JABURU 145 - KITABI HABARI MOPIOHE

Lahu poloi̒laalo momuji

¹ Poloi̒laalo momuji lonto olei Dauda. Watotia ohilaa mopou̒daa̒ mola to Eeya, yaa Allahu Taa̒ala lowatotia wau Olongia lowatotia, wau momuji mola to Eeya ohiheo-hiheolo mao̒.

² Timii̒du dulahu watotia ohilaa mosukuru mola to Eeya, wau mopolamahu to Eeya ohiheo-hiheolo mao̒.

³ Sababu Eeya udaa̒ wau laba-labaalo ilopujia, odudaa̒ lo Eeya diila otonea̒.

⁴ Wawaalia mola tau mamomuji huhutu lo Eeya wau mopololadu olooloto lo wau obobuheli daa̒ lo Eeya.

⁵ Timongolio mamopo habari odudaa̒ wau ololamahu lo Eeya, huhutu lo Eeya u moo̒linggolabu watotia mamo tipoo̒yo momikiilangi mola.

⁶ Timongolio mopohabari huhuu-hutuwaalo Eeya u moo̒tihela hapato, odudaa̒ lo Eeya mapo malalumu mola lowatotia.

⁷ Tau mamo hungguli totoonulalo opopiohu lo Eeya wau mopolahu mola pasali oa̒adili lo Eeya.

⁸ Eeya boito tamoo-monua wau tamoo-tolia̒ngowa, moboyu momuluka wau laito momonu.

⁹ Eeya muura lohilao to timii̒du tau, wau momonu ngoa̒amila u pilowali mai lo Eeya.

¹⁰ Ngoa̒amila u pilowali mai lo Eeya mamomuji mola to Eeya, yaa Eeya, ngoilanggubu umati lo Eeya mamosukuru mola to Eeya.

¹¹ Timongolio mamopo udaa̒ mola kawasa lo Eeya odelo Olongia, wau mohungguli oloototo wau obobuheli daa̒ lo Eeya,

¹² alihu ngoa̒amila tau motota huhutu lo Eeya u udaa̒, wau yilaidia lo Eeya u molamahu wau motinelo.

¹³ Pamalenta lo Eeya debo ngohilayaa̒ lomaasa, okokawasa lo Eeya moo̒taahangi wawaalia mola. Eeya tatapu wau molotolo hilao to ngoa̒amila danti lo Eeya, Eeya lealeaatu loponu todelomo totoonulalo huhutu lo Eeya.

¹⁴ Eeya motulungi taa u todelomo usuusa, Eeya mopotulidu taa u dungudungu.

¹⁵ Ngoa̒amila mahaluku tumutumulo motiwunela mola to Eeya; Eeya mongohi ua̒alo olimongolio to wakutuulio.

¹⁶ Eeya lopoo̒polu totoonulalo upalaluo limongolio, tilinggula timongolio diila ilopulita.

¹⁷ Eeya aadili todelomo totoonulalo huhutu lo Eeya wau lealeaatu loponu todelomo toonulaalo huhutu lo Eeya.

¹⁸ Eeya meembidu totaa u mongiibode to Eeya, wau momolohone to Eeya wolo otutu wau belesi hilao.

¹⁹ Eeya moposanangi hilaa lotaa u hisaalea; Eeya modungohe iibodi mongolio wau mopoa̒ahu olimongolio.

²⁰ Eeya moduo̒lai timii̒du taa u motolia̒ngo to Eeya, bo taa moleeto pobinasa lo Eeya.

²¹ Watia ohilaa momuji mola to Eeya laito, pohileaala dua̒ ngoa̒aa̒mila mahaluku lo Eeya momuji mola tanggulo Eeya o hiiheo-hiiheolo mao̒.