JABURU 30 - KITABI HABARI MOPIOHE

Dua̒ sukuru

¹ Jaburu lei Dauda. Lahu u posaahalo Bele lo Allahu Taa̒ala.

² Watotia momuji mola to Eeya, yaa Eeya, sababu Eeya malo poa̒ahu olo watotia wau diila lopoluli musu lowatotia helo hantia̒ olo watotia.

³ Eeya Allahu Taa̒ala lowatotia, watotia longiibode mola to Eeya lei̒ tuulungi, wau Eeya lopoo̒luli mai olo watotia.

⁴ Eeya lopo lopato olo watotia lonto aalamu lomautu, wau lopo tumulai olo watotia towolota lotau-tauwalo tahe lopuunungo.

⁵ Polahualo mola puji poloi̒laalo momuji ode Eeya, wuu umati lo Eeya tadebo molotolo hilao, wau posukurulo mola to Taa Laba-labaalo mantali.

⁶ Sababu bo ngopee̒ mola Eeya muluka, opopiohu Eeya pohupohutu ngotupa lo tutumulo. Tou̒ hui watotia hilumoyongo, bo mato lodulahu mamobutu mai lodelo ode oweengahu.

⁷ Tou̒ molaasa aamani watotia moloi̒ya, “Watotia diila tao̒laahelio!”

⁸ Sababu Eeya ohilaa mopiohu olo watotia, yaa Eeya. Pilopowali mai lo Eeya watotia debo odelo hui̒dee u motoheto. Bo lapatao̒ Eeya lotituuo̒ lonto watotia, wau watotia mailoohe.

⁹ To Eeya, yaa Eeya, watotia mongiibode, to Eeya watotia momolohone,

¹⁰ “Wolo hunalio to Eeya wonu watotia mate wau molaahe mola ode huango kuubulu? Tingga mowali taa mate momuji mola to Eeya wau mopo loladu otatapu wau olootolo hilao lo Eeya?

¹¹ Dungohilo mai, yaa Eeya, wau ponualo mai watotia. Yaa Eeya tulungialo mai, watotia!”

¹² Hilimuta lowatotia mabilolio̒ Eeya lowali elungo meengahe, Hilama lo Eeya osuukali hilaa lowatotia wau piloo̒polu mai lo Eeya watotia wolo wengahu.

¹³ Yi watotia diila lohuto lotipoo̒oyo batanga; pilopolahu mola lowatotia poloi̒laalo momuji ode Eeya, yaa Eeya Allahu Taa̒ala lowatotia, wau mosukuru mola ode Eeya u ohiheo-hiheolo mao̒!