JABURU 136 - KITABI HABARI MOPIOHE

Lahu sukuru

¹ Posukurulo mola to Eeya, sababu Eeya mopiohu; ponu lo Eeya ohiheo-hiheolo mao̒ diila opulitio.

² Posukurulo mola to Allahu Taa̒ala Taa Laba-labaalo molanggato; ponu lo Eeya ohiheo-hiheolo mao̒ diila opulitio.

³ Posukurulo mola to Eeya Taa Laba-labaalo udaa̒; ponu lo Eeya ohiheo-hiheolo mao̒ diila opulitio.

⁴ Bo Eeya tamohutu mai totoonulalo moo̒linggolabe udaa̒; ponu lo Eeya ohiheo-hiheolo mao̒ diila opulitio.

⁵ Wolo tinepo-Lio Eeya lopowali hulungo; ponu lo Eeya ohiheo-hiheolo mao̒ diila opulitio.

⁶ Eeya lopo wumbatai dunia toitaato taluhu; ponu lo Eeya ohiheo-hiheolo mao̒ diila opulitio.

⁷ Eeya helohutu totoonulalo babaa-langiyalo pobaango to hulungo; ponu lo Eeya ohiheo-hiheolo mao̒ diila opulitio;

⁸ mato lo dulahu u mongaawasa dulahu; ponu lo Eeya ohiheo-hiheolo mao̒ diila opulitio;

⁹ hulalo wau poliyama u mongaawasa hui; ponu lo Eeya ohihe-hiheolo mao̒ diila opulitio.

¹⁰ Hepilate lo Eeya yila-yilateelo mao̒ tau̒kekeei̒ mohuhula daa̒ lo Masiri; ponu lo Eeya ohiheo-hiheolo mao̒ diila opulitio.

¹¹ Isirai̒lu dilepito Eeya yilumuala lonto Masiri; ponu lo Eeya ohiheolo mao̒ diila opulitio;

¹² wolo uluu̒ motoheto wau molotolo boli buheli daa̒; ponu lo Eeya ohiheo-hiheolo mao̒ diila opulitio.

¹³ Deheto Gelaga bilutao̒ Eeya; ponu lo Eeya ohiheo-hiheolo mao̒ diila opulitio;

¹⁴ Isirai̒lu umati lo Eeya dilelo-Lio ode ngotuwali; ponu lo Eeya ohiheo-hiheolo mao̒ diila opulitio.

¹⁵ Bo olongia lo Masiri wau suludadulio pilopoa̒humo Eeya; ponu lo Eeya ohiheo-hiheolo mao̒ diila opulitio.

¹⁶ Tilau̒wa lo Eeya umati-Lio lolibaya huta datahu wau luasi udelita; ponu lo Eeya ohiheo-hiheolo mao̒ diila opulitio.

¹⁷ Ilolaahe lo Eeya mongo olongia tamolotolo boli buheli daa̒; ponu lo Eeya ohiheo-hiheolo mao̒ diila opulitio;

¹⁸ pilate lo Eeya mongo olongia tamasa-masaahuru; ponu lo Eeya ohiheo-hiheolo mao̒ diila opulitio.

¹⁹ Tei Sihon, olongia lo Amori; ponu lo Eeya ohiheo-hiheolo mao̒ diila opulitio;

²⁰ tei Og, olongia lo Basan; ponu lo Eeya ohiheo-hiheolo mao̒ diila opulitio.

²¹ Lipu limongolio yiludu lo Eeya ode umati-Lio; ponu lo Eeya ohiheo-hiheolo mao̒ diila opulitio;

²² lowali miliki lo Isirai̒lu umati lo Eeya; ponu lo Eeya ohiheo-hiheolo mao̒ diila opulitio.

²³ Eeya diila lolipata olanto tou̒ ito ilolaahelio; ponu lo Eeya ohiheo-hiheolo mao̒ diila opulitio.

²⁴ Yilopato lo Eeya ito lonto uluu̒ lomusu; ponu lo Eeya ohiheo-hiheolo mao̒ diila opulitio.

²⁵ Timii̒du mahaluku hitumula yilohia lo Eeya ua̒alo; ponu lo Eeya ohiheo-hiheolo mao̒ diila opulitio.

²⁶ Posukurulo mola to Allahu Taa̒ala tamongawasa hulungo; ponu lo Eeya ohiheo-hiheolo mao̒ diila opulitio.