JABURU 135 - KITABI HABARI MOPIOHE

Lahu poloi̒laalo momuji

¹ Pujiaalo mola Eeya! Pujiaalo mola tanggulo Eeya, wuu timongoli mongo wato lo Eeya

² tahemo taa̒aluku wau mohurumati to Bele lo Eeya to biluloa̒ lo Allahu Taa̒alanto.

³ Pujiaalo mola Eeya, sababu Eeya mopiohu, pujiaalo mola tanggulo Eeya, sababu Eeya muura lohilao.

⁴ Eeya lolulaota olei Yako duo̒lo batanga lo Eeya, umati lo Isirai̒lu pilopowali lo milikii-Lio.

⁵ Sababu otaawa lowatia Eeya otutu udaa̒, Eeya udaa̒ mongilabota lo totoonulalo dewa.

⁶ Eeya lohutu mai wolo u kilahandaki-Lio, tohulungo wau todunia, todeheto wau to auhe daa̒ umodelomo.

⁷ Monto huudu dunia Eeya lopodungga mai heengo, pilohutu lo Eeya ilato duo̒lo didi. Lapatao̒ Eeya lomalenta dupoto alihu lumualo monto tambati polahua lo Eeya.

⁸ To Masiri Eeya helomate yila-yilateelo mao̒ ngoa̒amila walao̒ tamohuhula daa̒ monto manusia boli binatangi.

⁹ Mola teeto Eeya helohutu dadaata moo̒linggolabu wau tuoto u mohukuumani mao̒ olongia wau ngoa̒amila pogaweelio.

¹⁰ Eeya helo pobinasa dadaata bangusa, wau lomate yila-yilateelo mao̒ mongo olongia tamolotolo boli buheli daa̒:

¹¹ tei Sihon olongia lo Amori wolei Og olongia lo Basan, wau ngoa̒amila olongia to Kanaa̒n.

¹² Lapatao̒ lipu limongolio yiludu lo Eeya lowali miliki lo Isirai̒lu, umati lo Eeya.

¹³ Yaa Eeya, Eeya madebo pololadulo, wau tanggulo Eeya ileela mola lo ngoa̒amila wali,

¹⁴ sababu Eeya helongohi ua̒adili to umati lo Eeya, wau momonu mongo wato lo Eeya.

¹⁵ Balaahala limongolio lonto hulawa wau talaa̒, huhutu uluu̒ lo manusia.

¹⁶ Timongolio otunggilo, bo diila moo̒bisala, omato, bo diila mowali moo̒onto.

¹⁷ Timongolio obulonga, bo diila moo̒dungohu, monto tunggili mongolio diila lumualai napasi.

¹⁸ Pohileaala dua̒ odieelo mola paladu lotau-tauwalo tahe lohutu mao̒, wau tayakini olio.

¹⁹ Pujiaalo mola Eeya, wuu umati lo Isirai̒lu, pujiaalo mola Eeya, wuu mongo iimamu lo Allahu Taa̒ala!

²⁰ Pujiaalo mola Eeya, wuu tau-tauwalo Lewi, pujiaalo mola Eeya, timongoli ngoa̒amila tahisaalea.

²¹ Pujiaalo mola Eeya to Sion, to Yerusalemu tambati biluloa̒ lo Eeya. Pujiaalo mola Eeya!