JABURU 74 - KITABI HABARI MOPIOHE

Dua̒ ode omaladeka lo bangusa

¹ Lahu pangaajali lei Asap. Yaa Allahu Taa̒ala, wolo u ohiheolo mao̒ Eeya mololaa olamiaatia? Yilongola Eeya tulusi muluka to umati lo Eeya lohihilao?

² Eelailo mai umati lo Eeya tatilulaoto Eeya tumulalo muloololio mai, bangusa tailopato lo Eeya alihu mowali miliki lo Eeya. Eelailo Huludu Sion, u poliwali lo Eeya tambati biluloa̒ lo Eeya.

³ Potidutai̒ilo tambati u malowali tuodu; ngoa̒amilalo to Bele lo Eeya maa ilaantulu lomusu.

⁴ Mumuu-suuwaalo Eeya hiwuwa-wuwaatia̒ to Bele lo Eeya, wau helo potihula babaa-ndelaalo ohohaama mota teto.

⁵ Timongolio debo odelo tamooluode ayu tahe mopongayo bulingio, u moluode bubuu-ngowaalo ayu to oa̒ayua.

⁶ Ngoa̒amila paisaka lo ayu he ilaantulu limongolio wolo bulingo wau duuduo̒.

⁷ Timongolio lomobu Bele lo Eeya tunggula yilaahu; wau helo ponajisi tambati polubowalo to Eeya.

⁸ Timongolio ohilaa mopo taa̒aluku olamiaatia sama-samaata, wau momobu mopomaahu ngoa̒amila tambati lo ibaadati tolipu botie.

⁹ Mongo nabi wau tutuuotaalo u moo̒linggolabe diilalo oontonga, wau penu boli ngotaa mao̒ diaaluo tamotota tunggula omolua tulusi odie.

¹⁰ Tunggula omolua, yaa Allahu Taa̒ala, musu mohentea̒ to Eeya? Wolo tunggula ohiheolo mao̒ timongolio hemohina tanggulo Eeya?

¹¹ Yilongola Eeya diilalo motulungi mai olamiaatia? Yilongola Eeya diilalo momandungi mai olamiaatia?

¹² Tumulalo mai bohulio Eeyaalo olongia lowatia, yaa Allahu Taa̒ala, Eeyaalo tahe lopoa̒ahu olamiaatia.

¹³ Wolo olootolo u moo̒tihela hapato Eeya lomutao̒ deheto, wau helo muongo lunggongo nanaa-hawaalo deheto.

¹⁴ Eeya helo potoyopu luluu-nggongowalo Lewiatani wau lopowali olio ua̒alo ode ubilu-biluloa̒ tohuta datahu wau luasi udelita.

¹⁵ Eeya helo potolohe butu lotaluhu wau dutulaa; dutulaa daa̒ pilopo hengu lo Eeya.

¹⁶ Eeyaalo tahe lopowali mai hui wau dulahu, helolantu tambati mato lodulahu wau hulalo.

¹⁷ Eeya helolantu sisii-patanaalo lohuta, helohutu mai sembo lo polodulahu wau sembo lodidi.

¹⁸ Eelailo mai woloolo mola musu helohina to Eeya, yaa Eeya, bangusa tadiila motota to Eeya hemo tombulaa̒ tanggulo Eeya.

¹⁹ Diila mao̒ wudua umati lo Eeya tadiila o lotolo ode uluu̒ lomusu tadiila omanusia. Diila mao̒ u ohiheolo mao̒ molipata paladu umati lo Eeya tamarapo.

²⁰ Eelailo mai daantia u pilohutu lo Eeya wolamiaatia, sababu tau hemohutu diila omanusia totimii̒du tambati u modio̒lomo tolipu botie.

²¹ Diila mao̒ polulia taa dileehe poo̒olitolio, pohileaala dua̒ taa dudodutolo wau mosikini momuji mola to Eeya.

²² Tihuloolo mai yaa Allahu Taa̒ala, poduuluwalo palakala lo Eeya! Sababu ilo-ilolaanga Eeya hehinaalio lotau-tauwalo tadiila yakini to Eeya.

²³ Diila mao̒ lipata wuwaatio̒ lo mumuu-suuwaalo Eeya, ubuluhuto lo lalaa-waniyaalo Eeya!