JABURU 56 - KITABI HABARI MOPIOHE

To delomo usuusa motiwunela to Allahu Taa̒ala

¹ Duo̒lo diriheni lopolemboa̒ tamoolahua. Lodudua̒a lahu: Poombo u bubu, lonto madala u molamingo. Jaburu lei Dauda tou̒ taulo Pilistin loheu̒pa olio to Gat.

² Ponualo mai watotia, yaa Allahu Taa̒ala, sababu watotia tiluhu lomusu; lololaalaaita watotia hedileehe lo mumuu-suwaalo watotia.

³ Ilo-ilolaanga watotia hedilu-dilutaa̒a lolaawani lowatotia; dadaatalo tahe lomusu olo watotia, yaa Allahu Taa̒ala Taa Laba-labaalo molanggato.

⁴ Tou̒ watotia yiloohe, watotia helo tiwunela mola to Eeya.

⁵ Watia momuji mola to Allahu Taa̒ala sababu wolo u dilaanti mai lo Eeya; watia yakini to Eeya, yi watia diila moohe, manusia diila o lotolo to olaatia.

⁶ Ilo-ilolaanga musu hemo puuyoto palakala lowatia, mololaalaaita timongolio hemo i̒hitiari mopo topotala olaatia.

⁷ Timongolio lowoomboa hipole-polemboa̒ to tambati potituua̒lo, hemo ngima-ngimato toonulaalo u hepohutuo lowatia, wau hemohima o hiangio u momate olaatia mate-mateelo mao̒.

⁸ Tingga woluo oa̒ahu duo̒lo ololeeti mongolio? Pobinasaalo mai timongolio todelomo omuluka lo Eeya, yaa Allahu Taa̒ala!

⁹ Eeya helo yia̒apa duduu-laheyaalo pilonao̒wa ode utoonulalo mao̒ lowatia, wau helotota jumulaa ponu lowatia; wolo diila Eeya tamoo̒-reekenia mao̒?

¹⁰ To dulahee watia longiibode mola to Eeya, musu mapateelo tumouli, sababu otaawa lowatia deu̒ Allahu Taa̒ala lotiwambao̒ ode laatia.

¹¹ Watia momuji mola to Eeya Allahu Taa̒ala, sababu wolo u pilodanti mai lo Eeya.

¹² Watia yakini to Eeya, yi watia diila moohe, manusia diila olotolo to olaatia.

¹³ Watotia mamo pomata danti lowatotia to Eeya, yaa Allahu Taa̒ala, wau mopodewo bake sukuru ode Eeya.

¹⁴ Sababu Eeya lolopatai olo watotia lonto mautu, hedilaha lo Eeya watotia alihu diila modehu. Yi watotia lowali tilumumula todelomo poloduo̒lo Allahu Taa̒ala, todelomo tinelo u lopobaangai ngoa̒amila u hitumula.