JABURU 20 - KITABI HABARI MOPIOHE

Dua̒ lomolohone ohohaama

¹ Duo̒lo diriheni lopolemboa̒ tamoolahua. Jaburu lei Dauda.

² Pohileaala dua̒ Eeya molametai olemu tou̒ oweepita, pohileaala dua̒ kawasa lo Allahu Taa̒ala lei Yako moduo̒lai olemu!

³ Pohileaala dua̒ Eeya molao wau momantu mai olemu monto Bele-Lio, wau motulungi mai olemu monto Huludu Sion.

⁴ Pohileaala dua̒ Eeya mamoe̒ela ngoa̒amila dewomu, wau sanangi wolo totoonulalo bake yilalangomu.

⁵ Pohileaala dua̒ Eeya mongohi mai totoonulalo u otohilaamu, wau mohutu mai totoonulalo ranjanaamu ohaasili.

⁶ Yi ami motingalaa̒ mola meengahu sababu ohohaamamu, wau momintao̒ mola babaa-ndelaalo u momuji to Allahu Taa̒alanto. Pohileaala dua̒ Eeya modungohei totoonulalo hihiilemu.

⁷ Botia ilotaawau̒ deu̒ Eeya helo poo̒haama mai toli olongia tilulao-Tio. Eeya lolametai olio lonto sologaa-Lio u mantali; wolo kawasa lo Eeya tio he loo̒haama daa̒.

⁸ Woluo taa u hemo pongaku kaleta lo popaatealio, woluo olo taa u hemo pongaku wadalaalio. Bo ito mopongaku kawasa lo Eeya, Allahu Taa̒alanto.

⁹ Timongolio mamei teduo̒ wau modehu, bo ito mamobongu wau timihula molotolo.

¹⁰ Yaa Eeya, wohiyalo mai u moo̒haama ti olongia, tametilo mai mongowatotia tou̒ mongowatotia mongiibodu.