JABURU 31 - KITABI HABARI MOPIOHE

Motiwunela to Allahu Taa̒ala

¹ Duo̒lo diriheni lopolemboa̒ tamoolahua. Jaburu lei Dauda.

² To Eeya watotia motiduo̒la yaa Eeya, diila mao̒ polulia mai watotia pilopo ngingi. Poa̒ahuwalo mai watotia domi o aadili lo Eeya

³ dungohilo watotia wau hua̒a lopotaalo mai watotia. Powalilo mai duo̒lo watotia hui̒dee botu tambati potiduo̒la lo watotia, debo odelo biintengi u motoheto, tou̒toonu watotia mowali moa̒ahu.

⁴ Ooo̒, Eeya debo odelo hui̒dee botu biintengi u motoheto olo watotia! Delowalo watotia motuuu̒de wolo danti lo Eeya.

⁵ Lopataalo mai watotia monto taalo u taataalo olo watotia, sababu Eeyaalo tambati potiduo̒la lowatotia.

⁶ Ode delomo uluu̒ lo Eeya wuduo lowatotia batanga lowatotia; Eeya lopo lolopato olo watotia, yaa Eeya, Allahu Taa̒ala tadebo molotolo hilao.

⁷ Taa u molubo balaahala olonuo̒ lo Eeya; bo watotia yakini to Eeya.

⁸ Watotia mamo tiwengahu wau motisanangi sababu Eeya debo hemomonu mai olo watotia. Eeya loo̒onto polodutolo watotia wau helo poo̒tuotai osuusa lowatotia.

⁹ Eeya diila lopoluli olo watotia tilawalo musu, bo lopoluasi olo watotia lonao̒ wolo beebasi.

¹⁰ Ponualo mai watotia, yaa Eeya, sababu watotia todelomo usuusa; mato lowatotia laasa mongongoto sababu hilumoyongo, jiwa wau batanga lowatotia morana.

¹¹ Tutumulo watotia lopulito todelomo polodutolo, tataa-wunuwaalo watotia lopaluto todelomo helohiito napasi sababu suusa. Olootolo watotia iliilangi sababu ololeeto watotia, tumbao̒ tutuu-lalowaalo watotia malotupo.

¹² Watotia lowali leitawalo duolo ngoa̒amila musu lowatotia, tumbao̒ monto tahi tiheedea wolo watotia. Ngoa̒amila tamoo̒taawa wolo watotia ooheaalo wonu moo̒onto olo watotia, timongolio tumeteo̒ wonu modunggaya wolo watotia todalalo.

¹³ Watotia yilipato debo odelo taa yilate, wau lowali debo odelo balangi u tilapi.

¹⁴ To utoonulalo mao̒ woluo u moo̒tihela hapato; ilodungohe lowatotia suala musu lowatotia hipo loloohumawa. Timongolio helo woomboa moluwali olo watotia, wau helohutu ranjana u momate olo watotia mate-mateelo mao̒.

¹⁵ Bo watotia hemo tiwunelo mola to Eeya, yaa Eeya, sababu Eeyaalo Allahu Taa̒ala lowatotia.

¹⁶ Eeya laito hemolaalai olo watotia; Poa̒ahuwalo mai watotia monto mumuu-suuwaalo watotia, wau monto tau-tauwalo tahemo hilapita olo watotia.

¹⁷ Pohileelo dua̒ Eeya motuhatawa towato lo Eeya; poa̒ahuwalo mai watotia sababu ponu lo Eeya.

¹⁸ Diila mao̒ polulia watotia moo̒tapu woolito, yaa Eeya, sababu watotia hemo ngiibodu mola to Eeya. Polulia mao̒ taa moleeto poo̒olitolio, wau wolo poo̒-poo̒oyo molaahe mola ode dunia lotaa mate.

¹⁹ Pambolilo ngango lo tahi pohimbuloa u wolo batingga hemo henteo̒ taa juujulu.

²⁰ Malo odito daatalio opopiohu lo Eeya upilopo dapato lo Eeya ode taa saale! Timii̒du tau moo̒onto opopiohu u pilohutu lo Eeya, ode limongolio tamo tiwunela to Eeya.

²¹ Eeya loluuo̒ olimongolio todelomo wolungo Eeya to polotulete lotaa moleeto; dilaha lo Eeya timongolio todelomo poloduo̒lo Eeya to potuludu lomusu.

²² Ilopujialo mola Eeya! Malo moo̒linggolabu ponu lo Eeya ode watotia, tou̒ watotia bilaala wau hetiluhu.

²³ To delomo olilingu lowatotia, yilan tobu watotia Eeya malolapi olau̒ lonto talu lo Eeya. Bo Eeya malo dungohe polohoneu̒ tou̒ wau̒ longiibode mola to Eeya.

²⁴ Tolia̒ngilo Eeya, wuu ngoilanggubu umati lo Eeya, Eeya moduo̒la taa u tatapu wau molotolo hilao. Bo taa u soombongi hukumanio lo Eeya lou̒ diila ngoputu-ngoputu.

²⁵ Poo̒lotolalo wau poo̒tohetalo mola hilaamu, timongoli ngoa̒amila tahipo tiwunelawa to Eeya!