JABURU 61 - KITABI HABARI MOPIOHE

Dua̒ u mei̒ duo̒lai

¹ Duo̒lo diriheni lopolemboa̒ tamoolahua. Wolo yitohu kocapi. Lonto olei Dauda.

² Dungohilo mai iibodu lowatotia, yaa Allahu Taa̒ala, poo̒tuotilo mai dua̒ lowatotia.

³ Molamingo monto bele watotia longiibode mola to Eeya, sababu watotia malo pulito halapani. Eeya mamo depita olo watotia ode tambati poa̒ahuwalo batanga u aamani, tambati ulaba-labaalo molanggato ode watotia;

⁴ Sababu Eeyaalo tamoo-duo̒lawa olo watotia, biintengi u motoheto duo̒lo musu lowatotia.

⁵ Poluliaalo mai watotia ngotupa lo tutumulo motihangata to kema lo Eeya, alihu aamani todelomo wolungo polipio̒ lo Eeya.

⁶ Sababu Eeya malo dungohe danti lowatotia, yaa Allahu Taa̒ala, wau longohi mai ode watotia miliki pusaka lotaa saale.

⁷ Pohileaala dua̒ olongia o umulu hayahaya, tilinggula tio tumumulo wawaalia mola.

⁸ Pohileaala dua̒ tio momalenta u ohihieo-hiheolo mao̒ odelo olongia tatilulaoto Eeya, yaa Allahu Taa̒ala, duo̒lalo mai tio wolo ponu wau otatapu wau olootolo hilaa lo Eeya.

⁹ Yi watotia malaito mopolahu mola poloilaalo momuji ode Eeya, sambela moe̒elao̒ danti lowatotia monto dulahu odungga dulahu.