JABURU 17 - KITABI HABARI MOPIOHE

Dua̒ lotaa udiila ototala

¹ Dua̒ lei Dauda. Dungohilo mai iibodu lo watotia momolohone ua̒adili, poo̒tuotilo mai dua̒ lo watotia u tuulusi, yaa Eeya.

² Poti dapatolo mopoduulua mai palakala lowatotia sababu otaawa lo Eeya wolo u otutu.

³ Wonu Eeya motesi hilaa lo watotia wau monao̒ mai motulete olo watotia tou̒ hui, yi mao̒dungga lo Eeya deu̒ watotia otutu wau belesi hilao; loi̒ya lowatotia motuuu̒de wolo pikiilangi lowatotia.

⁴ Watotia hemohutu wolo u hepoa̒hu mai lo Eeya wau diila helo dudua̒ dalalo udiila omanusia.

⁵ Watotia laito tumutumulo lodudua̒ potuhata lo Eeya wau diila helo lambanga potuhata boito.

⁶ Watotia helo ngibode mola to Eeya, yaa Allahu Taa̒ala, sababu Eeya hemo lametai olo watotia; poo̒tuotilo mai watotia wau dungohilo loloo-iyaalo watotia.

⁷ Pobilohelo mai ponu lo Eeya u moo̒linggolabu sababu hepiloa̒ahu lo Eeya tau-tauwalo tahe moti duo̒la to Eeya, wau totili lo Eeya timongolio aamani monto tihuo̒ lomusu.

⁸ Taalaalo mai watotia debo odelo botu lomato lo Eeya, tuua̒alo watotia towalungo polipio̒ Eeya

⁹ tou̒ tuhuo lotaa moleeto. Watotia hebilaala lomusu tao̒hilaa momate olo watotia mate-mateelo mao̒;

¹⁰ timongolio diila motota lo tolia̒ngo wau hemobisala wolo batingga.

¹¹ Timongolio lomaju helo luwali olo watotia wau loa̒ambua mai ode watotia, hemololohe wakutu u mopobanti olo watotia.

¹² Timongolio debo odelo singa u ohilaa modangapo mangusaalio, singa buboto u molanggu totambati potituua̒lo.

¹³ Tihuloolo mai, yaa Eeya, tuwaliyalo musu lowatotia wau poo̒laahelo timongolio. Poa̒ahuwalo mai watotia wolo wamilo Eeya to tuhuo̒ lotaa moleeto.

¹⁴ Lopatalo mai watotia monto tau-tauwalo tahemo poo̒daata-daatalo mao̒ halata todunia. Hukuu-maniyalo mai timongolio wolo baala u mapilopo dapato lo Eeya ode limongolio. Huliilo mao̒ walao̒ wau wombu limongolio hukuu-maniyola olo.

¹⁵ Bo watotia mamoo̒onto to Eeya sababu watotia diila ototala. Tou̒ watotia lobongu mai, owoluwoa lo Eeya helohutu hilaa lo watotia leengahu.