JABURU 72 - KITABI HABARI MOPIOHE

Dua̒ odeli olongia

¹ Lonto olei Salomo. Yaa Allahu Taa̒ala, poo̒laatalo mai butoo̒ lo Eeya odeli olongia, wohiyalo mai oa̒adili lo Eeya ode walao̒ talolai̒ li olongia.

² Pohileaala dua̒ tio momutoo̒ umati lo Eeya modudua̒a butoo̒, mopohutu taa hideehea wolo aadili.

³ Bolo potala lipu lamitia maa̒muru wau dame sontosa, wau woluo ua̒adili to ngoilanggubu bangusa.

⁴ Pohileaala dua̒ ti olongia mopoduulua haku ulipu tadiila bangusa, wau motulungi tau-tauwalo mosikini wau mopoo̒ pulitao̒ tahi podeehea olimongolio.

⁵ Pohileaala dua̒ tio debo motaahangia wawaalia mola ngotilonggadu omato lodulahu wau hulalo.

⁶ Pohileaala dua̒ tio debo odelo didi u motuhutai tahuta datahu wau luasi, debo odelo didi moo̒ohuu̒ u mopotolohe taluhu to hahaa-laboluwalo.

⁷ Pohileaala dua̒ ua̒adila molaio̒ ngotilonggadu jamaniilio, wau omaa̒muru lepalepato ngotilonggadu hulalo woluo.

⁸ Yilaidialio mamoluasi monto deheto ode deheto, bua̒bua̒de monto tiimuru demola otolopa.

⁹ Ulipu lohuta datahu wau luasi udelita mataa̒aluku to olio wau musu mosujudu totalu lo oa̒atio.

¹⁰ Mongo olongia lo Tarasis wau pupuu-lauwaalo mamodelo dewo ode olio. Mongo olongia lo Arabi wau Etiopia monao̒ mai modelo doi hulawa wau uwewolio uwajibu pomaayali.

¹¹ Ngoa̒amila olongia mamo sujudu totalulio, totoonulalo bangusa mowali mongo watolio.

¹² Sababu tio helo lopata taa hideehea wau tadiila o lotolo, wau taa mosikini tahemo ngiibode olio.

¹³ Tio helo tolia̒ngo taa mosikini wau ulipu tadiila bangusa, wau lopoa̒ahu tutumulo lotaa u hisuusawa.

¹⁴ Tio helopo lopato olimongolio lonto polodeehe wau opoparangi, sababu tutumuli mongolio ohalaga daa̒ olio.

¹⁵ Pomali tutuo̒lo mola baginda olongia! Pohileaala dua̒ to olio podewolo hulawa monto Arabi. Pohileaala dua̒ tio dua̒alio timii̒du wakutu wau barakatialo laito.

¹⁶ Pohileaala dua̒ pale dadaata daa̒ to ngoilanggubu lipu, wau huhuuludio mopolu wolo tilapulo huta. Pohieaala dua̒ hutalio molomiodu debo odelo hihui̒-hui̒dea lo Libanon, wau ulipu lo kotaalio oduhenga mola debo odelo huo̒yoto tohuta datahu wau luasi.

¹⁷ Pohileaala dua̒ tangguli olongia toloe̒ela mola ohiheo-hiheolo mao̒, wau omasaa-hurulio oduhenga mola ngotilonggadu mato lodulahu woluo. Pohileaala dua̒ babaa-ngusawalo mei̒ balakati debo odelo tio, wau ngoa̒amila tau molanggulao̒ olio sanangi tutu.

¹⁸ Ilopujiaalo mola Eeya, Allahu Taa̒ala lo Isirai̒lu! Bo Eeya tahemohutu mai susuu-aliyaalo u moo̒linggolabu.

¹⁹ Ilopujiaalo mola tanggu-Lio u udaa̒ ohiheo-hiheolo mao̒; pohileaala dua̒ ngoilanggubu dunia mopolu mai wolo omumulia-Lio! Powaliilo mola odito. Amin!

²⁰ Oditopo duduu-awaalo lei Dauda, walae̒e Isai.