JABURU 68 - KITABI HABARI MOPIOHE

Lahu lo ohohaama

¹ Duo̒lo diriheni lopolemboa̒ tamoolahua. Jaburu lei Dauda.

² Allahu Taa̒ala tilimihulo helopo bubuua̒lawa musu-Lio, taa u molonua̒ to Eeya tilumeteo̒ lonto talu lo Eeya.

³ Allahu Taa̒ala helo polontulao̒ olimongolio lonao̒, debo odelo poloo̒ u hiliipa lo dupoto wau yilooli. Debo odelo talu hilumeheto todelomo tulu, odi-odieelo mola taa moleeto mooli monto talu lo Allahu Taa̒ala.

⁴ Bo taa hisaalea hisanangia hilao wau hiweengahe daa̒, timongolio hitingalaa̒ meengahu totalu lo Allahu Taa̒ala.

⁵ Polahuwalo mola ode Allahu Taa̒ala, pujiaalo mola tanggu-Lio, podapato mao̒ dalala daa̒ ode Eeya utae̒tae̒e toheengo. Tanggu-Lio Eeya – potisana-sanangilo totalu-Lio!

⁶ Allahu Taa̒ala tabilu-biluloa̒ to Bele-Lio u mantali deu̒yito-yito tiyamo lowalao̒ tadidu otiilo otiyamo wau tamooduulua to tahi jandawa.

⁷ Allahu Taa̒ala helongohi tambati potibiluloa̒ totaa u tutuuwau; Eeya helo lopato taulo tutupa tilinggula timongolio silanangi tutu. Bo tau-tauwalo tahipo luwalia to Eeya musi motibiluloa̒ tohuta u mohengu wau diila molomiodu.

⁸ Yaa Allahu Taa̒ala, tou̒ Eeya helodelo umati lo Eeya lonao̒ lolibaya tohuta udatahu wau luasi u mohengu,

⁹ dunia helo lotau̒lo, didi lopopao̒ totalu lo Eeya, sababu pilodungga lo Allahu Taa̒ala Sinai, Allahu Taa̒ala lo Isirai̒lu.

¹⁰ Wolo daata-daatalo mao̒ Eeya lopotuhutai didi, wau loponguli huta lo Eeya u mohengu wau diila molomiodu.

¹¹ Lapatao̒ umati lo Eeya helo tibiluloa̒ mola teto; todelomo opopiohu Eeya, yaa Allahu Taa̒ala, Eeya lolaalao̒ taa mosikini.

¹² Eeya longohi palenta, tulusi mongobua helodelo habari:

^13-14 “Mongo olongia wau pasuukanilio maa tilumeteo̒!” Timongolio tilumeteo̒ debo odelo poombo hitombota mota. Mongobua tobele helo laya-layadeo̒, talaa̒ wau hulawa u tilolaalio. Eleponu dadaata tadiila lodudua̒ lopaatea, umati lo Allahu Taa̒ala maloo̒haama.

¹⁵ Tou̒ Taa Laba-labaalo kawasa helopo pupuu-lepeelo mongo olongia mola teto, malo tuhutai salju lonto Hui̒dee Salmon.

¹⁶ Hui̒dee Basan yito hui̒dee upolu-polutuo̒, hui̒dee u obalitutuo̒ dadaata.

¹⁷ Yilongola monto balitutuu̒mu u dadaata boito yio̒ momilohei wolo mohiihia to Huludu Sion u tilulaoto Allahu Taa̒ala u potibiluloa̒-Lio? Eeya maa motibiluloa̒ mola teto u ohiheo-hiheolo mao̒.

¹⁸ Wolo pulua lolihu kaleta molotolo Allahu Taa̒ala lotibilohu towolota limongolio todelomo odudaa̒a-Lio.

¹⁹ Eeya lobotula mola ode tambati u molanggato; dadaata tawalo dilelo-Lio mola pee̒-pee̒enta. Eeya helo lolimo dewo lonto wolota lomanusia tumbao̒ lonto wolota lokaumu tamoo-mintaa̒wa tingolo; alihu timongolio motibiluloa̒ pee̒-pee̒enta wolo Eeya Allahu Taa̒ala.

²⁰ Pujiaalo mola Eeya, sababu Eeyaalo Allahu Taa̒ala tahe lopoa̒ahu mai olanto; monto dulahu odungga dulahu Eeya helomota bantaanto.

²¹ Allahu Taa̒alanto yito Eeya tamopoa̒ahu, Eeya helo lopatai olanto lonto opopate.

²² Allahu Taa̒ala tantu mamopo toyopu lunggongo lo musu-Lio, tau-tauwalo tatulusi hitumula todelomo dusa.

²³ Tahuda lo Eeya, “Wuu umati-U̒, deloo-U̒ musumu monto Basan muli deloo-U̒ timongolio monto wamoo̒ deheto,

²⁴ alihu timongoli mongulo mao̒ oa̒atumu wolo duhu limongolio, wau aa̒a-pulaalo limongoli modilatao̒ tunggula motolu-toluulo mao̒.”

²⁵ Ngoa̒amila moo̒onto pawai ohohaama lo Eeya, yaa Allahu Taa̒ala, Allahu Taa̒ala lowatia, olongia lowatia, hedilepito lotaa dadaata ode tambati potibiluloa̒-Lio.

²⁶ To talu hinao̒wa tahi poolahua, towulea tahi poitoohea kocapi; to huungio mongo dulahu tamoolaa̒pa rabana; odieelo mola lahu limongolio:

²⁷ “Pujiaalo mola Allahu Taa̒ala tohuungo ambua lo umati-Lio, pujiaalo mola Eeya, wuu ngoa̒amila wali mai lei Yako!”

²⁸ Benyamin, suku talaba-labaalo ngoi̒di, helonao̒ totalu, lapatao̒ hia̒po-apoolawa totooyunuta tahimuloa lolipu lo Yehuda to wulealio tahimuloa lolipu lo Jebulon wau Naputali.

²⁹ Allahu Taa̒ala limongoli mohile wolo moo̒ohuu̒ olootoli mongoli; yaa Allahu Taa̒ala, poo̒tohetalo wolo u mapilohutu mai lo Eeya ode lamiaatia.

³⁰ Mongo olongia hipodeloa dewo ode Eeya to Bele lo Eeya to Yerusalemu.

³¹ Antingaalo Masiri, binatangi mongantau boito to huungo hepu. Diniyalo babaa-ngusawalo, himbala sapi lo oa̒ayua boito wolo mongo walai̒o, u tinggai hemo duduu-taa̒alo mao̒ u moo̒tapu talaa̒. Allahu Taa̒ala mopo bubuua̒lawa bangusa tao̒hilaa mopaatea.

³² Taduduulaa̒ ulipu lo Masiri lonao̒ mai helodelo tombaha; taulo Sudan lingga-linggahu helodelo dai hulawa uwajibu pomaayali ode Allahu Taa̒ala.

³³ Polahuwalo mola ode Allahu Taa̒ala, wuu ngoa̒amila yiladia, polahuwalo mola puji poloi̒laalo momuji ode Eeya,

³⁴ to Eeya tamolibaya to dulenta daa̒ mulooloalio daa̒. Dungohilo! Eeya lotahuda, suala-Lio hulahulaube wolo moo̒tihela hapato.

³⁵ Pasisiyalo kawasa lo Allahu Taa̒ala u okawasa laba-labaalo molanggato to Isirai̒lu, kawasaa-Lio demola hulungo.

³⁶ Otutu moo̒linggolabu Allahu Taa̒alanto tou̒ Eeya yilumualai lonto tambati biluloa̒-Lio. Allahu Taa̒ala lo Isirai̒lu helongohi kawasa wau lotolo to umati-Lio. Ilopujiaalo mola Allahu Taa̒ala!