JABURU 43 - KITABI HABARI MOPIOHE

Dua̒ tohuta lo polayahu

¹ Wohiyalo mai ua̒adili ode laatia, yaa Allahu Taa̒ala, poduuluwalo mai haku lowatia to bangusa tamomaahu parenta. Lopotaalo mai watia monto tamooleeto wau tamoo-himbuloa.

² Eeyaalo Allahu Taa̒ala, tamoo-duo̒lawa olaatia; yilongola Eeya lololaa olaatia? Yilongola watia musi tulusi modutolaa sababu hedileehe lo mumuu-suwaalo laatia?

³ Poi̒laalolo mai otatapu wau olootolo hilao lo Eeya u molinelai wau modelo olaatia, alihu watia muli mohualinga ode Sion, huludu lo Eeya u mantali wau ode Bele potibiluloa̒ lo Eeya.

⁴ Yi watia mamoti dulunga ode mesba lo Allahu Taa̒ala, motaalua wolo Allahu Taa̒ala bungo lo osaanangi tutu lowatia. Watia mamopolahu mola wau moitohe kocapi, u momuji mola to Eeya, yaa Allahu Taa̒ala, Allahu Taa̒ala lowatia.

⁵ Yilongola hilaa lowatia suukali wau balisa? Watia hemo tiwunela mola to Allahu Taa̒ala, yi watia mamuli mosukuru mola to Eeya, to Allahu Taa̒alau̒ wau tahe lopoa̒ahu mai olaatia.