JABURU 76 - KITABI HABARI MOPIOHE

Allahu Taa̒ala taloo̒haama

¹ Duo̒lo diriheni lopolemboa̒ tamoolahua. Wolo tunutunuhe lokocapi. Jaburu lei Asap. Lahu.

² Allahu Taa̒ala masa-masaahuru to Yehuda; tanggu-Lio masa-masaahuru to Isirai̒lu.

³ Yerusalemu yito tambati piloti-poo̒yonga-Lio; Huludu Sion tambati biluloa̒a lo Eeya.

⁴ Mola teto Eeya helo ngantulu ngoa̒amila pakaakasi lo popaatea, ngoa̒amila pana hililingga, porisai wau wamilo.

⁵ Otutu udaa̒alo mola Eeya, wau otinelo laba-labaalo mobango, mongilabotao̒ lo huhuu-ideyaalo muloololio mai daa̒.

⁶ Tau-tauwalo tahi buhelia mailambatio; timongolio leituluhu wau diilalo loo̒ bongu mai. Mongo pajule tahi lootola boli buheli daa̒ mai̒loolia lo olootolio.

⁷ Ngoa̒amila wadala wau jokilio helo duduulahu yilate lo antingo Eeya, yaa Allahu Taa̒ala lei Yako!

⁸ Otutu malo moo̒tihela hapato Eeya! Wonu Eeya muluka tatoonu tamoo̒ taahangi?

⁹ Lonto hulungo Eeya lopoi̒laalo putuusani lo Eeya; dunia moohe wau lotipoo̒yo.

¹⁰ Tou̒ Eeya tilumihula mamomutoo̒ u mopoa̒ahu taa hideehea to dunia.

¹¹ Tau-tauwalo tamailaba diila omanusia olo momuji mola to Eeya, wau tadonggo hiwingoa helomake kaingi kado tuotio limilimi.

¹² Eelailo mola dantimu to Eeya Allahu Taa̒alamu. Patutilio ngoa̒amila bangusa tahi biluloa̒wa totili modelo dewo ode Allahu Taa̒ala u tao̒ohelo.

¹³ Eeya lomoli sumaangati lotahi kawaasawa; mongo olongia molaasa huluhelo totalu lo Eeya.