JABURU 66 - KITABI HABARI MOPIOHE

Lahu lo poloi̒laalo momuji wau sukuru

¹ Duo̒lo diriheni lopolemboa̒ tamoolahua. Lahu tuwau. Pongibo-ngiibodulo mola wolo wengahu ode Allahu Taa̒ala, wuu ngilanggubu dunia!

² Polahuwalo wau pou̒daa̒alo mola tanggulo Eeya, polamahelo mola Eeya wolo puji poloi̒laalo momuji.

³ Poleleaalo ode Allahu Taa̒ala, “Otutu moo̒linggolabu huhutu lo Eeya! Musu taa̒luku to Eeya polupolu lo owowohe, sababu laba-labaalo udaa̒ kawasa lo Eeya.

⁴ Ngoilanggubu dunia sujudu molubo to Eeya, timongolio mopolahu mola momuji tanggulo Eeya.”

⁵ Ponao̒olo mai wau bilohilo huhutu lo Allahu Taa̒ala, otutu moo̒linggolabu totoonulalo huhutu lo Eeya towolota lomanusia!

⁶ Deheto bilolio̒ Eeya lowali huta mohengu, loluuhuru lamiaatia lobalangao̒ to limbuta. Yi amiaatia lotiwengahu sababu huhutu mai lo Eeya.

⁷ Eeya momalenta wolo lotolo boli buheli daa̒ u ohiheo-hiheolo mao̒. Babaa-ngusawalo ilimatoa lo Eeya, alihu tamoo-mintaa̒awam tingolo diila mowali motisombongi to Eeya.

⁸ Pujiaalo mola Allahu Taa̒ala lamiaatia, wuu babaa-ngusawalo, potingalaa̒alo mola poloilaalo momujimu to Eeya!

⁹ Eeya malodaha mai olamiaatia alihu debo tumutumulo, diila helo poluli olamiaatia lodehu.

¹⁰ Yaa Allahu Taa̒ala, Eeya malotesi mai olamiaatia debo odelo taa tamosopu talaa̒ todelomo tulu.

¹¹ Piloluli lo Eeya amiaatia lodehu todelomo taalo, wau yilohia mai lo Eeya amiaatia banta u mobuheeto daa̒.

¹² Piloluli lo Eeya amiaatia heilu-yilumbetao̒ lomusu; amiaatia helo libaya to taluhee daa̒ wau tulu. Bo botia amiaatia madilelo lo Eeya ode tambati u maa̒muru.

¹³ Watotia mamodelo bake yilalango ode Bele lo Eeya wau moe̒elao̒ danti lowatotia to Eeya,

¹⁴ danti u yilapali lowatotia tou̒ watotia todelomo usuusa.

¹⁵ Podewo mola lowatotia to Eeya bake yilalango monto binatangi tilulaoto, batade himba wau sapi ulai̒, poloi̒o mohubulo mola ode hulungo.

¹⁶ Ponao̒olo mai wau dungohilo, wuu ngoa̒amila bangusa taa hisaalea, masilita mai lowatia mai wolo u hepilohutu lo Allahu Taa̒ala ode laatia.

¹⁷ Watia malo tingalaa̒ mola lei̒ tuulungi mai to Eeya; botia polahuwo mola lowatia poloilaalo momuji ode Eeya.

¹⁸ Humayaalio watia sanangi momikiilangi u moleeto, tantu Eeya diila mohuto modungohu.

¹⁹ Bo Allahu Taa̒ala malo dungohei olaatia, Eeya helo poo̒tuotai polohone lowatia.

²⁰ Watia momuji mola Allahu Taa̒ala sababu Eeya diila helo potouli dua̒ lowatia, wau diila lohuheli helomonu mai olaatia.