JABURU 70 - KITABI HABARI MOPIOHE

Dua̒ u mei̒ tuulungi

¹ Duo̒lo diriheni lopolemboa̒ tamoolahua. Lonto olei Dauda, tou̒ helo podewo bake poe̒ela.

² Yaa Allahu Taa̒ala, poa̒ahuwalo mai watotia, Eeya, polamemetolo mai motulungi olo watotia!

³ Poluliaalo mao̒ taa u ohilaa momate olo watotia mate-mateelo mao̒ olaahelio wau tumeteo̒ hilingua. Poluliaalo mao̒ taa u hemohantia̒ osuusa lo watotia pateelo tumouli wau hinaalio.

⁴ Poluliaalo mao̒ taa u hemopoi̒ii̒ olo watotia mowali ooheaalo wau moolito.

⁵ Pohileaala dua̒ ngoa̒amila taa u hemolubo to Eeya motiwengahu wau motisanangi; wau tai̒lohilao to oa̒ahu monto Eeya tulusi moloi̒ya, “Otutu udaa̒alo mola Eeya!”

⁶ Watotia botie mosikini wau molulupuhu; hua̒a podunggaalo mai yaa Allahu Taa̒ala. Eeyaalo tamoo-tulungia wau tamoo-poa̒ahua olo watotia, diila mao̒ poboyu mai, yaa Eeya.