JABURU 32 - KITABI HABARI MOPIOHE

Polongakua wau pongambungua

¹ Jaburu lei Dauda. Lahu pongaajali. Potisanangilo tutu taa u dusaalio ilambangu, wau totalaalio milaa̒apu.

² Potisanangilo tutu taa u ololeetio diila yilia̒apo lo Eeya, wau taa udiila mohuto mohimbulo.

³ Ngotilonggadu watotia diila motolongaku dusa lowatotia, watotia morana, sababu hemopo dulohe mola ngotupa lodulahu.

⁴ Hui wau dulahu Eeya hemodeehe olo watotia, yaa Eeya, olootolo watotia lopulito ilintopa lo dulahee yilaalabu.

⁵ Lapatao̒ watotia lotolongaku mola dusa lo watotia to Eeya, totala lo watotia diaaluo u dilepuhe lo watotia. Watotia lolantu u motolongaku mola to Eeya, wau Eeya helo ngambungu mai ngoa̒amila dusa lowatotia.

⁶ Sababu uito timii̒du taa saale paatutilio modua̒ mola tou̒ odungga lo eepita, tilinggula wonu usuusa laba-labaalo daata meidungga, tio diila otembaalio.

⁷ Eeyaalo tambati potituua̒ lowatotia, yilopato Eeya watotia lonto usuusa. Yi watotia helo tingalaa̒ mola wolo wengahu, sababu Eeya malo poa̒ahu olo watotia.

⁸ Tahuda mai lo Eeya, “Wau̒ mamopo ilaalo mai dalalo u musi ponao̒owamu, yio̒ madeloo-U̒ wau wohiya-U̒ potua.

⁹ Diila mao̒ potihutu debo odelo wadala udiila o aakali, u musi podulungola wolo tongguu̒mo wau tali alihu moduduo̒.”

¹⁰ Taa odusa otemba losuusa dadaata; bo taa u hemo tiwunela to Eeya debo duo̒la ponu lo Eeya.

¹¹ Wuu tahisaalea, poti wengahulo wau poti sanangilo mola sababu wolo u mapilohutu mai lo Eeya. Potingalao̒lo mola wolo wengahu, wuu ngoa̒amila taa u ohilao motulidu!