JABURU 41 - KITABI HABARI MOPIOHE

Dua̒ mei̒ poo̒luli

¹ Duo̒lo diriheni lopolemboa̒ tamoolahua. Jaburu lei Dauda.

² Potisanangilo tutu taa u mopoo̒tuoto taa u molulupuhu; Eeya mamotulungi mai olio tou̒ oweepita.

³ Eeya mamoduo̒lai wau molaala olio, Eeya mamopo sanangi tutu olio todunia, wau diila mohudu olio ode uluu̒ lomusuulio.

⁴ Eeya mamotulungi mai tou̒ mongongoto, wau moponguli oseehatilio.

⁵ Loi̒ya lo watotia, “Watotia mai̒lodusa to Eeya, yaa Eeya, ponuwalo watotia wau poo̒lulia mai watotia.”

⁶ Musu lowatotia hemoloi̒ya u moleeto pasali lowatotia, otohilaa limongolio alihu watotia mate wau lipatoolo.

⁷ Taa u hemonao̒ mai ode watotia diila otutu wau belesi hilao. Timongolio hemohimoa̒ habari mobulilo pasali lowatotia, lapatao̒ hemo pololadeo̒ ode utoonulalo mao̒.

⁸ Ngoa̒amila tamolonua̒ olo watotia hipololoo-humawa; timongolio hemoloi̒ya ulaba-labaalo mobulilo pasali lowatotia.

⁹ Uali mongolio, “Ngongotio tiluhua daa̒, tio diila pongalo aakali muli mobongu mai.”

¹⁰ Tumbao̒ sahabati modudula talaba-labaalo pilalacaya lowatotia, taa u helolamela pee̒-pee̒enta wolo watotia malohina olo watotia.

¹¹ Ponuwalo mai watotia yaa Eeya, poo̒luliyalo mai watotia, alihu watotia moo̒tuli ololeeto lo mumuu-suwaalo watotia.

¹² Wonu watotia diila olaahe lomusu lowatotia, mao̒taawalo lowatotia deu̒ Eeya motuhatawa olo watotia.

¹³ Eeya lotulungi mai olo watotia sababu otuulusi lo watotia, wau helohutu tutumulo watotia pee̒-pee̒enta wolo Eeya u ohiheo-hiheolo mao̒.

¹⁴ Pujialo mola Eeya, Allahu Taa̒ala lo Isirai̒lu! Pujialo mola Eeya botia wau ohiheo-hiheolo mao̒! Powalilo odito. Amin!