JABURU 27 - KITABI HABARI MOPIOHE

Dua̒ poloi̒laalo momuji

¹ Jaburu lei Dauda. Eeya yito tinelo watotia wau oa̒ahu lowatotia, diaaluo u oohe lowatotia. Eeya yito biintengi potiduo̒la lowatotia, watotia diila tahumuhela.

² Wonu watotia tuhuo lotaa moleeto tao̒hilaa momate olo watotia mate-mateelo mao̒, yi timgoliolo tameiteduo̒ wau modehu.

³ Penu boli watotia balaawa lo pasuukani u udaa̒, watotia diila tamoohe. Penu boli mobutu mai popaatea moluwali olo watotia, watotia debo moharapu mola.

⁴ Bo tuwau u pohile lo watotia to Eeya, bo uti-utieelo u otohilaa lowatotia: motipoo̒oyo to Bele lo Eeya ngotupa lo tutumulo watotia, u molaasa mao̒ u mopiohe monto Eeya wau momolohone potuhata lo Eeya.

⁵ Eeya helo duo̒lai olo watotia tou̒ ileepita; Eeya loluuo̒ olo watotia todelomo Bele-Lio, wau lomintaa̒ mola olo watotia ode yitaato hui̒dee botu.

⁶ Botia watotia loo̒haama tomusu topalito lowatotia; yi wolo tingalaa̒ meengahu pilodewo lowatotia bake sukuru to Bele lo Eeya; watotia ohilaa mopolahu mola wau momuji to Eeya.

⁷ Yaa Eeya, dungohilo mai wonu watotia mongiibode to Eeya, ponualo watotia wau tametilo mai watotia!

⁸ Eeya lotahuda mai, “Ponao̒lo mai molubo ola-U̒.” Tilameta lowatotia, “Watotia hua̒a monao̒ mai, yaa Eeya;

⁹ diila mao̒ potituuo̒ monto watotia.” Diila mao̒ pomuluka wau potoulia wato lo Eeya, sababu Eeyaalo tamalo tuulungi olo watotia. Diila mao̒ tapila meaambo tolai watotia, yaa Allahu Taa̒ala, talo poa̒ahu olo watotia.

¹⁰ Penu boli tiyamo wau tiilo mololaa mao̒ olo watotia, Allahu Taa̒ala mamolaalai olo watotia.

¹¹ Pobilohelo mai to watotia kahandaki lo Eeya, yaa Eeya, delowalo watotia to dalalo u motulidu, sababu musu lowatotia dadaata daa̒.

¹² Diila mao̒ wudua watotia ode napusu laawani lowatotia, tamoluhu olo watotia wolo wimbulo wau aanjamu.

¹³ Watotia yakini mamoo̒laasa mai u mopiohu monto Eeya todelomo tutumulo watotia todunia botie.

¹⁴ Poharapulo to Eeya, poo̒lotolalo wau poo̒tohetalo mola hilaamu; ooo̒, poharapulo mola to Eeya!