JABURU 21 - KITABI HABARI MOPIOHE

Poloilaalo momuji to ohohaama

¹ Duo̒lo diriheni lopolemboa̒ tamoolahua. Jaburu lei Dauda.

² Yaa Eeya, ti olongia leengahu sababu Eeya malo poo̒lotolai olio; tio lotiwengahu sababu ohohaama uilohi lo Eeya olio!

³ Eeya malo poo̒polu mai ilotohilaa lohilaalio, wau longohi wolo u pilohilelio.

⁴ Eeya lonao̒ mai ode olio wolo balakati udiila o eenggade, wau lophuli makuta hulawa to lunggongio.

⁵ Tio lomolohone tutumulo, wau yilohi lo Eeya to olio, tumbao̒ umulu hayahaya u ohiheo-hiheolo mao̒.

⁶ Sababu polotulungi lo Eeya olio yi tio lowali laba-labaalo hilurumati, tio pilopowali lo Eeya masa-masaahuru wau mobaango.

⁷ Bilarakatia lo Eeya tio u mololaalaaita; owoluo lo Eeya helohutu olio lealeaatu lo wengahe.

⁸ Ti olongia hemoharapu to Eeya Taa Laba-labaalo molanggato, laito aamani sababu debo heponua lo Eeya.

⁹ Tio mamotawalo ngoa̒amila musuulio, wau moheu̒pa ngoa̒amila taa u molonuo̒ to Eeya.

¹⁰ Tio monao̒ mai debo odelo tulu u lai̒lai̒ito u mopobinasa olimongolio. Timongolio mapobinasa omuluka lo Eeya, wau lotulu u moo̒pobu.

¹¹ Monto wali mai limongolio diaaluo tao̒labita, ti olongia mamopoo̒ pulitao̒ olimongolio ngoa̒amila.

¹² Wonu bolo timongolio mohutu ranjana motehengi oli olongia, wimbulo wau aakali limongolio diila tao̒haasili.

¹³ Eeya mamopo mantahu pana-Lio, tilinggula timongolio mobale wau tumeteo̒.

¹⁴ Mongowatotia momuji mola to Eeya yaa Eeya, sababu udaa̒ kawasa lo Eeya, mongowatotia mopolahu mola momuji olotoolo boli obobuheli daa̒ lo Eeya.