JABURU 14 - KITABI HABARI MOPIOHE

Ololeeto manusia

¹ Duo̒lo diriheni lopolemboa̒ tamoolahua. Jaburu lei Daud. Taa abaloolo hemoloi̒ya todelomo hilao, “Diaaluo Allahu Taa̒ala.” Huhutu limongolio moleeto wau mokootoro diaaluo tahi pohutua u mopiohu.

² Monto sologa Eeya momilohei umati lo manusia u mololohe taa molinepo tamolubo to Eeya.

³ Bo ngoa̒amila tau malohei lonto dalalo u otutu wau lorusa watade, diaaluo penu boli ngotaa mao̒ tahemohutu u mopiohe.

⁴ Tahuda lo Eeya, “Tingga diila mongalati tau-tauwalo moleeta boito? Timongolio hitumula lou̒ hemo lambata umati-U̒ wau diila pee̒enta mao̒ helodua̒ mai to olau̒.”

⁵ Taa moleeto mamoohe daa̒, sababu Allahu Taa̒ala hemo duo̒lai taa u modungohe to Eeya.

⁶ Taa moleeto ohilaa mongabuto taa mosikini, bo Eeya mowali tamoo-duo̒lawa olio.

⁷ Pohileaala dua̒ monto Sion meidungga mai oa̒hu ode Isirai̒lu! Yi wali mola lei Yako mamo tiwengahu wonu Eeya moponguli mai owowoluwoa lo umati-Lio.