JABURU 130 - KITABI HABARI MOPIOHE

Dua̒ todelomo usuusa

¹ Lahu jiara. Monto liito usuusa watotia longiibode mola ode Eeya, yaa Eeya.

² Yaa Eeya, dungohilo mai iibodu lowatotia, poo̒tuotilo mai polohone lowatotia.

³ Wonu Eeya tulusi moe̒elai dusa lo mongowatotia, yaa Eeya, tatoonu tamoo̒ taahangi?

⁴ Bo Eeya motohilaa mongambungu, alihu tau mowali saale.

⁵ Watotia hemohima bantua mai lo Eeya, danti lo Eeya hehalapuo lowatotia.

⁶ Watotia mooloolo to Eeya, lebe lou̒ ngotaalio taa umonao̒ mohelili u modaha oa̒amani u mooloolo dulahu mobutu mai.

⁷ Poharapulo to Eeya, wuu umati lo Eeya, sababu Eeya debo momonu, wau laito dapadapato mopoa̒ahu.

⁸ Eeya mamolopata olanto monto totoonulalo totalanto.