JABURU 5 - KITABI HABARI MOPIOHE

Dua̒ mei̒ duo̒lai

¹ Duo̒lo diriheni lopolemboa̒ tamoolahua. Wolo yiyitohu tulali. Jaburu lei Dauda.

² Yaa Eeya, dungohilo mai tataa-heyaalo watotia, poo̒tuotilo mai osuusa lowatotia.

³ Pandungialo mai iibodu lowatotia wau tulungialo mai watotia, yaa Olongia lowatotia wau Allahu Taa̒ala lowatotia.

⁴ Sababu bo to Eeya watotia modua̒, yaa Eeya, dungohilo mai iibodu lowatotia tou̒ dimodupo. Didii-modupo deloo lowatotia dewo lowatotia wau watotia mohima totametai lo Eeya, yaa Eeya.

⁵ Eeya Allahu Taa̒ala tadiila motohilaa u moleeto; taa moleeto diila mowali modumango ode Eeya.

⁶ Eeya diila moo̒ tahangi moo̒onto taa batingga, Eeya molonuo̒ taa u hipohutua u moleeto.

⁷ Pobinasa lo Eeya tau-tauwalo tao̒hilaa mohimbulo, tamoo himbuloa wau tamoomatea mate-mateelo mao̒ hebilohe lo Eeya dupa-dupaapa.

⁸ Bo sababu ponu lo Eeya u udaa̒, watotia loo̒ tuwoto ode Bele lo Eeya. Watotia helo sujudu ode mantahu Bele lo Eeya u mantali, wau tilubo lowatotia Eeya wolo hikimati.

⁹ Yaa Eeya, mailaba dadaatalo musu lowatotia! Delowalo watotia u mohutu kahandaki lo Eeya wau potunuwalo mai dalalo Eeya u musi nao̒o lowatotia.

¹⁰ Sababu loi̒ya musu lo watotia diila mowali palacayaalo; hilaa limongolio polupolu lo ranjana u moleeto. Tataa-heyaalo limongolio malo moo̒ hilao, bo batini limongolio polupolu lou̒ mohutodu.

¹¹ Hukuumaniyalo mai timongolio, yaa Allahu Taa̒ala, huliilo mao̒ timongolio topotala sababu ranjanaalio lohihilao. Polontulalo timongolio sababu dadaata dusa limongolio, sababu timongolio malo makala to Eeya.

¹² Pohileaala dua̒ ngoa̒amila taa u motiduo̒la to Eeya meengahu wau mongibo-ngiibode meengahu ohiheo-hiheolo mao̒. Duo̒lilo mai tau-tauwalo tahipo tolia̒ngawa to Eeya, alihu timongolio motiwengahu sababu Eeya.

¹³ Sababu Eeya mabalakati taa utatapu wau molotolo hilao to Eeya, heduo̒la lo Eeya timongolio wolo ponu lo Eeya.