JABURU 42 - KITABI HABARI MOPIOHE

BUKU OLUOLIO: JABURU 42–72 Dua̒ tohuta lo polayahu

¹ Duo̒lo diriheni lopolemboa̒ tamoolahua. Lahu lo pongaajali lo Kaumu Korah.

² Debo odelo buu̒lu mooloolo taluhu dutulaa, odieelo mola jiwa yiwau̒ mooloolo to Eeya, yaa Allahu Taa̒ala.

³ Wau̒ mooloolo to Allahu Taa̒ala tatumu-tumulo, omolua wau̒ moo̒ nao̒ moi̒baadati to Bele lo Eeya?

⁴ Hui wau dulahu wau̒ hilumoyongo, bo ponu wambao̒ ua̒alou̒. Ilo-ilolaanga musuu̒ hemohintu, “Tou̒toonu Allahu Taa̒alaamu?”

⁵ Hilaau̒ suukali wonu moe̒ela mola tou̒ muloololio mai, tou̒ wau̒ dulu-dulunga ode Bele lo Eeya pee̒-pee̒enta wolo taa dadaata helohutu rameyangi. Wau̒ lonao̒ totalu lo baliisani wolo helo tingalaa̒ leengahe wau lahu lo poloi̒laalo momuji.

⁶ Yilongola hilaau̒ suukali wau balisa? Wau̒ hemo tiwunela to Allahu Taa̒ala. Yi wau̒ mamuli mosukuru mola to Eeya, to Allahu Taa̒alaau̒ wau talo poa̒ahu mai olau̒.

^7-8 To huta lo polayahu botie hilaau̒ laba-labaalo loaa̒ntulu, sababu uito wau̒ loe̒ela mola to Eeya. Jiwau̒ yileelihu todelomo suukali lohilao, wau̒ ilotuhata lopuuyota udiilalo o yia̒apa; debo odelo bulontungo taluhee podehu lo Dutulaa Yordan lonto Hui̒dee Mijar.

⁹ Pohileaala dua̒ Eeya mopobilohei ponu-Lio tou̒ dulahu, alihu tou̒ hui watia mowali mopolahu mola, wau modua̒ mola to Allahu Taa̒ala bungo lo tutumulo lowatotia.

¹⁰ Watia loloi̒ya ode Allahu Taa̒ala, tahemo poduulua olaatia, “Yilongola Eeya helo lipata olaatia? Yilongola watia musi tulusi modutolaa, sababu hedileehe lo mumuu-suuwaalo lowatia?”

¹¹ Hilaa lowatia lotoyopu daa̒ sababu hepoheentea̒ lomusu. Timogolio tulusi hemohintu, “Tou̒toonu Allahu Taa̒alaamu?”

¹² Yilongola hilaa lowatia suukali wau balisa? Watia hemoharapu to Allahu Taa̒ala. Yi watia mamuli mosukuru to Eeya, to Allahu Taa̒ala laatia wau tahe lopoa̒ahu mai olaatia.