JABURU 38 - KITABI HABARI MOPIOHE

Dua̒ todelomo usuusa

¹ Jaburu lei Dauda tou̒ helo podewo bake poe̒ela.

² Yaa Eeya, diila mao̒ hukuumania watotia todelomo muluka lo Eeya, diila mao̒ posikisaawa wototia todelomo omuluka lo Eeya.

³ Pana lo Eeya lolaapata heloo̒pali batango lowatotia, uluu̒ lo Eeya rasaalo mobuheeto hemodeehei olo watotia.

⁴ Watotia longongoto tiluhua sababu omuluka lo Eeya; diaaluo u seehati tobatanga lowatotia sababu dusa lowatotia.

⁵ Watotia yilumoduo̒ todelomo totala lowatotia udaata-daatalo mao̒, bantalo dusa lowatotia mailaba buheeto olo watotia.

⁶ Papaa-liyaalo watotia ilolaala wau boboolo mohutodu, sababu watotia malo tihutu mohulodu.

⁷ Watotia leidungu wau leinggou, ilo-ilolaanga watotia wunuwunulo wau siluukali lohilao.

⁸ Polipitolo lopo hintalabu batanga lowatotia, diaaluo u seehati tobatanga lowatotia.

⁹ Helo toyopu daa̒ hilaa lowatotia wau ilopulita lo lotolo, watotia helopo ilaalo suusa sababu hilaa lowatotia balisa.

¹⁰ Yaa Eeya, otaawa lo Eeya totoonulalo ilohilao lowatotia, totoonulalo lapalo u timubua̒i sababu suusa lowatotia diila depudepuhe to Eeya.

¹¹ Putu lowatotia lime-limelo, wau olootolo watotia yilooli, mato lowatotia malowali pilulau.

¹² Mongo sahabati lowatotia helo halalahu sababu ngongoto lowatotia, tumbao̒ kaumu tamo dudulo wolo watotia helo poo̒laminga lonto watotia.

¹³ Taa u ohilaa momate olo watotia mate-mateelo mao̒ helolaala taalo to watotia; tao̒hilaa mopo topotala olo watotia helo ngaanjamu ohilaa mopobinasa olo watotia.

¹⁴ Bo watotia debo odelo taa bungolo tadiila moo̒dungohu, debo odelo taa bubu tadiila mowali mobisala.

¹⁵ Otutu, watotia debo odelo taa udiila moo̒dungohu, wau sababu uito watotia diila helo buutola.

¹⁶ Bo watotia hemo tiwunela mola to Eeya, yaa Eeya, wau Eeya, yaa Eeya Allahu Taa̒ala lowatotia, helo lametai olo watotia.

¹⁷ Diila mao̒ polulia musu lowatotia sanangi moo̒onto osuusa lowatotia, diila mao̒ polulia timongolio molatabu wonu watotia moe̒etu.

¹⁸ Watotia bolo ngopee̒ lodehu, mololalaaita watotia heodungga lo ngongoto.

¹⁹ Watotia motolongaku mola duduu-sawaalo lowatotia; hilaa lowatotia molawalo momikiilangi mola totala lowatotia.

²⁰ Tau-tauwalo tahi pomusua olo watotia dadaata wau hilootola, timongolio molonuo̒ todudelo tutumulo watotia.

²¹ Taa u motuli opopiohu wolo ololeeto helomusu olo watotia sababu watotia hemohutu u mopiohu.

²² Yaa Eeya, diila mao̒ tolai watotia, diila mao̒ polamingo monto watotia, yaa Allahu Taa̒ala lo watotia.

²³ Hua̒a podunggaalo mai motulungi olo watotia, yaa Eeya tamoo-poa̒ahua olo watotia.