JABURU 16 - KITABI HABARI MOPIOHE

Dua̒ wolo lealeaatu lo oyoyakini

¹ Jaburu lei Dauda. Dahailo mai watotia, yaa Allahu Taa̒ala, sababu bo to Eeya watotia motiduo̒la.

² Watotia moloi̒ya mai, “Eeyaalo Eeya lowatotia, osanangi tutu lo watotia, diaaluo tamo ngilabota to Eeya!”

³ Hehurumatio lowatotia tau-tauwalo tahi mantalia tolipu botie; ilohilaa lowatotia yito motitolaa pee̒-pee̒enta woli mongolio.

⁴ Poluliaalo mao̒ taa u hipoluboa dedeewaalo he oduhenga mola osuukali lohilaalio. Watotia diila mohuto motibake to dedeewaalo, tumbao̒ diila mohuto molanggula tangguli mongolio.

⁵ Yaa Eeya, bo Eeya wambao̒ tamililiiki lowatotia; Eeya hemongohi mai totoonulalo u palaluo lowatotia, paladu lowatotia woluo to uluu̒ Eeya.

⁶ Otutu molamahu wowohi mai lo Eeya ode watotia, heloo̒ sanangi daa̒ hilaa lowatotia!

⁷ Watotia momuji mola to Eeya tahe mongohi potua olo watotia; penu boli tou̒ hui suala hilaa lowatotia hemo ngaajali olo watotia.

⁸ Watotia laito hemoe̒ela mola to Eeya; Eeya woluo totili lo watotia, yi watotia diila heloe̒tu.

⁹ Sababu uito hilaa lowatotia meengahu wau jiwa lowatotia lotingalaa̒ leengahu, batanga lowatotia lohuheli wolo tantaramu.

¹⁰ Sababu Eeya diila lopoluli mai watotia yilate; taa u pilonua lo Eeya diila piloluli lo Eeya binasa.

¹¹ Pobilohe mai lo Eeya olo watotia dalalo dulu-dulunga ode tutumulo; to Eeya watotia heloo̒tapu wengahu daato-daatalo mao̒ wau osanangi tutu u ohiheo-hiheolo mao̒.