lopoluli mao̒ huta limongolio pilopo binasa lotumbihe.

⁴⁶ Eeya lopodungga mai wulodu wau bulita, u lopoo̒ pulito sembo wau tilapulo halabolu.

⁴⁷ Eeya loporuusa bungo lo angguru limongolio wolo didi botu, wau bubuu-ngowaalo ara limongolio wolo wambulo lowali loobuo̒ wau motoheto.

⁴⁸ Eeya lopoluli didi esi lolemba to bibiahi mongolio, wau ilato helo dehito bibii-natangiyalo limongolio.

⁴⁹ Eeya lopomukaa̒i omuluka lo Eeya u wali-walihuhu wolo lolao ngopasuukani malai̒kati lomautu u lohutu olimongolio yilooli halaapani.

⁵⁰ Eeya diila longotongo omuluka lo Eeya meaambo momonu to tutumuli mongolio, bo helo pobinasa olimongolio wolo ngongoto moo̒ombito.

⁵¹ Eeya lomate yila-yilateelo mao̒ walao̒ mongo lolai̒ tamohuhula daa̒ todelomo timii̒du ngaalaa̒ taulo Masiri.

⁵² Lapatao̒ Eeya lotitau̒wa to umati-Lio debo odelo himbala lo himba, wau helodelo olimongolio lolibaya tohuta datahu wau luasi udelita.

⁵³ To delomo totau̒wa lo Eeya timongolio aamani wau diila yiloohe, hiambola musu limongolio loa̒humo todeheto.

⁵⁴ Lapatao̒ umati lo Eeya dilelo-Lio ode huta lo Eeya u mantali, ode hihui̒-hui̒dea u hilama lo Eeya lohihilao.

⁵⁵ To talu umati lo Eeya, Eeya lopolahi ulipu mota teto tulusi hetila-tilayadu Eeya lipu boito to ngoa̒amila suku bangusa lo Isirai̒lu, umati lo Eeya, tilinggula timongolio lowali lotipoo̒yo to kekee-mawaalo lo musu.

⁵⁶ Bo timongolio helo malakala wau lotesi Allahu Taa̒ala Taa Laba-labaalo molanggato, papaa-lentawalo Eeya diila dilungohe limongolio.

⁵⁷ Timongolio helo hiyanati debo odelo loluuhuru limongolio, wau diila mowali yakiniyaalo debo odelo buutio̒ u keukeungo.

⁵⁸ Timongolio helo teehengi Allahu Taa̒ala wolo tambati polubowalo balaahala, wau helohutu to Eeya lohiihia wolo bubuu-iyaalo limongolio.

⁵⁹ Loo̒onto uito, Allahu Taa̒ala lomuluka daa̒, wau diila lololimo olimongolio sama-samaata.

⁶⁰ Eeya lololaa mao̒ kema lo Eeya to Silo, tambati biluloa̒ lo Eeya to wolota lo manusia.

⁶¹ Eeya lopoluli Bulua Daantia lo Eeya tilawalio; bayahu ololamahu lo Eeya hilama lolaawani.

⁶² Eeya helo muluka to umati-Lio, miliki pusaka lo Eeya, wau lopoluli olimongolio pilatelio yila-yilateelo mao̒ wolo wamilo.

⁶³ Mongo bohulotau limongolio yilaalapo tulu; diaaluo talonika wolo mongo dulahu limongolio.

⁶⁴ Mongo iimamu limongolio pilatelio yila-yilateelo mao̒ wolo wamilo, tahi jandawa limongolio diila loo̒ hilimuta.

⁶⁵ Yi Eeya lobongu debo odelo taa lobongu mai lonto otuluhe, debo odelo taa molotolo yilapato longilu angguru.

⁶⁶ Eeya helomate lopotouli laawani-Lio, wau lopoo̒laaheo̒ olimongolio u ohiheo-hiheolo mao̒.

⁶⁷ Bo Eeya diila lololimo wali mai lei Yusu wau diila lolulaoto suku Epraim.

⁶⁸ Tatilulaoto Eeya yito suku Yehuda, wau Huludu Sion u ilohilaa lo Eeya.

⁶⁹ Eeya lomongu Bele lo Eeya debo odelo pilo tibiluloa̒ lo Eeya tosologa, wau debo odelo dunia, motoheto u ohiheo-hiheolo mao̒.

⁷⁰ Eeya lolulaotai olei Dauda wato lo Eeya, wau lohama olio lonto himbala bibiahu,

⁷¹ lonto tambati pilolaala lo Eeya tiilo lohimba, u lohimbala Isirai̒lu umati lo Eeya.

⁷² Tei Dauda helolaala olimongolio wolo otutu belesi hilao, wau lodelo olimongolio wolo moolato.