JABURU 60 - KITABI HABARI MOPIOHE

Dua̒ mei̒ tuulungi

¹ Duo̒lo diriheni lopolemboa̒ tamoolahua. Lodudua̒a lahu: Bunga baakungi ososakusi. Jaburu lonto olei Dauda,

² tou̒ tio heloluhu taulo Aram-Mesopotamia wau taulo Aram-Joba, wau tou̒ tei Yoab lohualinga wau helo poo̒laaheo̒ mopulaa dulo lihu lota taulo Edom to Lumbaya Asin.

³ Eeya diila lololimo olamiaatia, yaa Allahu Taa̒ala, wau helo poluli mai to olamiaatia ilolaahelio. Eeya lomuluka mai to olamiaatia; botia ponguliyalo mai amiaatia.

⁴ Eeya lopotau̒lai huta tunggula lotiyomo; poo̒piohelo mai u lopoopoo̒, sababu huta helo lotau̒lo.

⁵ Poluliaalo mai lo Eeya umati lo Eeya molaasa polodutolo mobuheeto; amiaatia bolo hihuyu-huyungaalo mao̒ debo odelo taa hihuuwoa̒.

⁶ Pilopoe̒ela lo Eeya totau-tauwalo tahi saalea, alihu timongolio molopato monto hukuumani.

⁷ Poa̒ahuwalo mai amiaatia wolo kawasa lo Eeya, tametilo mai dua̒ lamiaatia, alihu tau-tauwalo tapilonua lo Eeya poa̒ahuwalo.

⁸ Monto potibiluloa̒ lo Eeya umantali Allahu Taa̒ala lotahuda mai, “Watia ohilaa motingalaa̒ meengahu wau molaya-layadeo̒ huta lo Sikhem; Lumbaya Sukot mau̒ndiyo-U̒.

⁹ Gilead wau Manasye yito milikii-U̒, Epraim heelemu lowajaa-U̒, wau Yehuda tunggudu lo yilaidiaa-U̒.

¹⁰ Bo Moab yito tambati pongulowalo oa̒atu-U̒; Wau̒ motingalaa̒ ohohaama duo̒lo Pilistea. Ode Edom pomuhulo-U̒ sandele-U̒ odelo tuoto deu̒ tio milikii-U̒.”

¹¹ Tatoonu tamamo depita olaatia ode Edom? Tatoonu tamodelo olaatia ode kota okubu boito?

¹² Yaa Allahu Taa̒ala, wolo Eeya diila moduduo̒ pee̒-pee̒enta wolamiaatia? Wolo Eeya diila momaju pee̒-pee̒enta wolo suludadu lamiaatia?

¹³ Tulungia mai amiaatia monto musu, sababu bubantu lomanusia diila ohuna.

¹⁴ Pee̒-pee̒enta wolo Allahu Taa̒ala, ito mamolotolo boli buheli daa̒, Eeyaalo tamopo olaaheo̒ musuunto.