JABURU 148 - KITABI HABARI MOPIOHE

Hulungo wau dunia, pujiaalo mola Eeya !

¹ Pujiaalo mola Eeya! Pujiaalo mola Eeya, wuu ngotuango sologa! Ngoa̒amila tabilu-biluloa̒ to tambati molanggato, pujiaalo mola Eeya!

² Pujiaalo mola Eeya, wuu ngoa̒amila malai̒kati lo Eeya, pujiaalo mola Eeya, wuu ngoilanggubu suludadu lo sologa!

³ Pujiaalo mola Eeya, wuu mato lo dulahu wau hulalo, pujiaalo mola Eeya, wuu popoo-liyamaalo u hei̒nta-intaawa!

⁴ Pujiaalo mola Eeya, wuu hulungo u laba-labaalo molanggato, pujiaalo mola Eeya, wuu taluhu toitaato hulungo!

⁵ Mopiohulo timongolio ngoa̒amila momuji tanggulo Eeya, sababu ngoa̒amilalo pilowali mai topalenta lo Eeya.

⁶ Eeya tinggai lolantu tambatilio, putuusani lo Eeya pohu-pohutu u ohiheo-hiheolo mao̒.

⁷ Pujiaalo mola Eeya, wuu ngotuango dunia, wuu nanaa-hawaalo deheto wau ngoilanggubu auhee daa̒;

⁸ wuu ilato wau didi esi, botua wumbuo̒ lotaluhu moputio̒ wau heengo, dupoto moo̒ohuu̒ u modudua̒ palenta lo Eeya!

⁹ Pujiaalo mola Eeya, wuu huhuu-luduwaalo wau huhuu-ideyaalo, bungo lo ayu hipomungoa wau ngoa̒amila oa̒ayua;

¹⁰ ngoa̒amila bibiahu wau binatangi molinggelo, totoonulalo binatangi hia̒alapa wau bulungi!

¹¹ Pujiaalo mola Eeya, wuu mongo olongia wau totoonulalo bangusa, tahi bangusawa wau ngoa̒amila takawa-kawaasa;

¹² ngoa̒amila mongo bohulotau wau mongo dulahu, taa panggola wau taa humula.

¹³ Mopiohulo timongolio ngoa̒amila momuji mola tanggulo Eeya, sababu tanggulo Eeya lebe udaa̒ wolo totoonulalo tanggulo; odudaa̒ lo Eeya mongilabota hulungo wau dunia.

¹⁴ Eeya malo poo̒lotolai bangusaa-Lio, tilinggula Eeya hepujio boli puji lo umati-Lio, Isirai̒lu, umati ilohilao lo Eeya. Pujiaalo mola Eeya!