JABURU 29 - KITABI HABARI MOPIOHE

Suala lo Eeya todelomo dutalo

¹ Jaburu lei Dauda. Pujialo mola Eeya, wuu mamaa-halukuwalo sologawi, pujialo odudaa̒ wau kawasa lo Eeya.

² Pujialo mola tanggulo Eeya u molamahu tubowalo mola Eeya wolo momake pakeyangi lo ibaadati.

³ Allahu Taa̒ala tau̒daa̒ loti bulonggodu toitaato deheto, suala-Lio toli-toliyongo toitaato auhe daa̒.

⁴ Suala lo Eeya odungohe, polupolu lokawasa wau ololamahu.

⁵ Suala lo Eeya mopo wombahe bubuu-ngowaalo ayu, momoli bungo lo ayu woohu lo Libanon.

⁶ Hui̒dee Libanon pilohutu lo Eeya yilumantio̒ debo odelo walao̒ sapi, Hui̒dee Siryon tilumayango debo odelo walao̒ sapi lo oa̒ayua.

⁷ Suala lo Eeya lopoheulo ilato helo dehita.

⁸ Suala lo Eeya lopoheulo huta datahu wau luasi udelita, Eeya lopoheulo huta datahu wau luasi udelita lo Kades.

⁹ Suala lo Eeya helo polotau̒lo bubuu-ngowalo ayu beraangani, wau helopo duduulahu duduu-ngowaalo to oa̒ayua; sambela to Bele lo Eeya umati hipo ngiibode meengahu, “Pujialo mola Eeya!”

¹⁰ Eeya okawasa toitaato taluhee daa̒, Eeya okawasa odelo Olongia u ohiheo-hiheolo mao̒.

¹¹ Pohileaala dua̒ Eeya mongohi lotolo to umati-Lio, wau mohutu olimongolio aamnai sontosa wau maa̒muru.