JABURU 52 - KITABI HABARI MOPIOHE

Hukuumani totaa u moleeto

¹ Duo̒lo diriheni lopolemboa̒ tamoolahua. Lahu pongaajali lei Dauda,

² tou̒ tei Deo̒gi, taulo Edom, lonao̒ mai lopoo̒taa odelei Saulu deu̒ tei Dauda malei dungga mota tobele lei Abimelekh.

³ Wuu taa molotolo, yilongola yio̒ hemopo soombongi lo ololeetumu to taa u pilonua lo Allahu Taa̒ala?

⁴ Ilo-ilolaanga yio̒ hemo himbulo wau hemo ranjana u moleeto; dilamu debo odelo pito ponguluhu u molalito.

⁵ Yio̒ lebe motohilaa u moleeto wolo u mopiohu, lebe motohilaa mohimbulo wolo moloi̒ya u otutu.

⁶ Wolo loi̒yamu yio̒ hemo himbulo wau hemo poo̒ngongoto hilaa lotau!

⁷ Bo yio̒ mapobinasa mai lo Allahu Taa̒ala u ohiheo-hiheolo mao̒; yio̒ wau̒polio wau dedeo̒lio monto belemu, pobinasaalio monto dunia lotaa tumutumulo.

⁸ Moo̒onto mao̒ uito, taa saale mamoohe, lapatao̒ mopoi̒ii̒ mao̒ olemu wau moloi̒ya,

⁹ “Ui-uitolo taulio tadiila helo tiduo̒la to Allahu Taa̒ala, bo hemo tiwunela to okokayaalio ulaba-labaalo daata wau hemololohe u aamani to balangi he yilambatio.”

¹⁰ Bo wau̒ debo odelo bungo lo ayu jaitun u moidu todelomo Bele lo Allahu Taa̒ala. Wau̒ yakini deu̒ Allahu Taa̒ala debo momonu mai u ohiheo-hiheolo mao̒.

¹¹ Wau̒ laito ohilaa mosukuru mola to Eeya totalu umati lo Eeya pilopo loladuu̒ opopiohu lo Eeya.