JABURU 40 - KITABI HABARI MOPIOHE

Dua̒ sukuru wau polohone

¹ Duo̒lo diriheni lopolemboa̒ tamoolahua. Jaburu lei Dauda.

Dua̒ sukuru

² Wolo sabali wau̒ hemohima tulungia mai lo Eeya; lapatao̒ Eeya lopoo̒ tuotai olau̒ wau lodungohe iiboduu̒.

³ Eeya lomantanga olau̒ lonto huango umoo̒ topotala, wau lonto latao̒. Pilotambati lo Eeya wau̒ toitaato huludu botu, tilinggula diambanguu̒ loontapo.

⁴ Eeya longaajali mai olau̒ lopolahu mola lahu bohu, lahu lo poloi̒laalo momuji ode Allahu Taa̒alanto. Dadaata taa loo̒onto wau mailoohe, tulusi pilalacaya to Eeya.

⁵ Potisanangilo tutu taa u palacaya to Eeya, tadiila loduduo̒ lolubo dedeewaalo, meaalo lei̒ tuulungi totaa soombongi.

⁶ Yaa Eeya, malo odito daatalio huhutu lo Eeya ode mongowatotia, yaa Eeya Allahu Taa̒ala lowatotia, Eeya diila tao̒ bandingilio! Dadaatalo mao̒ ranjana lo Eeya u moo̒linggolabu ode mongowatotia diila pongalo aakali wungguliolo ngoa̒amilalo.

⁷ Dewo wau bake pohinta diila otohilaa lo Eeya, bake yilalango wau bake polulutalo dusa diila yilinggile lo Eeya. Bo Eeya malongohi mai ode watotia bulonga u mowali modungohu suala lo Eeya.

⁸ Lapatao̒ watotia loloi̒ya, “Uti-utieelo watotia, todelomo lilibu buku leituladei duo̒lo watotia.

⁹ Watotia sanangi mohutu mao̒ kahandaki lo Eeya, yaa Allahu Taa̒ala, butoo̒ lo Eeya tilahu mao̒ lowatotia todelomo hilao.”

¹⁰ To delomo aambua umati lo Eeya hepilo loladu lowatotia habari moe̒engahe deu̒ Eeya malo poa̒ahu to mongowatotia. Wolo diila ohuheliilio sua̒li boito pilopo malalumu mola lowatotia, otaawa lo Eeya ngoa̒amila boito, yaa Eeya.

¹¹ Habari lo oa̒ahu boito diila tilahu lowatotia todelomo hilao, polotulungi wau otatapu wau olootolo hilao lo Eeya laito hepololadu lowatotia. Totalu lo aambua umati lo Eeya watotia diila lotipoo̒oyo batanga, bo hepilo malalumu mola lowatotia ponu wau otatapu wau olootolo hilao lo Eeya.

¹² Yaa Eeya, diila mao̒ pohuheli momonu mai olo watotia; duo̒lalo mai watotia laito wolo ponu wau otatapu wau olootolo hilao lo Eeya.

Dua̒ polohone

¹³ Watotia hebilaala lomusiba u dadaata, jumulaalio diilalo oyia̒apa. Watotia he yililapita lo duduu-sawaalo watotia tunggula watotia diila lowali loo̒onto. Jumulaalio mongilabota huwoo̒ to lunggongo lowatotia, helohutu olo watotia yilooli harapani.

¹⁴ Yaa Eeya, poa̒ahuwalo mai watotia, yaa Eeya polamemetolo mai motulungi olo watotia!

¹⁵ Poluliaalo mao̒ taa u motohilaa momate olo watotia mate-mateelo mao̒ olaahelio wau tumeteo̒ hilingua. Poluliaalo mao̒ taa u hemohantia̒ pasali omarapo lowatotia pateelo tumouli wau hinaalio.

¹⁶ Poluliaalo mao̒ taa u hipoi̒ii̒ya to watotia mowali ooheaalo wau moolito.

¹⁷ Pohileaala dua̒ ngoa̒amila taa u hemolubo to Eeya motiwengahu wau motisanangi, wau ngoa̒amila taa motolia̒nga osaalamati monto Eeya tulusi moloi̒ya, “Otutu udaa̒alo mola Eeya!”

¹⁸ Watotia botie mosikini wau molulupuhu, bo Eeya hemo poo̒tuotai olo watotia. Eeyaalo tamoo-tulungia wau tamoo-poa̒ahau olo watotia, diila mao̒ poboyu mai, yaa Allahu Taa̒ala lo watotia!