JABURU 141 - KITABI HABARI MOPIOHE

Dua̒ hui

¹ Jaburu lei Dauda. Watotia mongiibode mola to Eeya, yaa Eeya, hua̒a tulungia mai watotia! Dungohilo mai watotia wonu watotia mongiibode to Eeya.

² Tilomowalo dua̒ lowatotia odelo dewo lodupa, wau uluu̒ watotia u bua̒bua̒ade odelo bake hui.

³ Yaa Eeya, dahailo mai tunggilo watotia wau imatowalo mai biihu lowatotia.

⁴ Pohalaheelo watotia monto hilaa u mohutu moleeto. Diila mao̒ polulia watotia mopaanggala wolo tamomaahu palenta wau modudua̒ molamelo todelomo potihunggu limongolio.

⁵ Wonu ngotaalio mopiohu modini olo watotia, wau wolo hilaa motulidu momate olo watotia, uito debo odelo winulo u ulaba-labaalo mopiohu duo̒lo watotia. Pohileaala dua̒ watotia diila mopotouli mao̒, sababu watotia tulusi hemodua̒ mola motehengi ololeeti mongolio.

⁶ Wonu tahi kawaasawa limongolio pomahuloola monto lilii-towaalo lobotu, timongolio mamomasisi deu̒ loloo-i̒yaau̒ otutu.

⁷ Tutuu laloonto mapo-mua̒yadu tobiihu polobungalo debo odelo botu ngobotu ilaantulu ode huta.

⁸ Bo watotia debo motiwunela to Eeya, yaa Eeya Allahu Taa̒ala lowatotia, diila mao̒ polulia mai watotia mate, sababu watotia hemo tiduo̒la to Eeya.

⁹ Duo̒laalo mai watotia monto popotilo u pilopohuli ode watotia, monto otuhata loimbulo lo tahileeta boito.

¹⁰ Huliaalo mao̒ timongolio modehu ode delomo siaasati yimbulolio lohihilao, bo pohileaala dua̒ watotia moa̒ahu.